សហជីពថាច្បាប់ស្តីពីផ្ទះជួលនឹងជួយច្រើនដល់កម្មកររោងចក្រកាត់ដេរ

សហជីព និងកម្មករមួយចំនួនបានស្វាគមន៍ចំពោះសេចក្តីព្រាងច្បាប់ភតិសន្យាពិសេស ឬច្បាប់ជួលផ្ទះ ដោយចាត់ទុកថាច្បាប់នេះនឹងជួយដល់កម្មកររោងចក្រកាត់ដេរ។

ច្បាប់ភតិសន្យាពិសេសនឹងមិនអនុញ្ញាតឲ្យម្ចាស់ផ្ទះជួលដំឡើងថ្លៃផ្ទះសម្រាប់កម្មករ និស្សិត និងសិស្ស ដែលជួលផ្ទះ ក្នុងអំឡុងពេលពីរឆ្នាំនៃការជួលផ្ទះ និងផ្តល់សិទ្ធិឲ្យអ្នកជួលផ្ទះអាចឈប់ជួលពេលណាក៏បាន។

ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី មានប្រសាសន៍ថាលោកគាំទ្រទៅនឹងច្បាប់ទាំងឡាយណាដែលបម្រើផលប្រយោជន៍របស់កម្មករ។ លោកថាច្បាប់ភតិសន្យានេះនឹងផ្តល់ប្រយោជន៍សម្រាប់កម្មករ ប៉ុន្តែលោកថាច្បាប់នេះក៏ត្រូវតែផ្តល់ឱកាសទទួលបានផលចំណេញទាំងភាគីម្ចាស់ផ្ទះជួល និងកម្មករ។

លោកបន្ថែមថា«ការធ្វើច្បាប់ទាំងឡាយដែលធ្វើតម្រូវឲ្យកម្មករយើងគាំទ្រ នៅពេលដែលយើងគិតថាជាផលប្រយោជន៍ឲ្យកម្មករ ហើយក៏ជាប្រយោជន៍ចំពោះម្ចាស់ផ្ទះផង សម្រាប់ខ្ញុំ ខ្ញុំគិតថាការធ្វើច្បាប់ចំពោះកម្មករកម្មការិនីក្នុងការជួលផ្ទះហ្នឹងវាល្អហើយ ប៉ុន្តែយើងត្រូវទុកឱកាសសម្រាប់ឲ្យម្ចាស់ផ្ទះហ្នឹងទទួលបានផលពីការជួលផ្ទះហ្នឹងផងដែរ»។

លោក ជា មុនី ឲ្យដឹងដែរថាក្នុងច្បាប់នេះគួរតែមានបញ្ជាក់ពីការវាយតម្លៃប្រភេទបន្ទប់ជួលឲ្យសមទៅនឹងតម្លៃរបស់បន្ទប់ជួលនោះផងដែរ។

ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ច្បាប់នេះនឹងអាចទប់ស្កាត់ម្ចាស់ផ្ទះដំឡើងថ្លៃឈ្នួលផ្ទះតាមអំពើចិត្ត។ លោកថាទោះបីជាច្បាប់នេះហាក់មានការប៉ះពាល់ទៅដល់ទីផ្សារសេរីក្តី លោកថារដ្ឋមានសិទ្ធិអន្តរាគមន៍នៅពេលតម្លសណាមួយអាចធ្វើឲ្យប៉ះពាល់ដល់អ្នកមានចំណូលទាប។លោកបន្ថែមថា«ជាទូទៅយើងគាំទ្រឲ្យមានច្បាប់ហ្នឹងដើម្បីឲ្យអ្នកម្ចាស់ផ្ទះហ្នឹងកំណត់តម្លៃចេះតែតាមការនឹកឃើញ ហើយគាត់(ម្ចាស់ផ្ទះ)ក៏ត្រូវរៀបចំបន្ទប់ រៀបចំកន្លែងឲ្យមានស្តង់ដារអីត្រឹមត្រូវដែរ កុំឲ្យកន្លែងខ្លះរាល់ថ្ងៃហ្នឹង ផ្ទះជួលមានប៉ុន្តែអត់មានផ្លូវសុវត្ថិភាព ហើយកន្លែងអនាម័យអត់ល្អ ពេលមានភ្លើងឆេះអីទៅធ្វើឲ្យស្លាប់ដល់កម្មករ»។

