អាថ៌កំបាំងនៅពីក្រោយជោគជ័យរបស់ស្ថាបនិកក្រុមហ៊ុន Microsoft លោក ប៊ីលហ្គេត

មានមនុស្សជាច្រើនគិតថា លោក ប៊ីលហ្គេត (Bill Gates) គឺជាមនុស្សចូលចិត្តនឹកស្រមៃខ្លាំងបំផុត នៅពេលលោកបានបង្កើត និងដាក់ចេញឲ្យប្រើប្រាស់ប្រព័ន្ធប្រតិបត្តិការ (Windows) សម្រាប់កុំព្យូទ័រជាលើកដំបូង។ លោក ប៊ីលហ្គេត បានទទួលការកោតសរសើរចំពោះការបង្កើតស្នាដៃដែលជាប្រព័ន្ធប្រតិបត្តិការមួយដ៏មានការពេញនិយមបំផុតនៅគ្រប់ពេលវេលា និងស្ទើរតែគ្រប់ប្រទេសនៅលើសាកលលោក។

ភស្តុតាងទាំងនេះគឺជាដើមចមនាំឲ្យគេជឿជាទូទៅថា គំនិតច្នៃប្រឌិតគឺជាអ្វីមួយដែលមនុស្សប្រាថ្នាចង់បានដើម្បីបង្កើតរឿងនេះឡើង។ ទោះជាយ៉ាងណាក៏ដោយ គេមានគំនិតជាច្រើនដែលនាំឲ្យសម្រេចជោគជ័យបាន ហើយការអនុវត្តក៏ត្រូវតែធ្វើបានដិតដល់ផងដែរ។

លោក ប៊ីលហ្គេត បាននាំយកប្រព័ន្ធប្រតិបត្តិការកុំព្យូទ័ររបស់ Microsoft ទៅគ្រប់ទីកន្លែងនាពេលបច្ចុប្បន្ននេះដោយសារតែការអនុវត្តតាមគំនិតល្អៗមួយចំនួនរបស់មនុស្សផ្សេងៗដែលជួយជ្រោមជ្រែងលោក ហើយបានក្លាយជាមហាសេដ្ឋីលំដាប់កំពូលក្នុងលោកអស់ពេលជិត ១០ឆ្នាំមកហើយ។

ខាងក្រោមនេះ គឺជាគន្លឹះខ្លះៗដែលលោក ប៊ីលហ្គេត អាចសម្រេចជោគជ័យបាន៖

១) តើអ្នកជឿឬទេថា លោក ប៊ីលហ្គេត បានប្រកាន់វិន័យខ្លាំងនៅពេលបង្កើត Windows ជាលើកដំបូង? លោកមិនបានពឹងផ្អែកទាំងស្រុងទៅលើការបញ្ចូលរបៀបថ្មី និងក្ដីសុបិនជាប្រភពអាជីវកម្មតែមួយមុខរបស់លោកប៉ុណ្ណោះទេ។ នៅពេលលោក ហ្គេត និងដៃគូរបស់លោកម្នាក់ទៀតគឺលោក Paul Allen បានសរសេរកំណែប្រែ (version) ដំបូងនៃប្រព័ន្ធមូលដ្ឋាន Microsoft នោះ លោក ហ្គេត បានឈប់រៀនពីសាកលវិទ្យាល័យ ហាវើដ ហើយបានធ្វើដំណើរទៅទីក្រុងញូវម៉ិកស៊ីកូ និងបានធ្វើការជាមួយក្រុមហ៊ុនឈ្មោះ MITS ដោយទៅជាមួយនឹងក្ដីសង្ឃឹមថានឹងធ្វើឲ្យប្រព័ន្ធមូលដ្ឋាននេះមានស្ដង់ដារ។ ក្រោយមក អ្នកទាំងពីរនេះបានខិតខំធ្វើឲ្យប្រព័ន្ធនេះខិតទៅជិតក្រុមហ៊ុនបង្កើតប្រព័ន្ធប្រតិបត្តិការ PC ឈានមុខគេគឺប្រព័ន្ធស្រាវជ្រាវឌីជីថុល។ ពីព្រោះឱកាសដែលអាចជោគជ័យបានរបស់ Microsoft នោះគឺមានទំនាក់ទំនងផ្ទាល់ជាមួយប្រព័ន្ធស្រាវជ្រាវឌីជីថុលរបស់ក្រុមហ៊ុន IBM។ អ្វីដែលលោកសម្រេចជោគជ័យទៅបានគឺ ដោយសារតែលោកដាក់វិន័យខ្លួនឯង និងដាក់ខ្លួនក្នុងទីតាំងយុទ្ធសាស្ត្រដែលត្រូវប្រឹងប្រែងសម្រេចឱ្យបាន ហើយលោកបានត្រៀមទទួលយកហានិភ័យផ្សេងៗរួចជាស្រេច ពោលគឺមិនរង់ចាំការសម្រេចក្ដីសុបិនទាំងងងឹតងងល់នោះទេ។

