ចំណូលពីអង្គរក្នុងឆមាសទី១បានជាង៣០លានដុល្លារ ថយចុះជិត១ភាគរយ

ទេសចរទៅទស្សនាប្រាសាទអង្គរវត្តនាពេលកន្លងមក (រូបភាព៖ បូ សាវី)

អាជ្ញាធរជាតិអប្សរាឲ្យដឹងថាចំណូលបានពីការលក់សំបុត្រចូលទស្សនាអង្គរវត្ដក្នុងឆមាសទី១ឆ្នាំ២០១៥នេះបានជាង៣០លានដុល្លារ ថយចុះជិត១ភាគរយបើធៀបនឹងរយៈពេលដូចគ្នាក្នុងឆ្នាំ២០១៤ ខណៈចំនួនអ្នកមកទស្សនាមានការកើនឡើង ។

របាយការណ៍របស់អាជ្ញាធរជាតិអប្សរាចេញផ្សាយនៅថ្ងៃចន្ទនេះបង្ហាញថា ភ្ញៀវទេសចរបរទេសទៅទស្សនាប្រាសាទអង្គរវត្តក្នុងខែមិថុនាមានចំនួន១១៤ ០៦៦នាក់ កើនឡើង១៣,១៩ភាគរយធៀបនឹងខែមិថុនា ឆ្នាំ២០ ១៤។ ឯចំណូលដុលនៅក្នុងខែមិថុនាបានចំនួន ៣ ១១២ ៦៦០ដុល្លារ កើនឡើង ១០,៧៨ភាគរយធៀបនឹងខែមិថុនា ឆ្នាំ២០១៤ ។

របាយការណ៍ឱ្យដឹងទៀតថា ចំណូលថវិកាបានពីការលក់សំបុត្រចូលទស្សនារមណីយដ្ឋានអង្គរនៅក្នុងរយៈពេល៦ខែក្នុងឆ្នាំ២០១៥នេះមានចំនួនសរុប៣០ ៩៤៨ ២៤០ដុល្លារ បើប្រៀបធៀបនឹងរយៈពេលដូចគ្នាក្នុងឆ្នាំ២០១៤មានការថយចុះ០,៦៩ភាគរយ ។ ចំណែកចំនួនភ្ញៀវទិញប័ណ្ណចូលទស្សនាមានចំនួន ១ ០៨៤ ៤២៧នាក់ កើនឡើង១,៦១ភាគរយ ។

ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរាលោក ឡុង កុសល មានប្រសាសន៍ថា ការដែលប្រាក់ចំណូលពីការលក់សំបុត្រចូលទស្សនាអង្គរនេះមានការថយចុះ ខណៈពេលដែលចំនួនភ្ញៀវទេចរមានការកើនឡើងនោះគឺដោយសារតែក្នុងឆ្នាំនេះភ្ញៀវទេសចរទិញសំបុត្រចូលទស្សនាអង្គររយៈពេលខ្លីច្រើនជាងរយៈពេលវែង ។

ទោះយ៉ាងណា តំណាងរាស្ដ្រគណបក្សសង្គ្រោះជាតិ និងជាអនុប្រធានគណៈកម្មការទី២នៃរដ្ឋសភាលោក សុន ឆ័យ មានប្រសាសន៍ថា លោកមិនជឿថា ចំណូលពីការលក់ប័ណ្ណទស្សនាប្រាសាទអង្គរនេះត្រឹមត្រូវនោះទេដោយលោកថា ជាចំណូលមិនមានភាពតម្លាភាព ហើយអាជ្ញាធរជាតិអប្សរាមិនបានបង្ហាញឯកសារបញ្ជាក់ឱ្យបានគ្រប់ជ្រុងជ្រោយ។ លោកបន្ដថា លោកនឹងរៀបចំដាក់លិខិតអញ្ជើញលោក សុខ អាន ប្រធានអាជ្ញាធរជាតិអប្សរាមកសាកសួរពីករណីជួលអង្គរវត្ដទៅឱ្យក្រុមហ៊ុនបរទេសនិងពីភាពមិនប្រក្រតីនៃការលក់សំបុត្រអង្គរ ព្រមទាំងបញ្ហាផ្សេងៗជាច្រើនទៀតជាថ្មីទៀតក្នុងពេលឆាប់នេះ។

សហប្រធានក្រុមការងារអភិវឌ្ឍន៍វិស័យទេសចរលោក ហូ វណ្ឌី សុំមិនអត្ថាធិប្បាយលើបញ្ហានេះ។

គួរបញ្ជាក់ថា តម្លៃសំបុត្រចូលទស្សនាប្រាសាទអង្គរសម្រាប់ជនបរទេសចែកចេញជា៣ ប្រភេទគឺ តម្លៃ២០ដុល្លារសម្រាប់រយៈពេល១ថ្ងៃ ៤០ដុល្លារសម្រាប់រយៈពេល៣ថ្ងៃ (មានសុពលភាព១សប្ដាហ៍) និង៦០ដុល្លារ សម្រាប់រយៈពេល៧ថ្ងៃ (មានសុពលភាព១ខែ) ៕

ប្រភព៖ VOD
សូមសរសេរមកលោក បូ សាវី តាមរយៈ savy@vodhotnews.com