គតិបណ្ឌិត

ស្ថាបនិក​ LinkedIn បង្ហាញ​យុទ្ធសាស្ត្រ ​ធ្វើ​​យ៉ាងម៉េច​គ្រប់គ្រង​​​​ក្រុមហ៊ុន​​ឲ្យ​​មាន​តម្លៃ


ការងារ​ដ៏​ល្អ​មួយ​ដែល​​បុគ្គលិក​ម្នាក់​​ធ្លាប់​ធ្វើ​ជា​មួយ​ក្រុមហ៊ុន​មួយ​ត្រូវ​បាន​បាត់បង់ ហើយ​ទំនុកចិត្ត ឬ ទំនាក់ទំនង​រវាង​ប្រធាន​ក្រុមហ៊ុន​ និង ​បុគ្គលិក​នោះ​​ក៏​សាបរលាប​តាម​នោះ​ដែរ។ ក្រុមហ៊ុន​បាន​ស្វាគមន៍​បុគ្គលិក​ថ្មី​ដែល​មាន​សមត្ថភាព​ចូល​បម្រើ​ការងារ តែ​​អាច​បណ្តេញ​​​​ចេញ​ទៅវិញ​​ដោយ​ហេតុផល​ណា​មួយ។

បុគ្គលិក​ថ្មី​​ជា​ទូទៅ​បង្ហាញ​ទំនុកចិត្ត និង ភាព​ស្មោះត្រង់​ចំពោះ​ក្រុមហ៊ុន​របស់​​ខ្លួន ប៉ុន្តែ​នឹង​ចាកចេញ​​ភ្លាមៗ​ប្រសិន​បើ​ដៃគូ​ប្រកួតប្រជែង​ក្រុមហ៊ុន​របស់​ខ្លួន​​ផ្តល់​ឱកាស​ការងារ​​ល្អ​ប្រសើរ​ជាង​នេះ​ឲ្យ​បុគ្គលិក​ថ្មី​នោះ។

ទាំង​នេះ​ ជា​បញ្ហា​​​កើត​មាន​ជារឿយៗ​ ដែល​នឹង​ត្រូវ​បកស្រាយ​ដោយ​លោក Reid Hoffman ស្ថាបនិក​រួម​​​ក្រុមហ៊ុន ​​​​​LinkedIn​ របស់​អាមេរិក​។ មាន​អាយុ​ ៤៧​ឆ្នាំ មហាសេដ្ឋី​​​នៃ​ក្រុមហ៊ុន​បណ្ដាញ​សង្គម​ដ៏​​មាន​ប្រជាប្រិយភាព​មួយ​នេះ​​​មាន​ប្រាក់​​ក្នុង​ដៃ​ចំនួន​ ៣,១ ពាន់​លាន​ដុល្លារ​នៅ​ក្នុង​ឆ្នាំ​២០១៤ ​នេះ។ ​

​​ប្រែក្លាយ​ពី​ក្រុមហ៊ុន​​​តូច​ទៅ​​ជា​ក្រុមហ៊ុន​ធំ​បាន​ចំណូល​រាប់​រយ​លាន​ដុល្លារ​នៅ​​ពេល​នេះ មិនមែន​ជា​រឿង​ចៃដន្យ​នោះ​ទេ​សម្រាប់​​លោក។ ហេតុដូច្នេះ​ហើយ នេះ​ជា​អ្វី​ដែល​សហគ្រិន ឬ ក្រុមហ៊ុន​​នានា​​គួរ​ស្វែងយល់​ពី​យុទ្ធសាស្ត្រ​​គ្រប់គ្រង​ល្អៗ​​​មួយ​ចំនួន​​របស់​​លោក​​ពី​ការ​កសាង​ទំនុកចិត្ត​ និង​គុណ​តម្លៃ​ទៅវិញ​ទៅ​មក​រវាង​បុគ្គលិក និង​ក្រុមហ៊ុន។ តើ​អ្វី​ទៅ​ជា​យុទ្ធសាស្ត្រ​ល្អៗ​​​​​​​​របស់​គាត់?

១. ភាព​ស្មោះត្រង់​រវាង​បុគ្គលិក និង ក្រុមហ៊ុន
ឧទាហរណ៍​ថា បុគ្គលិក​ម្នាក់​​​បាន​ឈានជើង​ចូល​ទៅ​​​​ធ្វើ​ការ​នៅ​ក្រុមហ៊ុន​ថ្មី​មួយ។ គេ​អាច​សង្កេត​ឃើញ​ថា អ្នក​គ្រប់គ្រង​នឹង​សម្ដែង​ការ​ស្វាគមន៍​ការ​មក​​ដល់​​របស់​​បុគ្គលិក​ថ្មី​​នោះ​ក្នុង​ក្តី​រំពឹង​​ថា បុគ្គលិក​ម្នាក់​នោះ​​នឹង​​បម្រើ​ការងារ​​ឲ្យ​ខ្លួន​ជា​ច្រើន​ឆ្នាំ​ទៅ​មុខ​ឲ្យ​អស់​ពី​សមត្ថភាព។

