ស្លឹកស្វាយអាចព្យាបាលជំងឺទឹកនោមផ្អែមបាន?

ជំងឺទឹកនោមផ្អែមជាជំងឺពេញនិយមបាននឹងកំពុងតាមយារយីសុខភាពមនុស្សទូទាំងពិភពលោក ។ ជំងឺកើតឡើងនៅពេលរាងកាយមិនអាចប្រើប្រាស់សារធាតុអាំងស៊ុយឡាំងបានគ្រប់គ្រាន់ ឬលំពែងឈប់ផលិតសារធាតុអាំងស៊ុយឡាំង ។ កង្វះសារធាតុអាំងស៊ុយឡាំង ធ្វើឱ្យជាតិស្ករក្នុងឈាមកើតឡើង និងបង្កជារោគសញ្ញាមួយចំនួន ដូចជា ស្រេកទឹក បត់ជើងតូចញឹកញាប់ និងស្រកទម្ងន់ខុសប្រក្រតី ។

តាមការស្រាវជ្រាវនាពេលថ្មីៗនេះ បានបង្ហាញថាសារធាតុដែលចម្រាញ់ពីស្លឹកស្វាយ អាចព្យាបាលជំងឺទឹកនោមផ្អែមបាន ពីព្រោះវាមានប្រសិទ្ធភាពកាត់បន្ថយជាតិស្ករក្នុងឈាម ។ ការស្រាវជ្រាវនេះ បានធ្វើពិសោធន៍លើសត្វដែលមានជំងឺទឹកនោមផ្អែម ហើយលទ្ធផលបានបង្ហាញឱ្យឃើញថាសត្វដែលស៊ីសារធាតុចម្រាញ់ពីស្វាយ ស្រូបយកជាតិស្ករពីអាហារបានតិច ធ្វើឱ្យកម្រិតជាតិស្ករចុះថយទៅតាមនោះដែរ ។

ហេតុអ្វីបានជាស្លឹកស្វាយមានប្រសិទ្ធភាព?

ស្លឹកស្វាយដែលល្អជាងគេសម្រាប់ប្រើជាឱសថព្យាបាល គឺត្រួចខ្ចីទន់ពណ៌ក្រហមស្វាយព្រឿងៗ ចំណែកស្លឹកស្វាយចាស់ៗដែលមានពណ៌បៃតងចាស់ ក៏អាចយកមកប្រើការបានដែរ ដោយហាលឱ្យស្ងួតទុកប្រើ ។ ស្លឹកស្វាយទាំងនេះសម្បូរទៅដោយវីតាមីនអា បេ និង សេ រួមទាំងសារធាតុចិញ្ចឹមច្រើនប្រភេទទៀត ដូចជាសារធាតុប្រឆាំងអុកស៊ីតកម្ម ហ្វ្លេវើណ័ដ (flavonoids) និងផេណុល (Phenols)។ ស្លឹកត្រួយខ្ចី មានសារធាតុតានីន (Tannins ឬ Anthocyanidins) ជួយព្យាបាលជំងឺទឹកនោមផ្អែមដំណាក់កាលដំបូង និងមាន៣បេតា-តារាសេណុល (3 beta-taraxenol) និងអេទីលអាសេតាត (Ethyl Acetate) ដែលមានតួនាទីជួយសំយោគអាំងស៊ុយឡាំង ដើម្បីជំរុញដល់ការបំលែងសារធាតុគ្លីកូសែន (Glycogen) និង GLUT4។ ស្លឹកស្វាយក៏ត្រូវបានគេប្រើធ្វើជាតែ ដើម្បីជួយព្យាបាលជំងឺរ៉េទីន និងជំងឺសរសៃឈាមដែលបង្កដោយទឹកនោមផ្អែម យ៉ាងមានប្រសិទ្ធភាព ។

តើគួរប្រើស្លឹកស្វាយយ៉ាងដូចម្តេចទើបអាចព្យាបាលជំងឺទឹកនោមផ្អែមបាន?

វិធីទី១
យកស្លឹកស្វាយ៥ទៅ១០សន្លឹកដាំក្នុងទឹក១កាំសៀវតូច
បន្ទាប់ពីដាំពុះ ត្រូវទុកចោល១យប់ ដើម្បីឱ្យចេញជាតិពីស្លឹកស្វាយទៅក្នុងទឹក
ច្រោះយកតែទឹក
ត្រូវទទួលទានទឹកស្វាយនេះនៅពេលព្រឹកមុនគេបន្ទាប់ពីភ្ញាក់ពីគេង
កំណត់ចំណាំ ៖ ការញ៉ាំទឹកស្វាយពោះទទេមុនអាហារពេលព្រឹក នឹងធ្វើឱ្យសម្រូបសារធាតុកម្ចាត់ទឹកនោមផ្អែមនៃស្លឹកស្វាយ អាចនឹងប្រព្រឹត្តទៅបានពេញលេញ ។

វិធីទី២
ហាលស្លឹកស្វាយក្នុងម្លប់ឱ្យស្ងួតក្រៀម ហើយបុកឱ្យម៉ដ្ឋ
ញ៉ាំម្សៅស្លឹកស្វាយកន្លៃស្លាបព្រាកាហ្វេ មួយថ្ងៃ២ដង

ក្រៅពីប្រសិទ្ធភាពក្នុងការព្យាបាលជំងឺទឹកនោមផ្អែម ស្លឹកស្វាយមានអត្ថប្រយោជន៍ចំពោះសុខភាពរាងកាយច្រើនយ៉ាងទៀត ដូចជា អាចព្យាបាលអាការរាគរូស គ្រុណក្តៅ ជំងឺពកសរសៃ គេងមិនលក់ ហឺត រលាកទងសួត និងផ្តាសាយតិចតួច ជាដើម ។ ដូចគ្នាដែរ ស្លឹកស្វាយក៏អាចជួយកាត់បន្ថយសម្ពាធឈាម និងពង្រឹងសរសៃឈាមដែរ ៕

ប្រភពពី៖ pmhotnews