កូនប្រុសជនផ្ដាច់ការលីប៊ី និងអតីតមេទ័ពត្រូវបានផ្តន្ទាទោសប្រហារជីវិតករណីរំលោភសិទ្ធិមនុស្ស

លោក Saif al-Islam ដែលត្រូវបានតុលាការកាត់ទោសប្រហារជីវិត (រូបថត៖ BBC)

កូនប្រុសម្នាក់របស់ជនផ្ដាច់ការលីប៊ី និងអតីតមេទ័ពជាច្រើននាក់ រួមទាំងអតីតនាយករដ្ឋមន្ត្រីម្នាក់ ត្រូវបានផ្តន្ទាទោសដោយប្រហារជីវិត ពីបទរំលោភសិទ្ធិមនុស្ស ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋសង្គ្រាម អំឡុងពួកគេចូលរួមបង្ក្រាបការបះបោរបដិវត្តន៍រដូវផ្ការីកអារ៉ាប់ ឆ្នាំ២០១១។

តាមប្រភពព័ត៌មានរបស់បណ្ដាញផ្សាយព័ត៌មាន BBC កូនប្រុសរបស់ជនផ្ដាច់ការលីប៊ី Muammar Gaddafi គឺលោក Saif al-Islam ត្រូវបានផ្ដន្ទាទោសប្រហាជីវិត ជាមួយអតីតមេទ័ពមួយចំនួនទៀត ក្នុងនោះមានលោក Abdullah al-Senussi ជាប្រធាននាយដ្ឋានចារកម្មនៃរបប Gaddafi ។

តុលាការក្រុងទ្រីប៉ូលី ប្រកាសថា លោក Baghdadi al-Mahmoudi អតីតនាយករដ្ឋមន្ត្រីទទួលទោសប្រហារជីវិតផងដែរ។

ជនឧក្រិដ្ឋទាំងនេះត្រូវបានចាប់ខ្លួនភ្លាមៗ បន្ទាប់ពីរបបផ្ដាច់ការរបស់វរសេនីយ៍ Muammar Gaddafi គឺត្រូវបានកម្លាំងមហាជន និងចលនាបដិវត្តន៍រំដោះប្រទេសរបស់ពួកប្រជាធិបតេយ្យលីប៊ីផ្ដួលរំលំ នៅឆ្នាំ ២០១១។ ប៉ុន្តែនៅគ្រានោះលោក Gaddafi ត្រូវបានបាញ់សម្លាប់ បន្ទាប់ពីគាត់ចេញពីរូងក្រោមដី ខណៈប្រជាជនឡោមព័ន្ធ និងតាមប្រមាញ់ជាច្រើនថ្ងៃមកនោះ។

ប្រភពព័ត៌មានរបស់បណ្ដាញផ្សាយព័ត៌មាន BBC បានឱ្យដឹងថា នៅមានមេទ័ពមួយចំនួនទៀត ត្រូវបានផ្តន្ទាទោសអស់មួយជីវិត។

កូនប្រុសរបស់លោក Gaddafi ត្រូវបានតុលាការឧក្រិដ្ឋកម្មសង្គ្រាមអន្តរជាតិ ICC ទាមទារឱ្យនាំខ្លួនមក កាត់ទោសនៅក្រុងឡាអេដែរ តែរដ្ឋាភិបាលបច្ចប្បន្នបដិសេធ។ ICC បានចោទលោក Saif al-Islam ពីរករណី គឺឧក្រិដ្ឋកម្មប្រឆាំងមនុស្សជាតិ និងឧក្រិដ្ឋសង្គ្រាម។ លោក Gaddafi គឺម្នាក់ក្នុងចំណោម មេដឹកនាំនៃប្រទេសអារ៉ាប់ ដែលត្រូវបានផ្ដួលរំលំដោយបដិវត្តន៍មហាជន ហើយក្នុងគ្រានោះ អតីតប្រធានាធិបតីអេហ្ស៊ីប ហូស្នីម៉ូបារ៉ាក់ កំពុងស្ថិតក្នុងពន្ធនាគារ។ លោកប្រឈមមុខនឹងទោសអស់មួយជីវិត ខណៈអតីតប្រធានាធិបតីទុយនីស៊ី បែនអាលី និរទេសខ្លួនទៅនៅ ប្រទេសអារ៉ាប៊ីសាវអូឌីត។

បដិវត្តន៍រដូវផ្ការីកអារ៉ាប់ បាននាំមកនូវការបញ្ចប់របបផ្ដាច់ការពុករលួយ និងរំលោភសិទ្ធិមនុស្ស៕