តោះមកដឹងតិចនិករៀបការ ធ្វើម៉េចឲ្យចាយលុយអស់តិចបំផុត

គ្រាន់តែឮពាក្យថារៀបការ អ្នកណាមិនរំភើប អ្នកណាមិនចង់បានល្អ ប៉ុន្តែគ្រប់យ៉ាងមិនមែនសុទ្ធតែបានល្អដូចចិត្តគ្រប់គ្នានោះឡើយ។ សម្រាប់អ្នកមានលុយ មួយជាតិរៀបការម្តង គេមិនខ្លាចនឹងចំណាយ ដើម្បីឲ្យពិធីមង្គលរបស់គេ កាន់តែមានន័យ និងក្លាយជាការចងចាំដ៏ល្អមួយនោះទេ។

សម្រាប់អ្នកល្មមៗ ឬខ្វះខាតវិញ ពួកគេទាមទារយ៉ាងណា ឲ្យពិធីការទាំងមូលបានទាំងល្អ ហើយចំណាយលុយតិច។ សម័យនេះ ពួកគេតែរៀបចំពិធីការកាត់ៗ ទៅតាមលទ្ធភាព។ ចឹងថ្ងៃនេះ យើងខ្ញុំនឹងណែនាំតិចនិកខ្លះៗ ដែលចំណាយអស់តិចក្នុងពិធីមង្គលការ៖

១. ចុងភៅ និងម្ហូប

ពិតជាសំខាន់ អ្នកអាចរិះថាំលើសេវាកម្មផ្សេងៗបាន តែម្ហូប ដាច់ខាតគួររៀបចំឲ្យបានសមរម្យជាទីបំផុត បើមិនអ៊ីចឹង ភ្ញៀវ និងមាត់ចាបមាត់ព្រាប ដឹងតែនិយាយដើមពេញភូមិហើយ។ លោក សីហា ដែលទើបនឹងរៀបការថ្មោងថ្មី ប្រាប់ថា៖ "វាស៊ីសងទៅលើលុយដែលយើងមាន និងប្រភេទភ្ញៀវដែលមកចូលរួម។ ម្ហូបមានថោក សមរម្យ ថ្លៃ បើសិនចង់ចំណាយតិច ចឹងតម្លៃសមរម្យគឺជាជម្រើសល្អបំផុត ឬអាចធ្វើការចរចាជាមួយចុងភៅ ដោះដូរម្ហូបដែលអ្នកគិតថានឹងជួយកាត់បន្ថយចំណាយ"។

២. ភេសជ្ជៈ

រកអ្នកទុកចិត្តឲ្យជួយមើលការខុសត្រូវឃ្លាំងភេសជ្ជៈ។ មុនចេញចូល ត្រូវកត់ឲ្យបានត្រឹមត្រូវ ទើបមិនសូវបាត់ និងខាត។ អ្វីដែលសំខាន់មួយទៀត ថាតើគួរដាក់ស្រាផង ស្រាបៀរផងជាមួយគ្នាដែរអត់? សាកគិតមើលថា បើសិនជាស្រាមួយដបតម្លៃ ២០ដុល្លារ ហើយ ស្រាបៀរមួយកេសតម្លៃមធ្យម ១៥ ដុល្លារ បើអ្នកដាក់ទាំងពីរនោះតម្លