ទស្សន៍ទាយជោគទ្រព្យ ជោគសំណាង និង គុណវិបត្តិ តាមខែកំណើត (មករា

តើលោកអ្នកមានកំណើតកើតក្នុងខែណាដែរ ? តើខែកំណើតរបស់អ្នក បង្ហាញអំពីជោគទ្រព្យ អ្វីខ្លះដល់អ្នក? ដើម្បីអោយកាន់តែច្បាស់សូមតាមដានដូចខាងក្រោម៖

១ – កើតខែមករា និង មីនា

ទំនាយជោគទ្រព្យ ៖ អ្នកជាមនុស្សដៃទូលាយ មានប្រាក់ប៉ុន្មានចាយអស់គ្មានសល់ ។ បើអ្នកចង់បានអ្វីមួយ ហើយត្រូវទិញឱ្យទាល់តែបាន។ ដូច្នេះអ្នកជាមនុស្សចាយធំ ហើយក៏ចេះរកចំណូលសមហេតុសមផលដែរ។ កាលពីនៅរៀនអ្នកជួយធ្វើកិច្ចការសាលា និង បង្រៀនបន្ថែមម៉ោងដល់មិត្តភក្តិដើម្បីស្វែងប្រាក់កម្រៃក្រៅ ។ ម្យ៉ាងទៀតអ្នកមិនចេះនៅស្ងៀម រាល់ការងារទៅថ្ងៃអនាគតតែងតែហក់លោត និង ផ្លាស់ប្តូរជានិច្ច ។

ជោគទ្រព្យផ្តល់ជោគសំណាងដល់អ្នក ៖ ពោរពេញទៅដោយឧត្តមគតិ និង តំណាងឱ្យបេសកជននាំមកនូវសន្តិភាព មិនថាអ្នកជាកូនមានចិត្តអង់អាចក្លាហាន ឬ ទុយមុយក្តី ក៏ត្រូវមានការប្រិតប្រៀនជានិច្ច ហើយបើទោះជាជួបភាពលំបាកលំបិន ឬ ឧបសគ្គយ៉ាងណាក្តីក៏ត្រូវតែខិតខំពុះពារដែរ ។ ចំពោះជីវភាពរស់នៅរបស់អ្នកនាពេលបច្ចុប្បន្ននេះជាមនុស្សចូលចិត្ត អាណិតអាសូរគេ ព្រោះកាលបើបានជួបនឹងអ្នកគ្មានការងារធ្វើ ឬ កូនសត្វដែលវង្វេងពីមេវា គឺអ្នកតែងតែជួយជ្រោមជ្រែង និង ជួយយកអាសា។

គុណវិបត្តិនៃចរិតលក្ខណៈ ៖ ពេលខ្លះអ្នកពុំបានធ្វើអ្វីឱ្យស្របទៅតាមបំណងប្រាថ្នាខ្លួនឯងផ្ទាល់ ឡើយ ទើបសិស្សរួមថ្នាក់ ឬ មិត្តភក្តិដែលនៅក្បែរៗនោះចាប់ផ្តើមគិតថា «ម្នាក់នេះហាក់ដូចជាប្លែកបន្តិច»។

២ – កើតខែកុម្ភៈ និង មេសា

ទំនាយជោគទ្រព្យ ៖ តាំងពីនៅតូចៗម្ល៉េះអ្នកជាមនុស្សដែលមានទម្លាប់ចេះសន្សំប្រាក់កាស ។ ដូច្នេះអ្នកត្រូវបានមនុស្សចាស់ទុំ និង ឪពុកម្តាយស្រឡាញ់ថ្នាក់ថ្នម ហើយបើទោះជាចង់បានរបស់អ្វីមួយ ឬ ត្រូវការប្រាក់កាសដើម្បីយកទៅធ្វើដើមទុនរកស៊ីនោះ ក៏ពួកគាត់មិនដែលជំទាស់ដែរ ។ ម្យ៉ាងទៀតអ្នកក៏ជាមនុស្សដែលចេះគ្រប់គ្រងទ្រព្យធនយ៉ាងហ្មត់ចត់ ផងដែរ ។ ទៅថ្ងៃអនាគតការងារដែលស័ក្តិសមសម្រាប់អ្នក គឺការងារផ្នែកហិរញវត្ថុ និង ផ្នែកគ្រប់គ្រង ។

