តំណាងរាស្រ្តបក្សប្រឆាំងថាលោក សុខ អាន បំភ្លឺមិនចំសំណួរពាក់ព័ន្ធនឹងកិច្ចសន្យាអាកាសយានដ្ឋាន

ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី លោក សុខ អាន

តំណាងរាស្រ្តគណបក្សសង្រ្គោះជាតិ លោក សុន ឆ័យ អះអាងថាឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី លោក សុខ អាន មិនបានឆ្លើយតបចំទៅនឹងសំណើសុំកិច្ចព្រមព្រៀងគ្រប់គ្រងអាកាសយាន ដ្ឋាន ដោយលោកចាត់ទុកថាការឆ្លើយតបនេះមិនអាចទទួលយកបាននោះទេ។

លោក សុន ឆ័យ កាលពីថ្ងៃទី១៦ ខែមិថុនា ឆ្នាំ២០១៥ បានផ្ញើលិខិតទៅកាន់លោក សុខ អាន តាមរយៈប្រធានរដ្ឋសភា ដោយស្នើឲ្យបញ្ចេញកិច្ចព្រមព្រៀងរបស់រដ្ឋាភិបាលជាមួយក្រុមហ៊ុន បារាំងVinci-Airport លើការសាងសង់និងគ្រប់គ្រងអាកាសយានដ្ឋានអន្តរជាតិ៣របស់កម្ពុជា ដោយលោក សុន ឆ័យ សង្ស័យថាកិច្ចព្រមព្រៀងនេះអាចធ្វើឲ្យកម្ពុជាខាតបង់ថវិកា។

លោក សុន ឆ័យ ប្រាប់VODនៅថ្ងៃពុធនេះថា កាលពីថ្ងៃទី០៧ ខែកក្កដា ឆ្នាំ២០១៥ លោកបានទទួលលិខិតឆ្លើយតបពីលោកសុខ អាន ប៉ុន្តែថាលិខិតបំភ្លឺនោះមិនបានឆ្លើយតបទៅនឹងអ្វីដែលលោកបានស្នើ សុំនោះទេ។ លោកមានប្រសាសន៍ថា៖«ចម្លើយហ្នឹងគាត់អត់ស៊ីគ្នាទៅ នឹងសំណួរឬសំណូមពរដែលខ្ញុំទាមទារឲ្យគាត់ផ្ញើនូវកិច្ចសន្យាមក ខ្ញុំទេ នេះជាបញ្ហាដែលមិនអាចទទួលយកចម្លើយគាត់បាន»។

លិខិតឆ្លើយតបរបស់លោក សុខ អាន ឲ្យដឹងថាក្រុមហ៊ុនVINCI Construction ជាអ្នកអនុវត្តគម្រោងទាំងមូល ហើយក្រុមហ៊ុននេះបានរៀបចំគម្រោងលម្អិតផ្សេងៗទៀតសម្រាប់ដាក់ឲ្យ មានការដេញថ្លៃពីក្រុមហ៊ុនក្នុងស្រុកនិងអន្តរជាតិ។ លិខិតដដែលបន្តថាជាលទ្ធផល គម្រោងខ្លះបានប្រគល់ជូនក្រុមហ៊ុនអន្តរជាតិ និងគម្រោងខ្លះបានប្រគល់ជូនទៅក្រុមហ៊ុនក្នុងស្រុកសម្រាប់ការងារ សាងសង់ជាក់ស្តែង។ លិខិតបន្ថែមថាគម្រោងសាងសង់ពង្រីកស្ថានីយ៍អ្នកដំណើរនេះបានចាប់ ផ្តើមនៅឆ្នាំ២០១៤ ហើយគ្រោងនឹងបញ្ចប់នៅឆ្នាំ២០១៦។ ក្នុលិខិតនោះ លោក សុខ អាន បញ្ជាក់ថាក្រុមហ៊ុន Société Concessionaire de lÁéroport (SCA) ដែលជាក្រុមហ៊ុនអាជីវកម្មចម្រុះរវាងក្រុមហ៊ុនVINCI និងក្រុមហ៊ុនMMCឈ្នះការដេញថ្លៃ និងទទួលបានសម្បទាន។ ក្នុងលិខិតដដែល លោក សុខ អាន បន្តថាជាធម្មតាក្រុមហ៊ុនល្បីឈ្មោះរបស់ប្រទេសធំៗនៅលើពិភពលោកតែង តែងមានក្រមសីលធម៌វិជ្ជាជីវៈក្នុងមុខជំនួញនិងអាចទុកចិត្តបាន។ យោងតាមលិខិតដដែល ការធ្វើវិនិយោគដាក់ទុនបន្ថែមក្នុងការអភិវឌ្ឍអាកាសយាន្តដ្ឋានទាំង ៣ក្រោមកិច្ចសន្យា គឺជាកាតព្វកិច្ចរបស់ក្រុមហ៊ុនSCAក្នុងការអភិវឌ្ឍអាកាសយាន្តដ្ឋាន ឲ្យមានស្តង់ដារអន្តរជាតិ។

បើតាមលោក សុន ឆ័យ តំណាងរាស្រ្តគណបក្សសង្គ្រោះជាតិនឹងពិភាក្សាគ្នាថាតើគួរតែដាក់ លិខិតទៅកាន់លោកនាយករដ្ឋមន្ត្រី ហ៊ុន សែន ផ្ទាល់ ឬក៏ប្រើយន្តការវប្បធម៌សន្ទនាវាងលោក សម រង្ស៊ី និងលោក ហ៊ុន សែន ដើម្បីឲ្យនាយករដ្ឋមន្ត្រីជួយជំរុញបន្ថែមទៀតទៅកាន់លោកសុខ អាន ឲ្យបង្ហាញជាសាធារណៈទាក់ទងនឹងកិច្ចសន្យានេះ។

ទាក់ទងនៅនឹងកាលើកឡើងរបស់លោក សុន ឆ័យ VODមិនទាន់អាចសុំការអត្ថាធិប្បាយពីអ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី លោក ទិត សុធា បាននៅឡើយទេ ដោយលោកថាលោកកំពុងជាប់ប្រជុំ៕

ប្រភព៖ VOD
សូមសរសេរមកកាន់លោក ទូច សុខា តាមរយៈ sokha@vodhotnews.com