លោក សុខ ប៊ុន ប្រកាសសងជំងឺចិត្តកញ្ញាសាសាចំនួន១០ម៉ឺនដុល្លារ

ឧកញ៉ា សុខ ប៊ុន ដែលជាប់ពាក់ព័ន្ធនឹងករណីប្រើអំពើហិង្សាលើអតីតពិធីការិនីទូរទស្សន៍ កញ្ញាសាសា បានចេញលិខិតបំភ្លឺជាសាធារណៈមួយ ដោយសុំការអធ្យាស្រ័យពីក្រុមគ្រួសារកញ្ញាសាសា និងបានប្រកាសសងជំងឺចិត្ត១០ម៉ឺនដុល្លារ។

សេចក្តីបំភ្លឺមួយចេញផ្សាយនៅថ្ងៃអង្គារនេះឲ្យដឹងថាលោកសោក ស្តាយចំពោះជម្លោះរវាងរូបលោកនិងញ្ញាសាសាដែលបានកើតឡើងកាលពី ថ្ងៃទី០២ ខែកក្កដា និងបានបង្កឲ្យមានរបួសទាំងសងខាង។ លោកបន្តថាជម្លោះនោះបានធ្វើឲ្យប៉ះពាល់ដល់កិត្តិយសរបស់កញ្ញាសាសា និងរូបលោកផ្ទាល់។ ក្នុងលិខិតនោះ លោក សុខ ប៊ុន បានប្រកាសជាសាធារណៈថាលោកសុំលាឈប់ពីប្រធានសមាគមវាយតម្លៃ អចលនវត្ថុ និងផ្ទេរសិទ្ធិទាំងស្រុងទៅឲ្យក្រុមប្រឹក្សាភិបាលវិញ។ លោក សុខ ប៊ុន ក៏បានប្រកាសលាឈប់ពីនាយកក្រុមហ៊ុនTEHO-SBG Development Co.,Ltd. ផងដែរ។ លោកក៏បានប្រកាសសុំលាឈប់ពីងារឧកញ៉ាផងដែរ។

យោងតាមលិខិតដដែល លោក សុខ ប៊ុន បានស្នើសុំចូលរួមជាវិភាគទានជួយព្យាបាលដល់កញ្ញាសាសាចំនួន១ ០ម៉ឺនដុល្លារ និងបានស្នើសុំការយោគយល់ឈប់ប្រកាន់ និងមិនសងសឹកពីក្រុមគ្រួសាររបស់កញ្ញាសាសា។ លិខិតបញ្ជាក់ថា៖«ខ្ញុំ បាទសូមចូលរួមវិភាគទានដើម្បីព្យាបាលសុខភាព និងដោះស្រាយជីវភាព ចំនួន១០ម៉ឺនដុល្លារអាមេរិកជូនចំពោះកញ្ញាសាសា ទោះបីច្បាប់កំណត់ត្រឹម៦លានទៅ១០លានរៀលក្តី។ ខ្ញុំសូមការយោគយល់ ការឈប់ចោទប្រកាន់គ្នា និងការមិនសងសឹកគ្នាពីកញ្ញាសាសា និងក្រុមគ្រួសារ»។

លោក សុខ ប៊ុន ក៏បានប្រកាសសុំអធ្យាស្រ័យពីស្ថាប័នតុលាការ ដើម្បីទុកពេលឲ្យលោកព្យាបាលជំងឺស្ត្រេស ដែលលោអះអាងថាលោកមានជំងឺនេះធ្ងន់ធ្ងរ និងទុករាល់ការងារនីតិវិធីច្បាប់ជូនមេធាវីរបស់លោក។ លោកក៏អំពាវនាវឲ្យសាធារណជន និងអាជ្ញាធរមានសមត្ថកិច្ចពិនិត្យករណីនេះដោយប្រុងប្រយ័ត្ន និងផ្សះផ្សារដោយស្មោះត្រង់ចំពោះគូជម្លោះទាំងពីរ។