ជោគទ្រព្យផ្តល់ជោគសំណាងដល់អ្នក ៖ ក្តីសុបិនអាចប្រែក្លាយមកជាការពិត ហើយបើមាននរណាម្នាក់ទទួលការបីបាច់ថែរក្សាគឺ ដំបូងត្រូវប្រឈមមុខសាកល្បងបញ្ហាលំបាកដែលនាងបានរៀបចំទុកជាស្រេច ដោយមានតែអ្នកអង់អាចក្លាហានតែប៉ុណ្ណោះទើបមានសមត្ថភាពបានភ្លក្ស រសជាតិនៃក្តីសុបិននេះ។ ដូច្នេះដើម្បីបានទទួលអំណោយទេពទ្រព្យនោះ អ្នកត្រូវតែពឹងផ្អែកទៅលើថ្វីមាត់ និង ភាពឈ្លាសវៃរបស់ខ្លួនឯងផ្ទាល់ ដើម្បីឱ្យបានឆ្លងផុតពីវគ្គលំបាកនោះ។ ម្យ៉ាងទៀតអ្នកក៏ត្រូវតែ ស្វែងរកជំនួយពីក្រុមគ្រួសារ និង មិត្តភក្តិ ទើបអាចធ្វើដំណើរបានទៅដល់គោលដៅ។

គុណវិបត្តិនៃចរិតលក្ខណៈ ៖ ពេលខ្លះអ្នកដែលមានចិត្តមានះរឹងរូស នោះចូលចិត្តតែបន្សល់ទុកនូវអារម្មណ៍អាថ៌កំបាំងដូចជា ពេលមានអាថ៌កំបាំងអ្វីមួយមិនអាចនិយាយប្រាប់គេឯងឱ្យបានដឹងឮឡើយ។ អ្វីដែលអ្នកភ័យខ្លាចបំផុតនោះ គឺអ្នកមិនចង់ឱ្យអ្នកដទៃដឹងអំពីគម្រោងផែនការផ្ទាល់ខ្លួន។ ដូច្នេះទើបអ្នកផងទាំងឡាយនិយាយថា អ្នកជាមនុស្ស «ធ្វើពុត និង មានអាថ៌កំបាំង»។

៣ – កើតខែឧសភា និង កក្កដា

ទំនាយជោគទ្រព្យ ៖ មិនថាតែការងារអ្វីទេច្រើនតែមានឈ្មោះ ល្បីរន្ទឺហើយក្នុងមួយជីវិតនេះគឺប្រកបតែភាពរុងរឿង និង ថ្លៃថ្នូរ ។ នៅក្នុងរាងកាយរបស់អ្នកហាក់ដូចមានស្មារតីអ្វីម្យ៉ាងដែលមិនចេះ ហត់នឿយ ដូច្នេះហើយទើបមានគេនិយាយថា អ្នកហ៊ានប្រថុយប្រថានដើម្បីទ្រព្យសម្បត្តិដែលជាគោលដៅចុងក្រោយដែល អ្នកប្រាថ្នាស្វែងរក។ តាំងពីនៅតូចៗមកម្ល៉េះ អ្នកដឹងពីហេតុផលថា «គ្មានប្រាក់គឺគ្មានអ្វីៗទាំងអស់» ដូច្នេះហើយទើបអ្នកយកចិត្តទុកដាក់ និង ស្វះស្វែងរកពីប្រវត្តិពួកអ្នកមានទ្រព្យសម្បត្តិស្តុកស្តម្ភ និង ប្រមូលព័ត៌មានពីភាពជោគជ័យនៃការរកស៊ីជួញដូរ ។ បន្ទាប់ពីឈានជើងចូលក្នុងសង្គម អ្នកអាចចាប់ផ្តើមយកបទពិសោធដោយធ្វើជាកម្មករស៊ីឈ្នួលគេ រហូតនៅទីបំផុតអ្នកក៏បានក្លាយជាថៅកែគេវិញម្តង។

ជោគទ្រព្យផ្តល់ជោគសំណាងដល់អ្នក ៖ អ្នកកើតខែនេះ តែងតែជាមនុស្សមានភាពក្លាហាន និង ឈ្លាសវៃ ។ អ្នកអាចពិនិត្យមើលខ្លួនឯងថា តើនៅពេលបានជួបបញ្ហាលំបាកម្តងៗតែងតែរិះរកគ្រប់វិធីល្អៗ ដើម្បីដោះស្រាយ ហើយបើទោះជាត្រូវបានជោគវាសនាញាំញីយ៉ាងណាក្តីក៏មិនដែលបោះបង់ចោលឧត្ត មគតិខ្លួនឯងដែរ។ ដូច្នេះប្រសិនបើវាជាការពិតមែននោះ អាចបញ្ជាក់បានថា អ្នកគឺជាមនុស្សដែលមានគំនិតប្រាជ្ញាឈ្លាសវៃ និង ភាពអង់អាចក្លាហានដូចទំនាយមែនហើយ ។