ចំពោះ​​បុគ្គលិក​ថ្មី​​វិញ​ ពិត​ជា​ច្បាស់​ណាស់​ដែល​ថា ត្រូវ​តែ​បង្ហាញ​ទំនុកចិត្ត និង​ភាព​ស្មោះត្រង់​ចំពោះ​​អ្នក​គ្រប់គ្រង​​របស់​ខ្លួន ​ដែរ។ ប៉ុន្តែ អ្នក​គ្រប់គ្រង​បាន​បញ្ជូន​​បុគ្គលិក​ម្នាក់​នោះ​​​ទៅ​ជួប​រដ្ឋបាល(HR) ដើម្បី​ចុះ​កិច្ចសន្យា​​​សាកល្បង​ការងារ (Probation) ក្នុង​រយៈ​ពេល​៣​ខែ​ជា​មុន​សិន។ បន្ទាប់​​ពី​៣ ខែ​បាន​បញ្ចប់ បុគ្គលិក​នោះ​នឹង​​ក្លាយ​ជា​បុគ្គលិក​ពេញ​សិទ្ធិ​ដែល​អាច​នឹង​​ត្រូវ​បណ្តេញ​ចេញ​គ្រប់ពេល​ដោយ​ហេតុផល​ណា​មួយ។

នៅ​ក្នុង​ករណី​មួយ​ដែល​បុគ្គលិក​ម្នាក់​នោះ​​មាន​​អារម្មណ៍​ថា ខ្លួន​​ហាក់​មិន​​​មាន​បទពិសោធន៍​​​ជ្រៅជ្រះ​លើ​ការងារ​ថ្មី​នេះ​ទាល់តែសោះ បញ្ហា​មួយ​នឹង​​កើត​មាន​ឡើង។ បន្ទាប់​មក​ ​​អ្នក​គ្រប់គ្រង​បាន​​លើកឡើង​​ថា ខ្លួន​​ត្រូវ​ការ​បុគ្គលិក​ដែល​ស្មោះត្រង់ និង​មាន​ការ​ប្ដេជ្ញា​ខ្ពស់​មិន​ទាមទារ​ជំនាញ​វិជ្ជាជីវៈ​ខ្ពស់​នោះ​ឡើយ​។ ​បុគ្គលិក​ម្នាក់​នោះ​​​ក៏​ឆ្លើយតប​ទៅវិញ​ថា ខ្លួន​ជា​បុគ្គលិក​ស្មោះត្រង់។

ប៉ុន្តែ​ ​​​​ជា​ទូទៅ​គេ​សង្កេត​ឃើញ​ថា ទាំង​បុគ្គលិក​មាន​សមត្ថភាព និង បុគ្គលិក​​អសមត្ថភាព​​ អាច​ដើរ​ចេញ​ពី​ក្រុមហ៊ុន​នោះ​ នៅ​ពេល​ការងារ​​ល្អ​ថ្មី​មួយ​បាន​មក​ដល់។ មកដល់​ចំណុច​នេះ​គេ​បាន​រក​ឃើញ​ថា ​ការ​ទំនាក់ទំនង​រវាង​បុគ្គលិក និង​ ​​​ក្រុមហ៊ុន ឬ អ្នក​គ្រប់គ្រង​​​មួយ​ត្រូវ​បាន​បញ្ចប់​ គឺ​​​​​បណ្តាល​មក​ពី​ការ​​ទំនាក់ទំនង​​មួយ​ដោយ​គ្មាន​ភាព​ស្មោះត្រង់។ លទ្ធផល​នេះ​នឹង​ធ្វើ​ឲ្យ​ក្រុមហ៊ុន​នោះ​​បាត់បង់​​បុគ្គលិក​ល្អៗ​បន្ត​ទៅ​ទៀត។

ការងារ​របស់​បុគ្គលិក​​​​មាន​សមត្ថភាព​ក្តី អសមត្ថភាព​ក្តី​​ចាប់ផ្តើម​ធ្លាក់ចុះ ត្បិតអី​ពួកគេ​​​បង្វែរ​ចំណាប់អារម្មណ៍​របស់​ពួកគេ​​​ទៅ​​ស្វែង​រក​ការងារ​ថ្មី​មួយ​ដែល​មាន​ឱកាស​ច្រើន​ជាង​នេះ។ មក​ដល់​ចំណុច​នេះ អ្នក​គ្រប់គ្រង​ចាប់ផ្តើម​ពិចារណា​​​ឡើង​វិញ​ដោយ​​គិត​ថា គ្មាន​អ្នក​ណា​ម្នាក់​​ល្ងង់​ខ្លៅ​​អាច​ធ្វើ​ការ​ឲ្យ​ខ្លួន​រហូត​នោះ​ឡើយ។ នេះ​ហើយ​ជា​មូលហេតុ​ដែល​ទំនុកចិត្ត​នៅ​ក្នុង​អាជីវកម្ម​​នានា​ត្រូវ​​បាត់បង់។

