តំណាងរាស្ត្របក្សប្រឆាំងគ្រោងដាក់លិខិតទៅសភាទាមទារឲ្យលោក ឈាង វុន សុំទោស

តំណាងរាស្ត្រ គណបក្សប្រជាជនកម្ពុជា លោក ឈាង វុន (ឆ្វេង) និងតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ផ្ដល់បទសម្ភាសន៍ដល់អ្នកកាសែតនាវិមានរដ្ឋសភា កាលពីថ្ងៃទី១ ខែកក្កដា ឆ្នាំ២០១៥។ RFA

តំណាងរាស្ត្រគណបក្សសង្គ្រោះជាតិ មណ្ឌលសៀមរាប លោក អ៊ុំ សំអាន គ្រោងដាក់លិខិតទៅប្រធានរដ្ឋសភា លោក ហេង សំរិន នៅសប្ដាហ៍ក្រោយ សុំឲ្យព្រមានលោក ឈាង វុន អ្នកនាំពាក្យរដ្ឋសភា និងទាមទារឲ្យសុំទោសជាសាធារណៈ។

លោក អ៊ុំ សំអាន បានប្រាប់វិទ្យុអាស៊ីសេរី នៅថ្ងៃទី៤ ខែកក្កដា ថា លិខិតដែលលោកនឹងដាក់ជូនប្រធានរដ្ឋសភា លោក ហេង សំរិន គឺជុំវិញទង្វើរបស់លោក ឈាង វុន បានបណ្ដេញលោកមិនឲ្យផ្ដល់បទសម្ភាសន៍ដល់អ្នកកាសែតនៅក្នុងបរិវេណមន្ទីររដ្ឋសភា និងហៅសន្តិសុខឲ្យនាំខ្លួនអ្នកសារព័ត៌មានចេញពីមន្ទីររដ្ឋសភា កាលពីថ្ងៃទី១ ខែកក្កដា កន្លងទៅ។

តំណាងរាស្ត្រគណបក្សសង្គ្រោះជាតិ រូបនេះ ចាត់ទុកទង្វើរបស់លោក ឈាង វុន ថា ជាការរំលោភបំពានសិទ្ធិសេរីភាពការងាររបស់តំណាងរាស្ត្រក្នុងការផ្ដល់ព័ត៌មានទៅពលរដ្ឋ និងអ្នកសារព័ត៌មានដែលលោកបានបណ្ដេញចេញផងដែរ។

លោកសង្ឃឹមថា លោក ឈាង វុន នឹងមានភាពក្លាហានហ៊ានសុំទោសលោក និងអ្នកសារព័ត៌មានជាសាធារណៈ៖ «រឿងនេះ លោក ឈាង វុន ត្រូវតែហ៊ានសុំទោសខ្ញុំ និងអ្នកសារព័ត៌មានជាសាធារណៈ ព្រោះទង្វើរបស់គាត់មិនត្រឹមត្រូវ ហើយខ្ញុំចង់ឲ្យប្រធានសភា ដាក់ទោស ធ្វើឲ្យលោក ឈាង វុន រាងចាល ដើម្បីជាការព្រមានដល់មន្ត្រីរដ្ឋាភិបាលដទៃទៀត ឲ្យចេះគោរពសិទ្ធិ»។

ជុំវិញបញ្ហានេះ កាលពីថ្ងៃទី១ ខែកក្កដា កន្លងទៅ ក្រោយមានហេតុការណ៍នេះភ្លាមៗ គេបានឃើញលោក ឈាង វុន ក៏បានផ្ញើលិខិតមួយច្បាប់ទៅលោក ហេង សំរិន ប្រធានរដ្ឋសភា ថាការដែលលោក អ៊ុំ សំអាន ចចេសចង់ផ្ដល់បទសម្ភាសន៍នោះ ជាឥរិយាបថរឹងរូសចង់រករឿង ធ្វើឲ្យមានបញ្ហាលើការអនុវត្តច្បាប់ និងសន្តិសុខផ្ទៃក្នុងរដ្ឋសភា។

ចំណែកឯក្លឹបអ្នកកាសែតកម្ពុជា ក៏បានចេញសេចក្ដីថ្លែងការណ៍ដោយចាត់ទុកតំណាងរាស្ត្រគណបក្សប្រជាជនកម្ពុជា លោក ឈាង វុន ដែលបានបណ្ដេញអ្នកកាសែតដែលកំពុងបំពេញតួនាទីតាមវិជ្ជាជីវៈនោះ គឺជាការរំលោភបំពានយ៉ាងធ្ងន់ធ្ងរលើសិទ្ធិសេរីភាពរបស់អ្នកកាសែត ដែលមានចែងក្នុងច្បាប់ស្ដីពីរបបសារព័ត៌មាននៃព្រះរាជាណាចក្រកម្ពុជា៕

ប្រភព៖ ដោយ អ៊ុំ រង្សី 2015-07-04

RFA