ពុទ្ធឳវាទ ៖ បុគ្គលមិនល្អ ៤ ពួក ដែលយើងពុំគួរសេពគប់

សង្គមមនុស្ស គឺជាសង្គមមួយដែលរស់នៅលាយឡំចូលគ្នា រវាងអ្នកមាន និងអ្នកក្រ រវាងមនុស្សល្អ និងមនុស្សអាក្រក់។ មនុស្សគ្រប់ជាតិសាសន៍ទាំងអស់ ត្រូវរស់នៅលើផែនដីនេះតែមួយជាមួយគ្នា។ មនុស្សល្អ និងមនុស្សអាក្រក់ រស់នៅលាយឡំគ្នា តែមានភាពខុសគ្នាដាច់ស្រឡះ។ ទោះជាយ៉ាងណាក្ដី ព្រះពុទ្ធបរមគ្រូនៃយើង លោកទ្រង់លើកយកបុគ្គល ៤ពួក ដែលចាត់ទុកថា ជាបុគ្គលមិនល្អ។

បុគ្គលមិនល្អទាំង ៤ ពួកនោះមានដូចជា ៖

១. មនុស្សខ្ជិលច្រអូស ៖ ជាមនុស្សដែលខ្ជិល មិនប្រឹងប្រែងប្រកបកិច្ចការចិញ្ចឹមជីវិត, ជាប្រភេទមនុស្សដែលរំពឹងតែលើប្រេងវាសនា។

២. អ្នកបួសមិនសង្រួម ៖ ជាប្រភេទបុគ្គលដែលបួសរៀនក្នុងសំណាក់ព្រះពុទ្ធសាសនា តែមិនបានសង្រួមកាយ គោរពវិន័យដែលព្រះពុទ្ធបញ្ញត្តិ។

៣. អ្នកដឹកនាំប្រទេស មិនពិចារណាមុនធ្វើ ៖ ប្រភេទមនុស្សដែលដឹកនាំគេ ដឹកនាំជាតិ តែមិនសូវមានការពិចារណាឲ្យបានវែងឆ្ងាយ ឲ្យបានល្អិតល្អន់ មុននឹងធ្វើអ្វីមួយ។

៤. អ្នកប្រាជ្ញក្រោធខឹងច្រើន ៖ ធម្មតាអ្នកប្រាជ្ញ គឺជាបុគ្គលដែលចេះដឹង មានចំណេះវិជ្ជាខ្ពង់ខ្ពស់ និងគួរជាទីគោរពនៃមនុស្សផងទាំងឡាយ។ ដូច្នេះអ្នកប្រាជ្ញ ពុំគប្បីជាមនុស្សមានសេចក្ដីខឹងក្រោធច្រើនឡើយ៕