ប្រធានាធិបតីចិនព្រមានឧត្តមសេនីយ៍របស់លោក កុំឱ្យប្រព្រឹត្តអំពើពុករលួយនាំឱ្យអន្តរាយដល់គ្រួសារ

លោក ហ្ស៊ី ជិនភីង ប្រធានាធិបតីចិន (រូបថត៖ Time.com)

ប្រធានាធិបតីចិន ហ្ស៊ី ជិនភីង ដែលគេហៅថាជាមេដឹកនាំកែទម្រង់ បានព្រមានឧត្តមសេនីយ៍របស់លោកកុំឱ្យប្រព្រឹត្តអំពើពុករលួយ ប្រយ័ត្នគ្រោះថ្នាក់ទាំងគ្រួសារនិងសង្គម ហើយ ត្រូវមើលពីផលលំបាករបស់មន្ត្រីពុករលួយជាច្រើន ដែលកំពុងឃុំខ្លួននៅក្នុងពន្ធនាគារ។

លោក ហ្ស៊ី ជិនភីង បានថ្លែងព្រមានដូចនេះ នៅចំពោះមុខពួកមន្ត្រីយោធានៅទីក្រុង Changchun ភាគខាងជើងប្រទេសកាលពីថ្ងៃអាទិត្យម្សិលមិញ។

លោកប្រធានាធិបតី បានថ្លែងថា មានឧត្តមសេនីយ៍ជាច្រើន ហើយត្រូវបានកាត់ទោសករណីពុករលួយ ហើយមានអ្នកខ្លះស្លាប់ក្នុងពន្ធនាគារទៀតផង។

មិនមានតែឧត្តមសនីយ៍ដែលត្រូវចាប់ខ្លួន និងកាត់ទោសករណីពុករលួយប៉ុណ្ណោះទេ គឺមានមន្ត្រីជាន់ខ្ពស់គណបក្សកុម្មុយនីស្តចិនជាច្រើនទៀត ក៏ត្រូវបានកាត់ទោសផងដែរ ក្នុងនោះមានអភិបាលខេត្ត និងមន្ត្រីតាមក្រសួងស៊ីវិលរបស់រដ្ឋទៀត។

លោក ហ្ស៊ី ជិនភីង ដែលឡើងកាន់តំណែងតាមរយៈការចាត់តាំងរបស់គណបក្ស ត្រូវបានអ្នកសង្កេតការណ៍ហៅលោកថា ជាអ្នកនយោបាយកែទម្រង់ និងមានភាពហ្មត់ចត់ជាងមេដឹកនាំមុនៗ។

ច្បាប់ប្រឆាំងអំពើពុករលួយប្រទេស កំណត់ទោសពី២០ឆ្នាំទៅមួយជីវិត និងធ្ងន់ជាងនេះ គឺទោសប្រហារជីវិត៕

Source: VOD
សូមសរសេរមកលោក នួន បូរិន តាមរយៈ borinnoun@gmail.com