CNRP ថាមិនចូលរួមអនុម័តច្បាប់NGOជាមួយ CPP ទេ

លោក ញ៉ែម បុញ្ញាឫទ្ធិ អ្នកនាំពាក្យគណបក្សសង្គ្រោះជាតិ (រូបថត៖ ទេព សូនី)

គណបក្សសង្គ្រោះជាតិថា នឹងមិនចូលរួមអនុម័តច្បាប់ NGO ជាមួយគណបក្សប្រជាជនកម្ពុជានៅថ្ងៃខាងមុខនេះទេ ដោយអះអាងថា ច្បាប់នេះគណបក្សកាន់អំណាចបង្កើតឡើងដោយតក់ក្រហល់ និងមិនបានពិគ្រោះយោបល់ជាមួយភាគីពាក់ព័ន្ធ។

ការប្រកាសជំហររបស់បក្សប្រឆាំង ធ្វើឡើងខណៈរដ្ឋសភាគ្រោងបើកកិច្ចប្រជុំអនុម័តច្បាប់ស្តីពីសមាគម និងអង្គការមិនមែនរដ្ឋាភិបាលនៅថ្ងៃទី១០ ខែកក្កដា ឆ្នាំ២០១៥នេះ។

អ្នកនាំពាក្យគណបក្សសង្គ្រោះជាតិ លោក ញ៉ែម បុញ្ញាឫទ្ធិ ប្រាប់ VOD នៅថ្ងៃពុធនេះថា គណបក្សសង្គ្រោះជាតិចង់ឲ្យរដ្ឋាភិបាល និងរដ្ឋសភាពន្យារនៃការអនុម័តសេចក្តីព្រាងច្បាប់ NGO ដោយសារច្បាប់នេះ បង្កើតឡើងដោយមិនមានការឯកភាពពីភាគីពាក់ព័ន្ធ។ លោកថា បើសភានៅតែរឹងទទឹងអនុម័តច្បាប់នេះទៀត នោះគណបក្សសង្គ្រោះជាតិមិនចូលរួមជាមួយគណបក្សប្រជាជនកម្ពុជានោះទេ។ លោកថា៖ "យើងជាគណបក្សប្រជាធិបតេយ្យ យើងថាគោលការណ៍គណបក្សយល់ឃើញថា ច្បាប់នេះមានផលប៉ះពាល់ បន្ទាប់មកទៀតមិនមានការពិភាក្សាឲ្យបានទូលំទូលាយ។ ដូច្នេះយើងយើងមិនចូលរួម"។

ទោះបីជាយ៉ាងណា លោក ញ៉ែម បុញ្ញាឫទ្ធិ ថាតាមគោលការណ៍របស់គណបក្សសង្គ្រោះជាតិមិនបានបិទសិទ្ធិសេរីភាពតំណាងរាស្ត្ររបស់ខ្លួន មិនឲ្យចូលប្រជុំនោះទេ តែបើតំណាងរាស្ត្ររូបណាចង់ចូលរួមអនុម័តច្បាប់នោះ គឺជាសិទ្ធិសម្រេចរបស់បុគ្គលនោះ។

អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ មានប្រសាសន៍ថា គណបក្សប្រជាជនកម្ពុជាមិនខ្វល់នឹងការលើកឡើងរបស់គណបក្សសង្គ្រោះជាតិទេ នោះជាសិទ្ធិសម្រេចរបស់គណបក្ស មួយដែលទំនោរទៅរកសង្គមស៊ីវិល។ ប៉ុន្តែលោកបញ្ជាក់ថា គណបក្សប្រជាជនកម្ពុជានៅតែបន្តអនុម័តច្បាប់នេះ ដើម្បីឲ្យស្របតាមគោលការណ៍ប្រជាធិបតេយ្យ។ លោកថា៖ "គណបក្សប្រជាជនកម្ពុជា ជាគណបក្សដឹកនាំប្រទេស ធានានូវនីតិរដ្ឋ សណ្តាប់ធ្នាប់ ធានានូវសេរីភាព ប្រជាធិបតេយ្យដើម្បីប្រជាពលរដ្ឋគ្រន់និន្នាការចូលរួមក្នុងការកសាងប្រទេស ដោយយើងមិនយកចិត្តទុកដាក់ចំពោះក្រុមមនុស្សដែលខិតខំធ្វើការរារាំងមិនឲ្យច្បាប់កើតមាន ដែលយកមូលហេតុបម្រើផលប្រយោជន៍របស់ខ្លួនឯងពីរបីនាក់ ហ្នឹងយើងអត់ត្រូវការទេ"។
មន្ត្រីសង្គមស៊ីវិលបញ្ជាក់ថា មាត្រា៥ មាត្រា១០ មាត្រា១៥ មាត្រា២២ មាត្រា៣០ និងមាត្រា៣២ សុទ្ធតែជាការបារម្ភខ្លាំង ដែលមាត្រា៣២នេះ បានចែងពីការផាកពិន័យធ្ងន់ធ្ងរដល់អង្គការ ឬសមាគមណាដែលមិនបានបំពេញលក្ខខណ្ឌតាមច្បាប់នោះ ហើយឈានទៅលុបឈ្មោះអង្គភាពនោះចោល។

មន្ត្រីសិទ្ធិមនុស្សអះអាងថា នៅពេលច្បាប់នេះចេញនឹងធ្វើឲ្យសមាគមតូចៗ និងសកម្មភាពការងារស្ម័គ្រចិត្តរបស់យុវជន និងសកម្មជនតាមមូលដ្ឋាន នឹងត្រូវបញ្ចប់ព្រោះតែពួកគេមិនអាចបំពេញលក្ខខណ្ឌតាមអ្វីដែល រដ្ឋាភិបាលបានកំណត់ក្នុងច្បាប់នោះ៕

ប្រភព៖ VOD
សូមសរសេរមកលោក ណាត សុភាព តាមរយៈ sopheap@vodhotnews.com