ក្នុងបទសម្ភាសន៍ជាមួយVODតាមទូរស័ព្ទកាលពីថ្ងៃចន្ទ កញ្ញាសាសានិយាយថាស្ថានភាពមុខរបួសរបស់នាងមិនមានបញ្ហាស្នាកស្នាម លើផ្ទៃមុខ និងជាំរង្វង់ភ្នែកដូចមុនទៀតទេ ប៉ុន្តែអ្វីដែលនៅជាបញ្ហាចោទ គឺនៅស្រវាំងភ្នែក និងហឹងត្រចៀកនៅឡើយ។ នាងគ្រោងទៅជួបក្រុមគ្រូពេទ្យថៃជាថ្មីម្ដងទៀតក្នុងពេលដ៏ ខ្លី ប្រសិនបើស្ថានភាពនេះនៅមានបញ្ហា។ អតីតតារារូបនេះនិយាយថា«អ្នកខ្លះថាខ្ញុំទៅព្យាបាលនៅ សិង្ហបុរី និងខ្លះថាខ្ញុំនៅចរចាជាសម្ងាត់ជាមួយម្នាក់ហ្នឹង(ឧកញ៉ាសុខ ប៊ុន) ប៉ុន្តែខ្ញុំទៅបាងកកទេ ហើយខ្ញុំសូមជម្រាបថាអត់មានអីជាសម្ងាត់ទេ ទោះជាគាត់ត្រូវបង់សំណងឲ្យខ្ញុំ ក៏មិនអាចគេចផុតពីទោសព្រហ្មណ្ឌបានដែរ!»។ យ៉ាងណាមិញ កញ្ញាសារភាពថាក្នុងការទារសំណងគឺ មិនក្រោមខ្ទង់លានដុល្លារនោះទេ ដោយសារតែនាងចាត់ទុកថាការវាយសម្រាត និងអំពើហិង្សាដែលលោកឧកញ៉ា សុខ ប៊ុន និងបក្សពួក មកលើនាង បានធ្វើឲ្យនាងអាប់ឱននិងរងនូវភាពអាម៉ាស់ខ្លាំងក្លា។ កញ្ញាសាសានិយាយថា«អ្នកណាក៏ថាម្នាក់ហ្នឹងជាសេដ្ឋី និងជាអ្នកមានលុយដែរ អញ្ចឹងបើខ្ញុំទាតិចពេក ថ្ងៃក្រោយប្រាកដជាអាងបោះលុយហើយធ្វើអញ្ចឹងដាក់អ្នកផ្សេង ទៀត អញ្ចឹងសម្រាប់ខ្ញុំគឺចង់ទា៥លាន(ដុល្លារ)តែម្ដង ដើម្បីឲ្យរាងចាល ហើយកុំថាបង់លុយឲ្យខ្ញុំហើយរួចខ្លួន គឺអ្នកឯងត្រូវជាប់ទោសព្រហ្មណ្ឌមួយទៀត លើករណីប្រើអំពើហិង្សាលើខ្ញុំ!»។

មេធាវីរបស់ឧកញ៉ា សុខ ប៊ុន លោក យិន សុភី ប្រាប់VODថាលោកមិនទាន់បានទទួលការពឹងពាក់ដោយផ្ទាល់ពីឧកញ៉ា សុខ ប៊ុន នៅឡើយទេ ក្រៅតែពីក្រុមគ្រួសារឧកញ៉ា។ លោកក៏មិនទាន់អាចបញ្ជាក់បានថាតើពេលណាលោក សុខ ប៊ុន នឹងវិលត្រឡប់មកកម្ពុជាវិញ ដើម្បីដោះស្រាយបញ្ហានេះតាមផ្លូវច្បាប់។

ទាក់ទងនឹងការប្តឹងទាមទារសំណង៥លានដុល្លារពីសំណាក់កញ្ញា សាសា លោកមេធាវី យិន សុភី មានប្រសាសន៍ថាជាសិទ្ធិរបស់កញ្ញាសាសា។ លោកបញ្ជាក់ថា«នេះជាសិទ្ធិរបស់គាត់ទេក្នុងការដាក់ប្តឹង នេះជាសិទ្ធិរបស់គាត់ទេ ប៉ុន្តែដំណឹងនេះខ្ញុំមិនទាន់បានទទួលជាក់លាក់នៅឡើយ»។

កញ្ញាសាសាបានឲ្យដឹងថាមិត្តភ័ក្រ្តរបស់នាង គឺនារីជាជនជាតិជប៉ុន ដែលត្រូវលោកឧកញ៉ាបង្ខំឲ្យចេញទៅក្រៅជាមួយខ្លួនបានដាក់ ពាក្យប្ដឹងទៅលើឧកញ៉ារូបនេះពីបទរំលោភសេពសន្ធវៈ បន្ថែមលើពាក្យបណ្ដឹងរបស់នាងផងដែរ។

ការប្រើហិង្សាមកលើកញ្ញាសាសាបានកើតឡើងតាំងពីយប់ថ្ងៃ១ឈាន ចូលព្រឹកថ្ងៃទី២ ខែកក្កដា ប៉ុន្តែសាសាអះអះអាងមកពីការដាក់ពាក្យបណ្ដឹងមិនទទួលបាន ប្រតិកម្មតបតាមការចង់បាន ទើបនាំឲ្យមានការបង្ហោះជាវីដេអូឃ្លីបធ្វើឲ្យមានការភ្ញាក់ផ្អើល តែម្ដង។

គួរបញ្ជាក់ផងដែរ ឧកញ៉ា សុខ ប៊ុន គឺជាប្រធានក្រុមហ៊ុនTEHO Development និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលត្រូវគេស្គាល់ថាជាម្ចាស់សណ្ឋាគារមួយកន្លែងចំណាយទុនអស់ កន្លះលានដុល្លារ និងបានបណ្តាក់ទុន៥០០លានដុល្លារ លើគម្រោងសាងសង់ក្រុងរណបនៅជ្រោយចង្វា។ លោកក៏គេស្គាល់ថាជាដៃមុខជំនួញធំដុំជាមួយក្រុមហ៊ុន ធំៗនៅក្នុងប្រទេសសិង្ហបុរីផងដែរ៕

ប្រភព៖ VOD
សរសេរមកកាន់លោក ស៊ុន ណារិន តាមរយៈsun_narin@vodhotnews.com