កម្មការិនីនៅរោងចក្រអឹមវេ កញ្ញា ឈួន ណែត មានប្រសាសន៍ថាកញ្ញាពេញចិត្តទៅនឹងសេចក្តីស្នើច្បាប់នេះ ដោយកញ្ញាលើកឡើងថាសព្វថ្ងៃទំនិញនៅលើទីផ្សារកំពុងតែឡើងថ្លៃខ្ពស់ ហើយបើតម្លៃផ្ទះជួលឡើងថ្លៃទៀត នឹងធ្វើឲ្យកម្មករកាត់ដេរចំណាយប្រាក់កាន់តែច្រើន។ កញ្ញាបន្ថែមថា«ល្អត្រង់ថាឥឡូវទំនិញវាឡើងថ្លៃច្រើនអញ្ចឹង ហើយកម្មករបានប្រាក់ខែតិចៗដែរ បើសិនជាផ្ទះជួលឡើងថ្លៃអីអញ្ចឹងទៅគ្នាចំណាយច្រើអីច្រើនអញ្ចឹងទៅ គ្នាមិនបានផ្គត់ផ្គង់គ្រួសារច្រើនអញ្ចឹង»។

សេចក្តីស្នើច្បាប់ភតិសន្យាពិសេស មាន៤ជំពូក ចែកចេញ១១មាត្រា។ មាត្រា១នៃសេចក្តីស្នើច្បាប់នេះចែងថាច្បាប់នេះមានគោលបំណងធានាការពារ សិទ្ធិ និងផលប្រយោជន៍របស់ភតិបតី(ម្ចាស់ផ្ទះជួល) និងភតិកៈ(អ្នកជួលផ្ទះ) ដើម្បីស្ថិរភាពក្នុងជីវភាពរស់នៅសណ្តាប់ធ្នាប់ និងរបៀបរៀបរយសាធារណៈ។ ច្បាប់ភតិសន្យាពិសេសនេះអនុវត្តចំពោះភតិកៈជាកម្មករ សិស្ស និងនិស្សិត ដែលជួលអចលនវត្ថុក្នុងគោលបំណងស្នាក់នៅតែប៉ុណ្ណោះ ហើយអចលនវត្ថុដែលជាកម្មសិទ្ធិនៃភតិសន្យា គឺជាបន្ទប់ជួលស្នាក់នៅ។

មាត្រា៣ចែងថាច្បាប់នេះមានវិសាលភាពអនុវត្តចំពោះភតិសន្យាពិសេសដែលមាន ម្ចាស់ផ្ទះយកថ្លៃឈ្នួលក្នុងលក្ខណៈអាជីព។ ភតិសន្យាពិសេសត្រូវធ្វើជាលាយលក្ខណ៍អក្សរ និងមានសេចក្តីបញ្ជាក់របស់មេឃុំ ឬចៅសង្កាត់ ហើយម្ចាស់ផ្ទះមានករណីយកិច្ចធ្វើកិច្ចការនេះចាំបាច់។

នាយកប្រតិបត្តិសហព័ន្ធនិស្សិតបញ្ញវន្តកម្ពុជា លោក ទិប ទាវ មានប្រសាសន៍ថាច្បាប់នេះត្រូវបានបង្កើតឡើង ដើម្បីតែទាញយកផលប្រយោជន៍នយោបាយតែប៉ុណ្ណោះ។ លោកថាបើរដ្ឋាភិបាលគិតគូដល់សិស្ស និស្សិត រដ្ឋាភិបាលគួរតែគិតគូពីការបញ្ជុះតម្លៃទំនិញ និងប្រេងសាំងល្អជាង។ លោកថា បើតាមការសង្កេតរបស់លោកផ្ទះដែលសិស្ស និស្សិតជួលស្នាក់នៅមិនងាយនឹងឡើងថ្លៃនោះទេ ហើយបើឡើងថ្លៃ ក៏ឡើងតិចតួចប៉ុណ្ណោះ។ លោកបន្ថែមថា«ប៉ុន្តែបើគិតថាចង់ជួយដល់សិស្ស និស្សិតគឺទម្លាក់តម្លៃទំនិញទីផ្សារទៅ ជាពិសេសតម្លៃសាំង ទម្លាក់តម្លៃសាំងមួយ អ្វីៗនឹងធ្លាក់មកឯងហើយ អញ្ចឹងជិវិតសិក្សារបស់សិស្ស និស្សិតដែលមកពីតាមបណ្តាខេត្តមករស់នៅភ្នំពេញហ្នឹងមានភាពងាយស្រួលហើយ»។

