តុលាការសម្រេចបញ្ជូនឧកញ៉ា សុខ ប៊ុន ទៅឃុំខ្លួននៅពន្ធនាគារព្រៃស

តុលាការសម្រេចបញ្ជូនឧកញ៉ា សុខ ប៊ុន ទៅឃុំខ្លួននៅពន្ធនាគារព្រៃស នៅរសៀលថ្ងៃសៅរ៍នេះ ជាប់ពាក់ព័ន្ធនឹងការប្រើហិង្សាលើអតីតពិធីការិនីទូរទ្សន៍ CTN កាលពីដើមខែកក្កដា ឆ្នាំ២០១៥នេះ។

គួរបញ្ជាក់ថា នៅព្រឹកថ្ងៃសៅរ៍នេះ ប៉ូលិសអន្តរជាតិ (ប៉ូលិសអាំងទែរប៉ូល) បាននាំខ្លួនលោកឧកញ៉ា សុខ ប៊ុន មកដល់ព្រលានយន្តហោះអន្តរជាតិភ្នំពេញភ្លាម ក៏បញ្ជូនទៅសាកសួរនៅសាលាដំបូងរាជធានីភ្នំពេញ។ បន្ទាប់ពីការសាកសួររយៈពេលជាង៤ម៉ោង នៅថ្ងៃទី១៨ ខែកក្កដានេះ តុលាការសម្រេចបញ្ជូនឧកញ៉ា សុខ ប៊ុន ឃុំខ្លួននៅពន្ធនាគារព្រៃសនៅរសៀលម៉ោង១និង២០នាទី ដោយចោទពីបទហិង្សាដោយចេតនាមានស្ថានទម្ងន់ទោស។

ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃលោក សុខ ខេមរិន្ទ ប្រាប់ VOD ថា លោក សុខ ប៊ុន ត្រូវបានបញ្ជូនទៅឃុំខ្លួននៅពន្ធនាគារព្រៃសបណ្តោះអាសន្នសិន តែតុលាការមិនទាន់សម្រេចផ្តន្ទាទោសនៅឡើយទេ។

ចំណាត់ការនេះ ធ្វើឡើងបន្ទាប់ពីរដ្ឋមន្ត្រីក្រសួងមហាផ្ទៃលោក ស ខេង និងលោកនាយករដ្ឋមន្ត្រីហ៊ុន សែន បានបញ្ជាឲ្យចាប់ខ្លួនឧកញ៉ា សុខ ប៊ុន ដោយចាត់ទុកករណីវាយលើស្ត្រីនេះបានជះឥទ្ធិពលខ្លាំងដល់សង្គមខ្មែរ និងប៉ះពាល់ដល់រដ្ឋាភិបាល ប្រសិនបើមិនមានការចាប់ខ្លួន ។

កាលពីថ្ងៃសប្តាហ៍មុន លោក សុខ ប៊ុន បានចេញលិខិតបំភ្លឺជាសាធារណៈមួយ ដោយសុំការអធ្យាស្រ័យពីក្រុមគ្រួសារកញ្ញាសាសា និងបានប្រកាសលាឈប់ពីតំណែងក្រុមហ៊ុនដែលលោកគ្រប់គ្រង ព្រមទាំងងារឧកញ៉ាដែលលោកបានទទួល ។ លិខិតឲ្យដឹងថា លោកសោកស្តាយចំពោះជម្លោះរវាងរូបលោកនិងកញ្ញាសាសាដែលបានកើតឡើងកាលពីថ្ងៃទី០២ ខែកក្កដា និងបានបង្កឲ្យមានរបួសទាំងសងខាង ។ លោកបន្តថា ជម្លោះនោះបានធ្វើឲ្យប៉ះពាល់ដល់កិត្តិយសរបស់កញ្ញាសាសា និងរូបលោកផ្ទាល់ ។ ក្នុងលិខិតនោះ លោក សុខ ប៊ុន បានប្រកាសជាសាធារណៈថា លោកសុំលាឈប់ពីប្រធានសមាគមវាយតម្លៃអចលនវត្ថុ និងផ្ទេរសិទ្ធិទាំងស្រុងទៅឲ្យក្រុមប្រឹក្សាភិបាលវិញ ។ លោក សុខ ប៊ុន ក៏បានប្រកាសលាឈប់ពីនាយកក្រុមហ៊ុនTEHO-SBG Development Co.,Ltd. និងប្រកាសសុំលាឈប់ពីងារឧកញ៉ាផងដែរ ។

យោងតាមលិខិតដដែល លោក សុខ ប៊ុន បានស្នើសុំចូលរួមជាវិភាគទានជួយព្យាបាលដល់កញ្ញាសាសាចំនួន១សែនដុល្លារ និងបានស្នើសុំការយោគយល់ឈប់ប្រកាន់ និងមិនសងសឹកពីក្រុមគ្រួសាររបស់កញ្ញាសាសា ។

គួរបញ្ជាក់ថាលោក សុខ ប៊ុន ជាប់ពាក់ព័ន្ធនឹងការប្រើហិង្សាមកលើកញ្ញាសាសា កាលពីយប់ថ្ងៃ១ឈានចូលព្រឹកថ្ងៃទី២ ខែកក្កដា ឆ្នាំ២០១៥។ ក្រោយពីហិង្សាកើតឡើងមានការបង្ហោះជាវីដេអូឃ្លីបលើបណ្តាញសង្គមហ្វេសប៊ុកជាបន្តបន្ទាប់៕

ប្រភព៖ VOD
សូមសរសេរមកលោក ឡាយ សាមាន តាមរយៈ samean@vodhotnwes.com