គុណវិបត្តិនៃចរិតលក្ខណៈ ៖ អ្នកឆាប់ជឿទុកចិត្តគេពេក នៅទីបំផុតត្រូវគេក្បត់ចិត្តវិញ ។ ម្យ៉ាងទៀតការជឿទុកចិត្តគេពិតមែនតែមិនមានកំហុសឆ្គងអ្វីក៏ដោយ តែជារឿយៗការប្រកាន់ខ្ជាប់ញក្យ «ជឿទុកចិត្ត» ជាការល្អបំផុត ។ ដូច្នេះគួរតែលើកកម្ពស់ស្មារតីប្រុងប្រយ័ត្នជាប់ជានិច្ចទើបជាការ ប្រសើរ។

៤ – កើតខែមិថុនា និង សីហា

ទំនាយជោគទ្រព្យ ៖ អ្នកគឺជាមនុស្សដែលមានចិត្តសប្បាយរីករាយដោយមានជោគសំណាងល្អបានជួបនូវជោគទ្រព្យ។ ជារឿយៗតែងតែបានទទួលការជួយជ្រោមជ្រែងពីអភិជន ហើយបើទោះជាមិនចាំបាច់ចំណាយកម្លាំងច្រើនក៏ដោយ ក៏អាចបានទទួលលទ្ធផលគួរជាទីពេញចិត្តដែរ។ ម្យ៉ាងទៀតសូម្បីតែចូលរួមក្នុងការចាប់ឆ្នោតដើម្បីឈ្នះរង្វាន់ផ្សេងៗក្តីក៏បានទទួលជោគជ័យដោយបានឈ្នះរង្វាន់ទាំងតូចទាំងធំជាបន្តបន្ទាប់ដែរ។ ទោះជាយ៉ាងណាអ្នកអាចប្រមូលទុកដាក់នូវវត្ថុសំខាន់ៗដែលខុសប្លែកពីអ្នកផងទាំងឡាយ ដូច្នេះឱ្យតែអ្នកមិនមានចិត្តលោភលន់ និង ស៊ីចាយសប្បាយហ៊ឺហាជ្រុលពេក គឺអាចងាកមកបណ្តាក់ទុនរកស៊ីផ្នែកហិរញ្ញវត្ថុប្រាកដជានឹងមានភាពថ្កុំថ្កើងរុងរឿង។

ជោគទ្រព្យផ្តល់សំណាង ៖ អ្នកមានទ្រព្យធនក៏ពិតមែន តែចំណាយទៅវិញដោយក្បិតក្បៀតខ្លាំងណាស់ ទើបមានជោគសំណាង ។ ប៉ុន្តែប្រសិនបើប្រឆាំងនឹងជោគសំណាង អាចក្លាយជាមនុស្សមានមនោសញ្ចេតនាច្រើនជ្រុល ។

គុណវិបត្តិនៃចរិតលក្ខណៈ ៖ ការទទួលរងផលប៉ះពាល់នោះ គឺពេលខ្លះអ្នកហាក់ដូចជាមានមនោសញ្ចេតនាច្រើនពេក និង មានប្រតិកម្មឆាប់រហ័សពេកដែលមិនអាចឱ្យអ្នកបែងចែករវាងមិត្តភាព និង ស្នេហាបានត្រឹមត្រូវ។ ដូច្នេះគេអាចវាយតម្លៃថា អ្នកជាមនុស្សចូលចិត្តធ្វើឱ្យមានមនោសញ្ចេតនាច្រើនដោយខ្លួនឯង ។

៥ – កើតខែកញ្ញា និង វិច្ឆិកា

ទំនាយជោគទ្រព្យ ៖ អ្នកហ្មត់ចត់ក្នុងការងារ ដូច្នេះអ្នកជាមនុស្សចេះគិតគូរក្រុមគ្រួសារ។ លើផ្នែកជោគទ្រព្យអ្នកពឹងផ្អែកទៅលើការប្រកបការងារបណ្តើរបានទទួលផលចំណូលបណ្តើរ ទើបអត្រានៃភាពជោគជ័យមានកម្រិតខ្ពស់។ តាមពិតទៅឱ្យតែខិតខំប្រឹងប្រែងអស់ពីកម្លាំងចិត្ត ពិតជាអាចទទួលនូវការតបស្នងក្នុងកម្រិតខ្ពស់ជាក់ជាមិនខាន។ ចំពោះរឿងប្រាក់កាសអ្នកមានគំនិត និង វិធីរបស់ខ្លួនអ្នកផ្ទាល់ ព្រោះអ្នកមិនគិតតែប្រាក់មួយមុខនោះឡើយ ។ អ្នកស្អប់ខ្ពើមប្រភេទមនុស្សដែលនិយមចូលចិត្តតែសំពះបន់ស្រន់សុំឱ្យមានឆាប់ ដោយមិនខំធ្វើការងារ និង រកស៊ី ។

