គណៈមេធាវីចោទមន្ត្រីសិទ្ធិមនុស្សល្បីឈ្មោះមួយរូបថារំលោភវិជ្ជាជីវៈមេធាវី

គណៈមេធាវីលើកឡើងថា ករណីមន្ត្រីឃ្លាំមើលសិទ្ធិមនុស្សល្បីឈ្មោះមួយរូប ស្នើឲ្យមេធាវីប្រគល់សំណុំរឿងទាំងអស់មកខ្លួន ដើម្បីពិនិត្យរកកំហុសក្នុងនីតិវីធីនៃសំណុំរឿង គឺរំលោភលើវិជ្ជាជីវៈមេធាវី។

លិខិតរបស់ប្រធានគណៈមេធាវីកម្ពុជា ដែល VOD ទទួលបាននៅថ្ងៃទី២៩ ខែកក្កដានេះ មានខ្លឹមសារថា ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា បានបង្គាប់ឲ្យមេធាវីដែលធ្វើការនៅសមាគមអាដហុក ប្រគល់សំណុំរឿងទាំងអស់ឲ្យលោក ដើម្បីធ្វើការត្រួតពិនិត្យរកកំហុសនីតិវិធីក្នុងសំណុំរឿង។ គណៈមេធាវីកម្ពុជាបានចោទថា ការស្នើនេះមានលក្ខណៈបង្គាប់បញ្ជា គឺជាការរំលោភបំពានលើឯករាជ្យនៃវិជ្ជាជីវៈមេធាវី និងការបង្ខំឲ្យមេធាវីបំពារបំពានលើការសម្ងាត់នៃវិជ្ជាជីវៈរបស់ ខ្លួន។

គណៈមេធាវីបានលើកយក មាត្រា៥៨ នៃច្បាប់ស្តីពីលក្ខន្តិកៈមេធាវី និងមាត្រា១៩ នៃក្រមសីលធម៌មេធាវី ដែលចែងថា “ មេធាវីត្រូវរក្សាការសម្ងាត់ជាដាច់ខាត ហើយមេធាវីពុំអាចបំពារបំពានលើការសម្ងាត់នៃវិជ្ជាជីវៈបានឡើយ ហើយក៏មិនអាចត្រូវបានបង្ខំឲ្យបំពារបំពានលើការសម្ងាត់របស់ខ្លួន ទោះបីនៅមុខតុលាការក៏ដោយ” ។

ឆ្លើយតបនឹងករណីនេះ ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា បដិសេធថា សមាគមអាដហុកមិនបានរំលោភវិជ្ជាជីវៈមេធាវីនោះទេ ដោយលោកលើកឡើងថា ស្ថាប័ននេះគ្រាន់តែស្នើទៅមេធាវី៦រូបដែលបម្រើការឲ្យអាដហុក ត្រូវផ្តល់របាយការណ៍ និងឯកសារនៃសំណុំរឿងមួយចំនួនដូចជា ការរំលោភសិទ្ធិមនុស្ស ដីធ្លី ជាដើម។ លោកបន្តថា មេធាវីទាំងនោះបានការពារក្តីឲ្យជនរងគ្រោះ ហើយសមាគមចង់តាមដានពីដំណើរការឡើងសវនាការ និងផ្តល់ថវិកាសម្រាប់ការពារក្តីឲ្យជនរងគ្រោះ។ លោកបញ្ជាក់ថា៖ "នេះ ជាឯកសាររបស់អាដហុក អ៊ីចឹងត្រូវមកតម្កល់ទុកក្នុងសមាគមអាដហុក ព្រោះសមាគមអាដហុកជាអ្នកទទួលខុសត្រូវ ទៅលើការបាត់បង់ឯកសាររបស់ជនរងគ្រោះទាំងអស់ហ្នឹង ក៏ប៉ុន្តែសមាគមអាដហុកមិនមែនមានតួនាទីទៅឆែកសំណុំរឿង ដែលមេធាវីបានការពារក្តីទេ ព្រោះយើងមើលតែរបាយការណ៍សកម្មភាពមេធាវី ថាតើបានទៅការពារក្តីប៉ុន្មានថ្ងៃ ចំណាយប៉ុន្មាន ដើម្បីយើងសងទូទាត់លុយឲ្យគេវិញ អាហ្នឹងរឿងធម្មតា។ ហើយរឿងទាក់ទងសំណុំរឿងដែល Copy(ចំលង)នៅក្នុងតុលាការ អាហ្នឹងយើងមិនដែរទៅលូកលាន់ទេ" ។

លោក នី ចរិយា បញ្ជាក់ថា លោកសោកស្តាយចំពោះគណៈមេធាវីដែលធ្វើការផ្សព្វផ្សាយព័ត៌មាននេះ ដោយមិនបានសួរយោបល់ឲ្យបានច្បាស់លាស់ពីសមាគមអាដហុក។ យ៉ាងណាក៏ដោយ លោកថា នៅថ្ងៃនេះសមាគមអាហុកនេះ ធ្វើលិខិតមួយផ្ញើទៅគណៈមេធាវី ដើម្បីបកស្រាយលើបញ្ហានេះ។

VOD មិនអាចសុំការបំភ្លឺបន្ថែមពីប្រធានគណៈមេធាវីនៃព្រះរាជាណាចក្រកម្ពុជា លោក ប៊ុន ហុន បានទេនៅថ្ងៃនេះ ដោយទូរស័ព្ទចូលច្រើនដងមិនមានអ្នកទទួល។

មាត្រា៨៣ និង១២១ នៃក្រមនីវិធីព្រហ្មទណ្ឌ មានខ្លឹមសារថា ជាកាតព្វកិច្ចចំពោះបុគ្គលទាំងឡាយដែលចូលរួមក្នុងការស៊ើបអង្កេត និងការស៊ើបសួរ ហើយក្នុងនោះមានមេធាវីដែរ ត្រូវរក្សាការសម្ងាត់នៃវិជ្ជាជីវៈ ប៉ុន្តែរាល់ការបំពារបំពានលើការសម្ងាត់នៃវិជ្ជាជីវៈខាងលើ នឹងត្រូវផ្តន្ទាទោសតាមមាត្រា៣១៤នៃក្រមព្រហ្មទណ្ឌ ដាក់ពន្ធនាគារពី១ខែទៅ១ឆ្នាំ និងពិន័យជាប្រាក់ពី១០ម៉ឺនរៀល ទៅ២លានរៀល៕

ប្រភព៖ VOD
សូមសរសេរមកលោក ណាត សុភាព តាមរយៈ sopheap@vodhotnews.com