វិភាគ៖ អតីតបុរសខ្លាំងស្រីលង្កាទំនងនឹងដាក់ឲ្យប្រឈមបទឧក្រិដ្ឋជាច្រើន បើចាញ់ឆ្នោតម្ដងទៀត

លោក ម៉ាហ៊ីនដា រ៉ៃយ៉ាប៉ាសែក កាលពីនៅធ្វើជាប្រធានាធិបតីស្រីលង្កា (រូបថត៖ Reuters)

អតីតបុរសខ្លាំងស្រីលង្កា អាចនឹងត្រូវចោទប្រកាន់ពីបទឧក្រិដ្ឋកម្មជាច្រើន ករណីដែលលោកបានដឹកនាំប្រទេសរយៈពេល១០ឆ្នាំ ដែលក្នុងនោះរួមមាន បទឧក្រិដ្ឋកម្មប្រឆាំងមនុស្សជាតិ ករណីពុករលួយ និងបំពានអំណាចរដ្ឋជាដើម។

អតីតប្រធានាធិបតីស្រីលង្កា ម៉ាហ៊ីនដា រ៉ៃយ៉ាប៉ាសែក ជាមេដឹកនាំឈ្នះសង្គ្រាមស៊ីវិលលើសហគមន៍ខ្លាតាមិល ប៉ុន្តែអង្គការសិទ្ធិមនុស្សជាតិ និងអន្តរជាតិរកឃើញថា កងទ័ពរបស់លោកបានរំលោភសិទ្ធិមនុស្សយ៉ាងធ្ងន់ធ្ងរ ដោយសារកងទ័ពបានដុតលំនៅដ្ឋាន អ្នកស្រុកអស់រាប់ពាន់សម្លាប់អ្នកទោសសង្គ្រាម កែនកុមារឲ្យកាន់អាវុធ ធ្វើទារុណកម្ម និង ចាប់រំលោភស្ត្រីភេទជាដើម។

ក្រោយពីប្រទេសនេះបញ្ចប់សង្គ្រាមស៊ីវិល ដែលកើតឡើងជិតបីទសវត្ស កាលពីឆ្នាំ២០០៩ អង្គការសហប្រជាជាតិបានទាមទារឲ្យនាំខ្លួនពួកឧត្តមសេនីយ៍របស់លោក ម៉ាហ៊ីនដារ៉ៃយ៉ាប៉ាសែក មកប្រឈមមុខនឹងបទឧក្រិដ្ឋប្រឆាំងមនុស្សជាតិ និងឧក្រិដ្ឋកម្មសង្គ្រាម ដោយឲ្យស្ថិតនៅក្រោមតុលាការពិសេសមួយរបស់អង្គការសហប្រជាជាតិ ប៉ុន្ដែលោក ម៉ាហ៊ីនដារ៉ៃ យ៉ាប៉ាសែក បដិសេធហើយចាត់ទុកការទាមទាររបស់អង្គការពិភពលោកនេះ គឺជាការជ្រៀតជ្រែកចូលកិច្ចការផ្ទៃក្នុងប្រទេសស្រីលង្កា ហើយចាប់ពីពេលនោះមកតុលាការនេះមិនមានរូបរាងឡើយ។

នៅក្រោមការដឹកនាំរបស់ប្រធានាធីបតីថ្មី លោក ប៉ាទ្រី សេរីសេនា អង្គការសហប្រជាជាតិក៏បានជំរុញម្ដងទៀតឲ្យបង្កើតតុលាការឧក្រិដ្ឋកម្មសង្គ្រាមនេះឡើង ហើយនាំជនឧក្រិដ្ឋមកផ្ដន្ទាទោស ប៉ុន្ដែសមាជិកសភាភាគច្រើនរបស់លោក ម៉ាហ៊ីនដា រ៉ៃយ៉ាប៉ាសែក បោះឆ្នោតជំទាស់ដោយធ្វើឲ្យលោកប្រធានាធិបតីថ្មីនេះ រំលាយសភាដោយតម្រូវឲ្យមានការបោះឆ្នោតឡើងវិញ។

ការបោះឆ្នោតដែលគ្រោងធ្វើឡើងនៅខែសីហា ត្រូវគេរំពឹងថា ជាការត្រួសត្រាយផ្លូវឲ្យប្រធានាធីបតី សេរីសេនា បង្កើតតុលាការឧក្រិដ្ឋកម្មសង្គ្រាមនៅក្រោមកិច្ចសហការជាមួយអង្គការសហប្រជាជាតិ ប្រសិនបើគណបក្ស UNP របស់លោក ប៉ាទ្រី សេរីសេនា មានសំលេងច្រើននៅក្នុងសភា ហើយពេលនោះឧត្តមសេនីយ៍មួយចំនួន រួមទាំងលោក ម៉ាហ៊ីនដា រ៉ៃយ៉ាប៉ាសែក ផងដែរអាចនឹងត្រូវដកអភ័យឯកសិទ្ធិសភា ដើម្បីនាំមកប្រឈមមុននឹងបទល្មើសដែលបានប្រព្រឹត្ត។