អាជីវកម្ម​ដែល​គ្មាន​ទំនុកចិត្ត និង គ្មាន​ភាព​ស្មោះត្រង់​ គឺ​ជា​អាជីវកម្ម​ដែល​គ្មាន​ស្ថិរភាព​​​មិន​អាច​ធ្វើ​ដំណើរ​ក្នុង​រយៈ​ពេល​វែង​ឆ្ងាយ​​​​​ទៅមុខ​បាន​ឡើយ ហើយ​អាជីវកម្ម​ដែល​មិន​បាន​​វិនិយោគ​សម្រាប់​ថ្ងៃ​ស្អែក គឺ​ជា​អាជីវកម្ម​ដែល​​​ត្រៀមខ្លួន​សម្រាប់​​ដួល​រលំ។ ​

២. ការ​​ជ្រើសរើស​​បុគ្គលិក គ្រប់គ្រង និង រក្សា​បុគ្គលិក​ល្អ​

ច្បាប់​រើស​បុគ្គលិក គ្រប់គ្រង និង រក្សា​បុគ្គលិក​ល្អៗ​ឲ្យ​នៅ​បម្រើ​ការងារ​ក្នុង​​ក្រុមហ៊ុន​មួយ​មាន​ការ​ប្រែប្រួល​ជានិច្ច ពីព្រោះ​ថា ពិភពលោក​ក៏​ប្រែប្រួល​តាម​នោះ​ដែរ​ពី​មួយ​ថ្ងៃ​ទៅ​មួយ​ថ្ងៃ ហើយ​ក៏​គ្មាន​ក្រុមហ៊ុន​ណា​មួយ​សព្វថ្ងៃ​នេះ អាច​​ធ្វើ​ឱ្យ​​បុគ្គលិក​​ណា​ម្នាក់​ឲ្យ​រស់​នៅ​​​អស់​មួយ​ជីវិត​នោះ​ដែរ។

ក្រុមហ៊ុន​មិនមែន​ជា​គ្រួសារ​មួយ​ដែល​​​​​មាន​សមាជិក​គ្មាន​ទី​បញ្ចប់​នោះ​ឡើយ ហើយ​ក្រុមហ៊ុន​​​នោះ​ក៏​មិន​សុខចិត្ត​​​ជួល ​ឬ រក្សា​ទុក​បុគ្គលិក​​ខ្ជិលច្រអូស​មក​ធ្វើការ​​​ឲ្យ​ខ្លួន​​​រហូត​នោះ​ដែរ។

​ចុះ​អ្វី​ទៅ​ជា​ដំណោះស្រាយ?

បើ​អ្នក​ជា​បុគ្គលិក​ចម្លើយ​ដ៏​ត្រឹមត្រូវ​បំផុត​​នោះ​គឺ​ឈប់​គិត​ថា ក្រុមហ៊ុន​ជា​គ្រួសារ​របស់​អ្នក ហើយ​កុំ​ព្យាយាម​ធ្វើ​ខ្លួន​ជា​បុគ្គលិក​មួយ​ដែល​ឯករាជ្យ​​​មិន​គោរព​តួនាទី​របស់​ខ្លួន​។ ត្រូវ​​កសាង​​ទំនាក់ទំនង​​ធ្វើ​ការងារ​ជា​ក្រុម​(Team Work) និង បំពេញ​តួនាទី​របស់​អ្នក​ជា​បុគ្គលិក​​ល្អ​ធ្វើ​ដំណើរ​ជា​មួយ​ក្រុមហ៊ុន​​របស់​អ្នក។

៣. ទំនាក់ទំនង​រវាង​បុគ្គលិក និង​ក្រុមហ៊ុន​ត្រូវ​កសាង​ឡើង​​តាម​រយៈ​ការ​ឲ្យ​តម្លៃ​គ្នា​ទៅវិញ​ទៅមក