២) លោក ហ្គេត មានមិត្តភ័ក្ដិ និងដៃគូត្រូវចំកន្លែង។ លោកមិនមែនជាមនុស្សប្រភេទខ្លាចខ្មាសគេនោះទេ។ លោកតែងតែរកឃើញចំណុចចន្លោះប្រហោងនៅក្នុងទីផ្សារ ដោយស្វែងរកវិធីដើម្បីបំពេញចន្លោះប្រហោងនោះ។ លោកបានដាក់ប្រព័ន្ធ Microsoft នេះឲ្យស្ថិតនៅក្រោមកម្មវិធី MITS ដែលជាក្រុមហ៊ុនអាចនិយាយបានថាជាដៃគូដំបូងរបស់លោក និងបានធ្វើការក្នុងស្ថានភាពជាដៃគូដ៏សំខាន់មួយជាមួយប្រព័ន្ធស្រាវជ្រាវឌីជីថុល។

៣) លោក ហ្គេត ជាសហគ្រិនដ៏មានការប្ដេជ្ញាចិត្តមួយរូបដោយលោកតែងតែជួយធ្វើឲ្យក្រុមដៃគូរបស់លោកទទួលជោគជ័យតាមបំណងរបស់ពួកគេមិនមែនតាមបំណងរបស់លោកទេ។ នៅពេលលោកមាន MS-DOS ក្រុមហ៊ុន IBM មានកង្វល់ជាខ្លាំងចំពោះការកំណត់ពេល។ ក្រុមមន្ត្រីប្រតិបត្តិនៅក្រុមហ៊ុន IBM បានត្រៀមខ្លួនរួចជាស្រេចក្នុងការបញ្ឈប់គម្រោង PC ជាមួយក្រុមហ៊ុន Microsoft ដោយទើបតែបានរយៈពេលពីរបីខែប៉ុណ្ណោះក្នុងការបង្កើតកម្មវិធីសូហ្វវែរតាមតម្រូវការ។ ដំណោះស្រាយគឺថា ក្រុមហ៊ុន Microsoft បានទិញសិទ្ធិប្រើប្រព័ន្ធប្រតិបត្តិការដែលបង្កើតដោយក្រុមហ៊ុនមួយមកពីទីក្រុងសេអាថុល និងបង្កើតប្រព័ន្ធ MS-DOS ឲ្យនៅលើគេ។ បើគ្មានប្រព័ន្ធនេះទេ ក្រុមហ៊ុន Microsoft នឹងត្រូវការពេលពេញមួយឆ្នាំដើម្បីបង្កើតប្រព័ន្ធប្រតិបត្តិការចាប់ពីដើមទីមកម្ល៉េះ។

ប្រភព៖ BusinessInsider និង The BNews