មេដឹកនាំចលនានិស្សិតភូមា៨៨ អំពាវនាវឱ្យពលរដ្ឋបោះឆ្នោតជូនគណបក្សប្រឆាំង NLD

ក្រុមចលនានិស្សិតភូមា៨៨ ហែក្បួនអំពាវនាវឲ្យពលរដ្ឋភូមាបោះឆ្នោតជូនដល់គណបក្ស NLD (រូបថត៖ cbsnews.com)

មេដឹកនាំចលនានិស្សិតភូមា៨៨ ដែលធ្លាប់ជាប់ពន្ធនាគារដោយសារបុព្វហេតុដើម្បីប្រជាធិបតេយ្យ បានប្រកាសប្រាប់អ្នកគាំទ្រនិងពលរដ្ឋភូមា ត្រូវបោះឆ្នោតគណបក្សសម្ព័ន្ធប្រជាធិបតេយ្យ ដើម្បីឱ្យគណបក្សប្រឆាំងធំជាងគេនេះ ឈ្នះឆ្នោតដឹកនាំប្រទេស។

ប្រធានចលានានិស្សិត លោក Ko Ko Gyi បានថ្លែងដូចនេះនៅចំពោះមុខលោកស្រី អ៊ុងសាន សូជី ប្រធានគណបក្សសម្ព័ន្ធប្រជាធិបតេយ្យ NLD ក្នុងពេលលោកស្រីមកចូលរួមពិធីរំឭក៧០ នៃការគោរពវិញ្ញណក្ខន្ធវីរជន ដែលស្លាប់ដើម្បីជាតិពីការធ្វើបដិវត្តន៍រំដោះប្រទេសពីអាណានិគមអង់គ្លេស។

លោក Ko Ko Gyi បានប្រាប់ទីភ្នាក់ងារសារព័ត៌មាន Reuters ថា លោកនឹងជាបេក្ខជនម្នាក់ ក្នុងចំណោមមេដឹកនាំនិស្សិតជាច្រើននាក់ របស់ចលនានិស្សិតភូមា៨៨ សម្រាប់ការបោះឆ្នោតសភានៅខែវិច្ឆិកា ប៉ុន្តែលោកបញ្ជាក់ថា លោកគឺជាបេក្ខជនសម្រាប់គណបក្ស NLD របស់លោកស្រី អ៊ុងសាន សូជី។

ចលនានិស្សិតភូមា៨៨ គឺជាចលនាមួយដ៏ធំរបស់និស្សិតភូមា។ ក្រុមនេះធ្លាប់ត្រូវបានពួកយោធាបង្ក្រាប និងសម្លាប់រង្គាលនៅឆ្នាំ១៩៨៨ ក្នុងពេលពួកគេធ្វើបាតុកកម្មទាមទារបញ្ចប់របបពួកយោធា ហើយគ្រានោះមេដឹកនាំនិស្សិតជាច្រើន ត្រូវបានចាប់យកទៅឃុំខ្លួន ក្នុងនោះមានលោក Ko Ko Gyi ផងដែរ។

ការបោះឆ្នោតសភា ថ្ងៃទី៨ ខែវិច្ឆិកា ដែលមានគណបក្សនយោបាយចូលរួមជិត៧០ ហើយមានអ្នកមានសិទ្ធិបោះឆ្នោតជិត៣០លាននាក់ ត្រូវបានវាយតម្លៃថា ជាការព្រឹត្តិការណ៍បោះឆ្នោតមួយតាមផែនការកែទម្រង់ប្រទេស ប្រកបដោយប្រជាធិបតេយ្យ និងពហុបក្ស ប៉ុន្តែអ្នកវិភាគនយោបាយម្នាក់គឺលោក Yan Myo Thein និយាយថា ការប្រកាសរបស់មេដឹកនាំនិស្សិតរូបនេះ បានជាសូចនករមួយ ធ្វើឱ្យកម្លាំងគាំទ្ររបស់គណបក្ស NLD របស់លោកស្រី អ៊ុងសាន សូជី កាន់តែមានប្រជាប្រិយភាព ហើយអាចធ្វើឱ្យ NLD ឈានទៅរកការឈ្នះឆ្នោត។ ប៉ុន្តែលោកព្រមានថា លទ្ធភាពការផ្ទេរអំណាចពីពួកយោធាទៅគណបក្សឈ្នះឆ្នោត គឺពិបាកនឹងព្យាករទុកមុន៕

Source: VOD
សូមសរសេរមកលោក នួន បូរិន តាមរយៈ borinnoun@gmail.com