ការ​ឲ្យ​តម្លៃ​​​រវាង​បុគ្គលិក និង ក្រុមហ៊ុន​អាច​កើត​​មាន​ឡើង​តាម​រយៈ​​សមិទ្ធផល​ដែល​ទទួល​បាន។ បុគ្គលិក​ដែល​មាន​តម្លៃ​ គឺ​ជា​បុគ្គលិក​ដែល​ខិតខំ​ធ្វើ​ការ ដែល​ជា​កូនសោ​ដ៏​សំខាន់​​ជួយ​ឲ្យ​ក្រុមហ៊ុន​​មួយ​ទទួល​បាន​ជោគជ័យ ហើយ​ក្រុមហ៊ុន​មួយ​​ដែល​មាន​តម្លៃ គឺ​ជា​ក្រុមហ៊ុន​ដែល​មើល​ឃើញ​ពី​គុណសម្បត្តិ​របស់​បុគ្គលិក​។ ជា​លទ្ធផល​​ ទាំង​ក្រុមហ៊ុន និង បុគ្គលិក​មាន​សម្ព័ន្ធភាព​កាន់តែ​រឹងមាំ​ឡើង។ ​តើ​​សម្ព័ន្ធភាព​រឹងមាំ​នេះ​​​ត្រូវ​​ធ្វើ​​ឡើង​ដោយ​របៀបណា?

ក្រុមហ៊ុន​​មាន​គោលដៅ​រួម​មួយ​របស់​ខ្លួន​ដែល​មនុស្ស​​គ្រប់គ្នា​នៅ​ក្នុង​ក្រុមហ៊ុន​នោះ​ត្រូវ​តែ​ធ្វើ​ដំណើរ​ជាមួយ​គ្នា​ ដែល​នោះ​គឺ​ជា​ការ​សម្រេច​​ដល់​​គោលដៅ​​របស់​ខ្លួន​។ នៅ​ក្នុង​អាជីវកម្ម​ បុគ្គលិក អ្នក​គ្រប់គ្រង និង​ក្រុមហ៊ុន​ ត្រូវ​តែ​ប្ដេជ្ញា​ចិត្ត​​បំពេញ​បេសកកម្ម​ការងារ​របស់​ខ្លួន​ឲ្យ​អស់​ពី​លទ្ធភាព និង​មាន​មហិច្ឆតា​ខ្ពស់​បាញ់​ឆ្ពោះ​ទៅ​រក​គោលដៅ​តែ​មួយ​​នោះ។ តែ​ទន្ទឹម​នឹង​នេះ​ ពេលវេលា​ដ៏​​​​ជាក់លាក់​​មួយ​ក៏​ត្រូវ​កំណត់​ធ្វើ​ឡើង​ផង​ដែរ ហើយ​វា​នឹង​បញ្ជាក់​ថា អ្នកណា​ខ្លះ​នៅ​ក្នុង​ក្រុមហ៊ុន​នោះ​បាន​បំពេញ​បេសកកម្ម​​​បាន​យ៉ាង​ល្អ​ និង​មាន​គុណសម្បត្តិ​ច្រើន​ជាងគេ?

មក​ដល់​ចំណុច​នេះ មិនមែន​មានន័យ​ថា ក្រុមហ៊ុន​មួយ​ត្រូវ​​លើកតម្កើង​តែ​បុគ្គលិក​ឆ្នើម​​ ហើយ​ទម្លាក់​បន្តុះបង្អាប់​បុគ្គលិក​អន់​នោះ​ទេ តែ​ការ​សន្យា​​ឲ្យ​ច្បាស់លាស់​ក្នុង​ការ​​ជួយ​បណ្តុះបណ្តាល​ជំនាញ អប់រំ​ពី​​គន្លឹះ​ក្នុង​ការ​បំពេញ​​ការងារ​កែលំអ​ឲ្យ​បាន​ប្រសើរ​ជាង​មុន នឹង​ឆ្លុះ​បញ្ចាំង​ពី​តុល្យភាព​​ការងារ​របស់​ក្រុមហ៊ុន​ ដែល​នោះ​គឺ ក្រុមហ៊ុន​ក៏​ជោគជ័យ បុគ្គលិក​គ្រប់គ្នា​ក៏​ជោគជ័យ។

លោក Reid Hoffman បាន​បញ្ជាក់​ចុងក្រោយ​ថា ក្រុមហ៊ុន​មួយ​មិន​អាច​ឃាត់​បុគ្គលិក​របស់​ខ្លួន​ឲ្យ​នៅ​ធ្វើការ​ជា​រៀង​រហូត​នោះ​ទេ តែ​​ការ​ចែក​រំលែក​របស់​​ក្រុមហ៊ុន​​ដោយ​ការ​ទទួល​ខុសត្រូវ​​​តាម​​រយៈ​ការ ជួយ​ជ្រោមជ្រែង​បណ្តុះបណ្តាល​​ពួកគេ​​ឲ្យ​កាន់តែ​មាន​​ពន្លឺ​​ក្នុង​​អាជីព​ការងារ នឹង​ធ្វើ​ឲ្យ​ក្រុមហ៊ុន​នោះ​មាន​តម្លៃ​ពិតៗ​ជា​អមតៈ​៕

ប្រភព៖​ Businessinsider​ និង The BNews

0 comments:

Post a Comment

Powered by Blogger.