លោក វ៉ា គឹមហុង បដិសេធថា មិនមានផែនទីស

លោក វ៉ា គឹមហុង មន្ត្រីជាន់ខ្ពស់កិច្ចការព្រំដែនរបស់រដ្ឋាភិបាលកម្ពុជា ធ្វើសន្និសីទសារព័ត៌មានកាលពីម្សិលមិញ នៅទីស្តីការគណៈរដ្ឋមន្ត្រី ស្តីពីបញ្ហាព្រំដែន (រូបថត៖ ទេព សូនី)

មន្ត្រីជាន់ខ្ពស់កិច្ចការព្រំដែនរបស់រដ្ឋាភិបាលកម្ពុជា លោក វ៉ា គឹមហុង បដិសេធថាមិនមានផែនទីស ក្នុងការបោះបង្គោលព្រំដែនជាមួយកម្ពុជា-វៀតណាមនោះទេ។

លោក វ៉ា គឹម ហុង ប្រាប់ VOD នៅរសៀលថ្ងៃសុក្រនេះថា អ្នកសារព័ត៌មានមួយចំនួនប្រហែលជាស្តាប់ច្រឡំថា លោកបាននិយាយថាមានផែនទីស សម្រាប់បោះបង្គោលព្រំដែន។ លោកបញ្ជាក់ថា កាលពីម្សិលមិញនោះ លោកបាននិយាយពីនីតិវិធីក្នុងការយកផែនទីមកធ្វើកិច្ចការលើដីជាក់ស្តែង។ បែបនេះក្តីលោកបដិសេធថា លោកមិនបាននិយាយពីផែនទីសនោះទេ គឺនិយាយពីផែនទីអត់មានខ្សែព្រំដែន មានន័យថា អ្នកបច្ចេកទេសទាំងសងខាងគេយកទៅចម្លងពីផែនទីនៅអង្គការសហប្រជាជាតិខ្នាត ១/១០០ ០០០ (មួយលើមួយរយពាន់) សម្រាប់ធ្វើជាមូលដ្ឋានដាក់នៅលើផែនទីដែលអត់មានខ្សែ ដើម្បីផ្ទៀងផ្ទាត់លើដីជាក់ស្តែង។ លោកមានប្រសាសន៍ថា៖ «ពួកយើងអត់យល់អីទាំងអស់ ចេះតែយល់ថា ផែនទីអត់ខ្សែ[ជា]ផែនទីស ដូចភ្នំពេញប៉ុស្តិ៍ឆ្កួតដាក់នេះដាក់នោះស្រេចតែចិត្តវា វាអត់ដឹងខ្យល់អីសោះ អត់មានទេ ផែនទីអត់មានខ្សែព្រំដែនដើម្បីយើងយកគូសចំលងពីផែនទីបោន(ផែនទីតម្កល់នៅអង្គការសហប្រជាជាតិ) មកផែនទីហ្នឹង បើមានខ្សែហើយ យើងគូសចំលងយ៉ាងម៉េច វាមិនជាន់គ្នាហើយ?»។

តែកាលពីម្សិលមិញលោក វ៉ា គឹមហុង ថ្លែងក្នុងសន្និសីទថា ការធ្វើកិច្ចព្រំដែនគឺត្រូវការប្រើប្រាស់ផែនទីស ។ លោកបញ្ជាក់ថា៖ «នៅឆ្នាំ២០០៧ខ្ញុំសុំឲ្យវៀតណាម បោះពុម្ភផែនទី៦ផ្ទាំង ដើម្បីយកមកប្រើកិច្ចការហ្នឹង ខ្ញុំសូមជម្រាបថា ខ្ញុំឲ្យធ្វើហ្នឹងមានចែងក្នុងសន្ធិសញ្ញាបំពេញបន្ថែមឆ្នាំ២០០៥ រួចហើយថាយើងធ្វើព្រំដែនហ្នឹង គឺយើងត្រូវការផែនទីស ដើម្បីយើងគូសចម្លង ដើម្បីយកផែនទីបោន ១/១០០ ០០០ អាផែនទីព្រំដែន ដែលយើងសុំឲ្យវៀតណាមគូសចម្លងនេះ ជាផែនទីស ឥតមានខ្សែព្រំដែនទេ»។

សម្រាប់ប្រធានគណៈកម្មាធិការព្រំដែនប្រទេសកម្ពុជា ដែលមូលដ្ឋាននៅប្រទេសបារាំង លោក ស៊ាន ប៉េងសែ មានប្រសាសន៍ដោយសើចតិចៗ ហើយនិយាយថាតាមការយល់ដឹងរបស់លោក នៅតាមបណ្តាប្រទេសផ្សេងៗទៀតគឺមិនមានផែនទីសទេ គឺមានតែតំបន់ស នៅតាមព្រំដែនដែលមិនបានបោះបង្គោលកំណត់ជាក់លាក់។ លោកមានប្រសាសន៍ថា៖ «យី! អត់ដឹងដែរ ផែនទីស? មានតែតំបន់ស។ គាត់បញ្ចេញមកពីណាមកអាហ្នឹង? ខ្ញុំមិនដែលឮផែនទីសទេ ធ្លាប់ឮតែតំបន់ស»។

លោក វ៉ា គឹមហុង បានថ្លែងក្នុងសន្និសីទសារព័ត៌មានថាផែនទីដែលលោកចម្លងយកមកប្រើប្រាស់ដើម្បីបោះបង្គោលព្រំដែនជាមួយវៀតណាម គឺជាផែនទីសម័យសង្គមរាស្ត្រនិយម ដែលបានយកទៅតម្កល់ទុកនៅអង្គការសហប្រជាជាតិក្នុងឆ្នាំ១៩៦៤ ។

ប៉ុន្តែលោក ស៊ាន ប៉េងសែ អះអាងថា ការបោះបង្គោលព្រំដែនកម្ពុជាវៀតណាម នៅពេលបច្ចុប្បន្នគឺ ប្រើផែនទីដែលបង្កើតឡើងដោយវៀតណាម ។ លោក ស៊ាន ប៉េងសែ មានប្រសាសន៍ថា កម្ពុជាត្រូវយកផែនទីដែលតម្កល់នៅអង្គការសហប្រជាជាតិ និងទទួលស្គាល់ដោយអាណានិគមបារាំង និងត្រូវបានកំណត់ដោយរដ្ឋធម្មនុញ្ញកម្ពុជាគឺផែនទីដែលមានខ្នាត១/១០០.០០០ មកធ្វើការផ្ទៀងផ្ទាត់ជាថ្មីទៀត លើការបោះបង្គោលព្រំដែនកម្ពុជាវៀតណាមដែលស្ថិតក្នុងភាពចម្រូងចម្រាស៕

ប្រភព៖ ដោយ ឡាយ សាមាន | ថ្ងៃសុក្រ ទី3 កក្កដា 2015, 05:38 PM
http://vodhotnews.com
សូមសរសេរមកលោក ឡាយ សាមាន តាមរយៈ samean@vodhotnews.com