ជោគទ្រព្យផ្តល់សំណាង ៖ អ្នកជាមនុស្សដែលមានគំនិតប្រាជ្ញាឈ្លាសវៃ ដោយប្រើទេពកោសល្យដើម្បីអនុវត្តសកម្មភាពជាក់ស្តែងហើយក៏ជាបទពិសោធទុកសម្រាប់ជាមេរៀនដល់ជីវិតអ្នកដទៃថែមទៀត។ ដូច្នេះ ជីវភាពរស់នៅបច្ចុប្បន្នរបស់អ្នកដែលចូលចិត្តស្តាប់ការបកស្រាយពីទុក្ខសោករបស់មិត្តភក្តិនោះតែងជួយខ្នះខ្នែងរិះរកគ្រប់វិធីដើម្បីដោះស្រាយរាល់បញ្ហាលំបាកគ្រប់បែបយ៉ាង។

គុណវិបត្តិនៃចរិតលក្ខណៈ ៖ អ្នកជាមនុស្សដែលបានចំណាយពេលវេលា និង កម្លាំងកាយចិត្តច្រើនសម្រាប់អ្នកដទៃ ហើយបើខ្វះការប្រុងប្រយ័ត្នពិតជាអាចនៅឃ្លាតឆ្ងាយពីបងប្អូនញាតិមិត្ត។ ម្យ៉ាងទៀត អ្វីដែលធ្វើឱ្យអ្នកកាន់តែឈឺចុកចាប់នោះ គឺមានមនុស្សមួយចំនួនមិនត្រឹមតែមិនពេញចិត្តស្តាប់ប៉ុណ្ណោះទេ ថែមទាំងដើរទៅនិយាយគ្រប់ច្រកល្ហកថា អ្នកចូលចិត្តឈឺឆ្អាលរឿងរបស់អ្នកដទៃទៀតផង ។

៦ – កើតខែតុលា និង ធ្នូ

ទំនាយជោគទ្រព្យ ៖ អ្នកជាមនុស្សខិតខំព្យាយាមរៀនសូត្រ គឺ ជោគទ្រព្យក៏កើនឡើងទៅតាមវ័យដោយចេះសន្សំចាប់ពីតិចទៅច្រើន ។ ទ្រព្យធនអស់ទាំងនេះគឺមិនត្រឹមតែមានការបង្ហាញពីភាពជាក់ស្តែងប៉ុណ្ណោះទេ ព្រមទាំងបានបង្ហាញយ៉ាងទូលំទូលាយដល់បណ្តាញទំនាក់ទំនងទៀតផង។ ម្យ៉ាងទៀតរឿងប្រាក់កាសក៏ជាការខិតខំប្រឹងប្រែងរបស់អ្នកដែរ ប៉ុន្តែដោយសារតែអ្នកជាមនុស្សចូលចិត្តមានជីវភាពសប្បាយហ៊ឺហានោះ ទើបអ្នកខំប្រឹងរៀនយកចំណេះខ្ពង់ខ្ពស់ដើម្បីបំពេញសេចក្តីត្រូវការ។ អ្នកមានខួរក្បាលជាអ្នកជំនួញ គឺស័ក្តិសមនឹងបើកក្រុមហ៊ុនដោយខ្លួនឯងផ្ទាល់ ព្រោះទៅថ្ងៃមុខប្រាកដជារកប្រាក់ចំណូលបានច្រើនជាក់ជាមិនខាន ។

ជោគទ្រព្យផ្តល់សំណាង ៖ អ្នកមានសន្តានចិត្តល្អ តំណាងឱ្យភាពថ្លៃថ្នូរ និង អ្នកនិយមជីវភាពសប្បាយហ៊ឺហា ។ ដូច្នេះនៅអ្នកជាមនុស្សមានប្រាជ្ញាឈ្លាសវៃ មានចំណេះដឹងខ្ពស់ និង ជួយចេះជួយដល់អ្នកទីទ័លក្រទៀតផង ។

គុណវិបត្តិនៃចរិតលក្ខណៈ ៖ នៅពេលប្រឈមនឹងការបរាជ័យម្តងៗ អ្នកតែងតែសង្ស័យថា មកពីខ្លួនឯងគ្មានសមត្ថភាព។ តាមពិតគឺជាការស្រមើស្រមៃតែប៉ុណ្ណោះ ដូច្នេះបើសម្លឹងចំគោលដៅ ហើយ គឺត្រូវតែប្រញាប់ប្រញាល់អនុវត្តភ្លាម ដាច់ខាតមិនត្រូវមានចិត្តស្ទាក់ស្ទើរឡើយ៕

ដកស្រង់ពី៖ ទស្សនាវត្តីប្រជាប្រិយ ចុះថ្ងៃទី២ សីហា ២០១៥