បើតាមការសាកសួររបស់VOD ម្ចាស់ផ្ទះជួលមួយចំនួនបានលើកឡើងថាពួកគាត់មិនជំទាស់ទៅនឹងច្បាប់នេះនោះទេ ប៉ុន្តែពួកគាត់ចង់ឲ្យរដ្ឋាភិបាលក៏គួរគិតគូពីការទប់ស្កាត់មិនឲ្យដំឡើងថ្លៃម្ហូបអាហារ និងថ្លៃប្រេងសាំងផងដែរ។

មាត្រា៧នៃសេចក្តីព្រាងច្បាប់ភតិសន្យាពិសេសនេះចែងថាម្ចាស់ផ្ទះជួលមានសិទ្ធិរំលាយភតិសន្យាពិសេសបានតែករណី ដូចជាអ្នកជួលផ្ទះមិនបង់ថ្លៃឈ្នួល២ដង ជាបន្តបន្ទាប់ ដោយគ្មានមូលហេតុសមស្រប អ្នកជួលផ្ទះប្រើប្រាស់ និងអាស្រ័យផលលើវត្ថុជួលខុសពីគោលបំណងនៃការជួល និងអ្នកជួលផ្ទះដោយចេតនាធ្វើឲ្យប៉ះពាល់ដល់សណ្តាប់ធ្នាប់ច្រើនលើក និងបង្កឲ្យមានឥទ្ធិពលធ្ងន់ធ្ងរដល់ជីវភាពរស់នៅជាប្រក្រតីរបស់អ្នក រស់នៅជុំវិញ។ មាត្រា៧បន្តថាបន្ទប់ជួលស្នាក់នៅ ត្រូវជួលស្នាក់នៅ ត្រូវជួសជុលធំៗ ឬសាងសង់ជាថ្មីតាមបញ្ជារបស់អាជ្ញាធរធម្មានុរូប។

រដ្ឋសភានឹងបើកឲ្យមានការពិនិត្យ និងអនុម័តសេចក្តីស្នើច្បាប់ភតិសន្យាពិសេសនេះ នៅថ្ងៃចន្ទសប្តាហ៍ក្រោយ។

គួរបញ្ជាក់ថាសេចក្តីស្នើច្បាប់នេះត្រូវបានធ្វើឡើងបន្ទាប់ពីលោក នាយករដ្ឋមន្ដ្រី ហ៊ុន សែន និងប្រធានគណបក្សសង្រ្គោះជាតិ លោក សម រង្ស៊ី បានឯកភាពគ្នាឲ្យបង្កើតច្បាប់មួយដែលអាចបញ្ចៀសការដំឡើង ថ្លៃផ្ទះជួលនានាស្រេចតែចិត្ត ដែលនាំឲ្យប្រជាពលរដ្ឋរអ៊ូរទាំ។

កន្លងទៅ កម្មកររោងចក្រកាត់ដេរតែងតែរអ៊ូរទាំថាម្ចាស់ផ្ទះជួល មួយចំនួនបានដំឡើងថ្លៃឈ្នួលស្រេចតែចិត្ត ខណៈប្រាក់ឈ្នួលរបស់កម្មករត្រូវបានដំឡើង។ លោកនាយករដ្ឋមន្ត្រី ហ៊ុន សែន ធ្លាប់អះអាងថាកម្មករប្រមាណ១៥០០០០នាក់ដែលបានជួលផ្ទះ ដើម្បីស្នាក់នៅពេលបំពេញការងារក្នុងវិស័យកាត់ដេរ៕ រាយការណ៍បន្ថែមដោយលោក ស៊ុន ណារិន

ប្រភព៖ ដោយ៖ ទូច សុខា | ថ្ងៃសុក្រ ទី3 កក្កដា 2015, 06:16 PM http://vodhotnews.com

សរសេរមកកាន់លោកទូច សុខា តាមរយៈsokha@vodhotnews.com