ខ្ញុំដើរចូលដល់ក្នុងផ្ទះ ហើយឃើញទឹកមុខរបស់ប្រពន្ធខ្ញុំពោរពេញទៅដោយកំហឹង មួរម៉ៅ និង ចងចិញ្ចើមឡើងក្រញូវ។
ខ្ញុំដាក់កាសែតចុះទៅលើតុ រួចសួរថា៖
-"មានអ្វីធ្វើឲ្យអូនមិនសប្បាយចិត្តឬ?"
នាងដោះស្បែកជើងបណ្ដើរ រួចតបដោយសំឡេងមួរហ្មង បណ្ដើរថា៖
-"គ្មានស្អីទេ!"
ខ្ញុំដើរទៅផ្ទះបាយដើម្បីចាក់ទឹកញ៉ាំមួយកែវឲ្យនាង រួចសួរនាងផងថា៖
-"អូនទើបតែមកដល់ផ្ទះដែរឬ?"
នាងឆ្លើយថា៖
-"ហ្នឹងហើយ!"
ខ្ញុំសួរទៀតថា៖
-"ចុះកូនៗ?"
នាងតបថា៖
-"កូនៗនៅខាងលើ កំពុងផ្លាស់ខោអាវនិងងូតទឹក!"
ខ្ញុំសួរនាងថា៖
-"អូនពិតជាមានបញ្ហាអ្វីហើយ ព្រោះសំឡេងនិងទឹកមុខរបស់អូនមិនល្អសោះ! កុំធ្វើអ៊ីចឹង! មានបញ្ហាអ្វី ប្រាប់បងមក!
នាងពោលថា៖
-"កុំមកខ្វល់នឹងអូន! អូនមិនសប្បាយចិត្តទេ!"
ពោលរួច នាងដើរសំដៅផ្ទះបាយ រួចបិទទ្វារលាន់គ្រាំង!
ខ្ញុំដើរចូលតាមក្រោយនាងហើយស្រែកសួរថា៖
-"អូនដណ្ដាំស្លឬ?"
នាងងាកក្រោយហើយស្រែកថា៖
-"ធុញណាស់លោកអើយ! បងសួរច្រើនហួសហើយ! អូនកំពុងតែមិនសប្បាយចិត្តផង!"
ខ្ញុំចាប់ដៃរបស់នាង រួចខ្សឹបថា៖
-"កុំទាន់ដណ្ដាំស្លអី! តោះយើងទៅបន្ទប់គេងសិនទៅ!"
នាងសម្លក់ខ្ញុំហើយរអ៊ូថា៖
-"យីម៉េចអ៊ីចេះ! ដល់ពេលដែលអូនត្រូវរៀបចំអាហារពេលល្ងាចហើយ ណា! ម៉េចបងឯងចង់ធ្វើអ្វីទាំងថ្មើរនេះហ្នឹង ហ្អា?"
ខ្ញុំមិនលែងដៃរបស់នាងទេ ហើយពោលខ្សឹបៗអង្វរនាងថា៖
-"ទៅតែមួយភ្លែតទេ អូនសម្លាញ់ចិត្តបង!"
នាងនៅទ្រឹងព្រមទាំងលូកដៃដួសអង្ករដាក់ចូលឆ្នាំង ហើយតបវិញថា៖
-"អូនគ្មានអារម្មណ៍ទេ! កុំគិតអីផ្ដេសផ្ដាសទាំងភ្លឺដូច្នេះណា!"។
ខ្ញុំប្រើដៃម្ខាងចាប់ដៃរបស់នាង ហើយដៃម្ខាងទៀតស្រវាឱបចង្កេះរបស់នាង រួចបីនាងឡើងជណ្ដើរចូលបន្ទប់គេង។ ខ្ញុំទាញទ្វារបិទថ្នមៗ រួចឱនខ្សឹបសួរនាងថា៖
-"អូនសម្លាញ់ចិត្តបង! សូមអូនរៀបរាប់ប្រាប់បងថា ហេតុអ្វីបានជាអូនមិនសប្បាយចិត្ត?"
ប្រពន្ធខ្ញុំមានទឹកមុខបែបស្រស់បស់បន្តិច ទើបពោលថា៖
-"ថ្ងៃនេះ អូនមានសម្ពាធការងារណាស់ ព្រោះអូនត្រូវមេស្ដីបន្ទោស! អូនបានទាស់សម្ដីជាមួយម៉ែ ព្រោះតែអូនយល់ច្រឡំលើគាត់! ពេលត្រឡប់មកផ្ទះវិញ អូនបើកបរបានជួបគ្រោះថ្នាក់ចរាចរណ៍ដោយប៉ះទង្គិចរថយន្តរបស់គេបន្តិចបន្តួច!
ខ្ញុំស្រវាឱបរាងកាយរបស់នាង រួចពោលលួងលោមនាងថា៖
-"អូ! ណ្ហើយកុំទៅខ្វាយខ្វល់នឹងបញ្ហាកំប៉ិកកំប៉ុកទាំងនេះ អូនសម្លាញ់! គ្មានអ្វីដែលយើងដោះស្រាយមិនចេញនោះទេ! គ្រប់យ៉ាងទុកឲ្យបងដោះស្រាយ! តោះយើងទៅផ្ទះបាយវិញ! ចាំបងជួយអូន ណា!"
យើងនាំគ្នាចុះមកក្រោមវិញ។ ដណ្ដាំស្លបណ្ដើរ ខ្ញុំនិទានកំប្លែងបណ្ដើរឲ្យនាងសើច។ មួយភ្លែតសោះ អាហារពេលល្ងាចបានរៀបចំរួចរាល់។ កូនៗនាំគ្នាចុះមកញ៉ាំបាយជុំគ្នា។
ការជជែកគ្នាស្វែងរកដំណោះស្រាយ គឺជាវិធីជួយសង្គ្រោះនិងស្រោចស្រង់សុភមង្គលនៃគ្រួសារ៕
ប្រភព៖ Bo Tuth
0 comments:
Post a Comment