តំណាងរាស្រ្តបក្សប្រឆាំងថាមិនបានដើរជាន់ផែនទី តែមន្រ្តីរដ្ឋាភិបាលថាមានចេតនាដើរជាន់

តំណាងរាស្រ្តគណបក្សសង្រ្គោះជាតិ លោក អ៊ុំ សំអាន

តំណាងរាស្រ្តគណបក្សសង្រ្គោះជាតិ លោក អ៊ុំ សំអាន បានបដិសេធថាលោកមិនបានដើរជាន់ផែនទីនៅទីស្តីការគណៈរដ្ឋមន្រ្តី ដូចការចោទប្រកាន់ និងការចុះផ្សាយនៅលើសារព័ត៌មានក្នុងស្រុកនោះទេ។

លោក អ៊ុំ សំអាន នៅថ្ងៃសុក្រនេះ បានផ្ញើលិខិតពីរច្បាប់ទៅកាសែតរស្មីកម្ពុជា និងវេបសាយCEN ដោយស្នើឲ្យនិពន្ធនាយកសារព័ត៌មានទាំងពីរកែតម្រូវអត្ថបទដែលថាតំណាងរាស្រ្តគណបក្សប្រឆាំងយកជើងជាន់ផែនទី។

លោក អ៊ុំ សំអាន បញ្ជាក់ក្នុងលិខិតនោះថា«ខ្ញុំមិនបានយកជើងជាន់ផែនទីដែលដាក់បង្ហាញនៅទីស្តីការគណៈរដ្ឋមន្រ្តីកាលពីម្សិលមិញ ដូចការចុះផ្សាយរបស់សារព័ត៌មានរស្មីកម្ពុជានោះទេ»។ លោកបន្តថាលោកបានចូលរួមសង្កេតមើលការបង្ហាញផែនទីរបស់ប្រធានគណៈកម្មាធិការកិច្ចការព្រំដែន លោក វ៉ា គឹមហុង ដោយគ្រានោះ លោក វ៉ា គឹមហុង បានប្រកាសតាមមេក្រូដោយមិនសំដៅចំពោះនរណាម្នាក់នោះទេថា«ប្រយ័ត្នជាន់ផែនទី ព្រោះផែនទីមានតែមួយសន្លឹកនេះទេ»។

នៅថ្ងៃនេះ អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានសម្តែងការសោកស្ដាយចំពោះ លោក អ៊ុំ សំអាន។ លោកបានសរសេរនៅលើហ្វេសប៊ុករបស់ខ្លួនថា«ខ្ញុំ ផៃ ស៊ីផាន សូមសម្ដែងនូវការសោកស្ដាយចំពោះឥរិយាបថប្រកបដោយភាពមិនសមរម្យរបស់អ្នកតំណាងរាស្រ្ត អ៊ុំ សំអាន មណ្ឌលសៀមរាបរបស់គណបក្សសង្រ្គោះជាតិ បានយកជើងជាន់ដោយចេតនាលើផែនទីផ្លូវការដែលជាមរតករបស់ព្រះបរមរតនកោដ្ឋ ជាទីសក្ការៈ ជាមួយនិងក្ដីប្រកាសមិនទទួលស្គាល់ផែនទីផ្លូវការ ដែលបានតម្កល់នៅអង្គការសហប្រជាជាតិ ដោយអះអាងបន្ថែមថាផែនទីជាផ្លូវការនេះ គូសដោយភាគីវៀតណាម»។

គួរបញ្ជាក់ថា កាលពីថ្ងៃព្រហស្បតិ៍ ប្រធានគណៈកម្មាធិការព្រំដែនកម្ពុជា លោក វ៉ា គឹមហុង បានរៀបចំសន្និសីទសារព័ត៌មានមួយតាមបញ្ជារបស់លោកនាយករដ្ឋមន្រ្តី ហ៊ុន សែន ដើម្បីបង្ហាញផែនទីកំណត់បង្គោលព្រំដែន ដែលបក្សប្រឆាំងចោទថារដ្ឋាភិបាលប្រើផែនទីក្លែងក្លាយ៕

ប្រភព៖ ដោយ៖ ស៊ុន ណារិន | ថ្ងៃសុក្រ ទី3 កក្កដា 2015 http://vodhotnews.com

សរសេរមកកាន់លោក ស៊ុន ណារិន តាមរយៈsun_narin@vodhotnews.com