រឿងដែលអ្នកមិនគួរ បង្ខំប្តីអ្នកឲ្យធ្វើ

បើមិនចង់ឲ្យប្តីអ្នកធុញ សូមអ្នកកុំបង្ខំឲ្យប្តីអ្នក ធ្វើរឿងខាងក្រោមឲ្យសោះ បើពុំដូច្នោះទេ ប្តីអ្នក នឹងអាចចាកចេញពីអ្នក ទៅរកនារីដទៃ នៅថ្ងៃណាមួយជាមិនខាន។ តើមានរឿងអ្វីខ្លះដែលមិនគួរបង្ខំ?

1. អ្នកមិនត្រូវសួរយោបល់ស្វាមីអ្នកទេ នៅពេលដែលអ្នកចង់ទិញខោអាវ ឬចង់រើសខោអាវដើម្បីពាក់ ទៅចូលរួមកម្មវិធីណាមួយ ព្រោះប្តីអ្នកគ្មានពេលវេលា មកចំណាយលើរឿងឥតប្រយោជន៍ទាំងនេះ ហើយម្យ៉ាងទៀត គេជាមនុស្សប្រុស បើអ្នកសួរពីរឿងតុបតែងរបស់ស្រីៗច្រើន គេនឹងធុញជាមិនខានឡើយ។
2. អ្នកមិនត្រូវបង្ខំឲ្យគេ និយាយពាក្យថា គេស្រឡាញ់អ្នកគ្រប់ពេលឡើយ ព្រោះបើនិយាយច្រើន វាក្លាយជាឥតន័យ ហើយអ្នកក៏មិនដឹងថា គេនិយាយចេញពីចិត្តស្មោះឬអត់ ហើយវាថែមទាំងអាច ធ្វើឲ្យប្តីធុញទ្រាន់នឹងអ្នកជាខ្លាំង។
3. អ្នកមិនត្រូវបង្ខំឲ្យប្តីអ្នក ចូលរួមពិធីជួបជុំរបស់អ្នក ជាមួយនឹងមិត្តអ្នកទេ ព្រោះប្តីអ្នកមិនសូវមានសម្តី សម្រាប់និយាយលេងឡើយ ដោយសារតែមិត្តអ្នកសុទ្ធតែជាស្រីៗ។ ដូចនេះ នៅពេលដែលគេចូលរួមជាមួយអ្នក គេនឹងធុញជាមិនខាន។
4. អ្នកមិនត្រូវបង្ខំឲ្យស្វាមី ទៅលេងផ្ទះឳពុកម្តាយអ្នកទេ បើគេមិនចូលចិត្ត ព្រោះបើគេទៅដោយមិនសុខចិត្ត វាអាចបំផ្លាញមនោសញ្ចេតនាអ្នកទាំងពីរបាន អ្នកនឹងអាចឈ្លោះគ្នា ដោយសាររឿងតូចតាចទាំងនេះ។
5. អ្នកមិនត្រូវបង្ខំឲ្យគេ ដើរផ្សារជាមួយអ្នកឡើយ ព្រោះមនុស្សប្រុសភាគច្រើន មិនចូលចិត្តទេ ព្រោះគេយល់ថា វាជារឿងរបស់មនុស្សស្រី បើមនុស្សប្រុសដើរផ្សារ វាដូចជារឿងចំលែកខ្លាំងណាស់ ដូចនេះ បើគេមិននិយាយថាគេចង់ទៅ អ្នកមិនត្រូវហៅគេទៅទេ៕