អ្នកវិភាគម្នាក់ គឺលោក Sehan Semage និងជាសមាជិកសភាវ័យក្មេងនៃប្រទេសស្រីលង្កា បានផ្ដល់បទសម្ភាសន៍ខ្លីមួយ ឲ្យទីភ្នាក់ងារសារព័ត៌មាន Reuters ថាការបោះឆ្នោតសភាខែសីហា នឹងធ្វើឲ្យមានការប្រែប្រួលអំណាចរបស់ប្រធានាធិបតី សេរីសេនា ប៉ុន្ដែលោកព្រមានថា សង្គមស្រីលង្កាក៏ងាយបែកបាក់ដែរ ប្រសិនបើការបង្កើតសាលាក្ដីឧក្រិដ្ឋកម្មសង្គ្រាមធ្វើឡើងដោយមិនគិតអំពីការផ្សះផ្សារជាតិជាមុននោះ។

តែនៅជាមួយគ្នានេះ អ្នកវិភាគវ័យក្មេងមួយនេះនិយាយថា អតីតបុរសខ្លាំង ម៉ាហ៊ីនដា រ៉ៃយ៉ាប៉ាសែក ក៏ប្រឈមមុខនឹងឧក្រិដ្ឋកម្មមួយចំនួនទៀតដែរ ដូចជាករណីពុករលួយជាដើម។ លោកត្រូវបានរកឃើញថា កិបកេងមូលនិធិរបស់រដ្ឋជាង១០០០លានដុល្លារ ហើយខណៈនេះប្អួនប្រុសម្នាក់របស់លោកដែលធ្លាប់ជារដ្ឋមន្ត្រីហិរញ្ញវត្ថុ ត្រូវបានចាប់ឃុំខ្លួន ដោយសារតែកឹបកេងថវិការដ្ឋរាប់សិបលានដុល្លារអាមេរិក។

អ្នកវិភាគម្នាក់ទៀត លោក Kusal Perera នាយកមជ្ឈមណ្ឌលសង្គមប្រជាធិបតេយ្យ ដែលមានមូលដ្ឋាននៅក្រុងកូឡាំបូមើលឃើញថា ការបោះឆ្នោតខែសីហាបើមិនមានគណបក្សណាមួយឈ្នះឆ្នោតបានសំលេងភាគច្រើនទេនោះ គឺគណៈរដ្ឋមន្ត្រីនឹងត្រូវបង្កើតឡើងដោយរូបភាពនៃរដ្ឋាភិបាលចម្រុះ ហើយពេលនោះលោក ម៉ាហ៊ីនដា រ៉ៃយ៉ាប៉ាសែក ទំនងនឹងគេចផុតពីការកោះហៅឡើងតុលាការ។

សភាប្រទេសស្រីលង្កាមាន២២៥អាសនៈ រីឯគណបក្សដែលធ្លាប់ប្រកួតប្រជែងហើយទទួលបានអាសនៈគឺមានមិនដល់១០នោះទេ។ ការបោះឆ្នោតថ្ងៃ១៧ ខែសីហា គឺជាការបោះឆ្នោតសភា ហើយគណបក្សដែលឈ្នះឆ្នោតនឹងក្លាយជាគណបក្សដឹកនាំគណៈរដ្ឋមន្ដ្រី។

នៅក្នុងការបោះឆ្នោតសភាកាលពីឆ្នាំ២០១០ គណបក្សសម្ព័ន្ធសេរីរួបរួមប្រជាជន(UPFA) របស់អតីតប្រធានាធិបតី រ៉ៃយ៉ាប៉ាសែក ទទួលបាន១៤៤អាសនៈ គណបក្សកំពុងកាន់អំណាចរបស់នាយករដ្ឋមន្ត្រី Ranil Wickremesinghe និងប្រធានាធិបតី សេរីសេនា ទទួលបាន៦០អាសនៈ គណបក្សសម្ព័ន្ធជាតិតាមីល (TNA) ទទួល១៤អាសនៈហើយ គណបក្សសម្ព័ន្ធជាតិប្រជាធិបតេយ្យទទួលបាន៧អាសនៈ ៕

ប្រភព៖ VOD