មូលនិធិទ្រទ្រង់ទូរទស្សន៍ព្រះអាទិត្យទទួលបាន ២៤៥ ០០០ដុល្លារ

ទូរទស្សន៍ព្រះអាទិត្យ(រូបភាពពីគេហទំព័រគណបក្សសង្គ្រោះជាតិ http://www.nationalrescueparty.org/)

មន្ត្រីបក្សប្រឆាំងអះអាងថា មូលនិធិសម្រាប់ទ្រង់ទ្រងទូរទស្សន៍ព្រះអាទិត្យ ទទួលបាន២៤៥ ០០០ដុល្លារអាមេរិកហើយ គិតត្រឹមថ្ងៃទី៤ខែកក្កដានេះ ខណៈទឹកប្រាក់សរុបដែលគណបក្សនេះត្រូវការដើម្បីបង្កើតទូរទស្សន៍គឺ៣លានដុល្លារ ។

អ្នកនាំពាក្យកណបក្សសង្គ្រោះជាតិ លោក យឹម សុវណ្ណ ប្រាប់VODតាមទូរស័ព្ទនៅថ្ងៃនេះថា គណបក្សសង្គ្រោះជាតិប្រមូលថវិកាសម្រាប់ទ្រង់ទ្រងទូរទស្សន៍ព្រះអាទិត្យបានជាងម្ភៃម៉ឺនដូល្លារហើយ គឹតចាប់ថ្ងៃដាក់ឲ្យពលរដ្ឋនានាទាំងក្នុង និងក្រៅប្រទេសចូលរូមចូលរួមធ្វើវិភាគទាន កាលថ្ងៃទី២៥ ខែមិថុនា ដល់ថ្ងៃទី៤ខែកក្កដា ឆ្នាំ២០១៤នេះ។

លោកបន្តថា ទូរទស្សន៍ព្រះអាទិត្យគឺជាទូរទស្សន៍របស់ប្រជាពលរដ្ឋ របស់សហគមន៍ មិនមែនជារបស់បក្សតែម្នាក់ឯងនោះទេ ។ លោកអះអាងថា ទូរទស្សន៍បក្សប្រឆាំងមួយនេះ នឹងផ្សព្វផ្សាយព័ត៌មានការពិត ឥតលម្អៀង ព័ត៌មានសង្គម ជាពិសេសផ្សព្វផ្សាយការអប់រំ ដែលឲ្យតម្លៃលើសង្គមខ្មែរ ។

យ៉ាងណាក៏ដោយលោក មន្ត្រីនាំពាក្យបក្សប្រឆាំងរូបនេះ អះអាងថាទូរទស្សន៍ព្រះអាទិត្យរបស់គណបក្សលោកនឹងដាក់ឲ្យដំណើរការចុងឆ្នាំ២០១៥នេះ ដោយអះអាងដដែលថា ថវិកា ឈានដល់ ៣ លានដុល្លារក្នុងពេល ៣ ខែ ខាងមុខទៀត ។

គណបក្សសង្គ្រោះជាតិ ដែលបានសម្រេចបង្កើតស្ថានីយទូរទស្សន៍របស់ខ្លួន គឺធ្វើឡើងតាមរយៈកិច្ចព្រមព្រៀងនយោបាយ ថ្ងៃ២២ ខែកក្ដដា ឆ្នាំ២០១៤ រវាងគណបក្សជាប់ឆ្នោតទាំងពីរគឺ គណបក្សប្រជាជនកម្ពុជា និងគណបក្សសង្គ្រោះជាតិ ដែលជាកិច្ចព្រមព្រៀងបញ្ចប់វិបត្តិនយោបាយ បន្ទាប់ពីការបោះឆ្នោតសភាអាណត្តិទី៥ ថ្ងៃ២៨ ខែកក្កដា ឆ្នាំ ២០១៣ ៕

ប្រភព៖ ដោយ៖ ថោ ស៊ីណា | ថ្ងៃសៅរ៍ ទី4 កក្កដា 2015

http://vodhotnews.com

សូមសរសេរមកលោក ថោ ស៊ីណា តាមរយៈ sina@vodhotnews.com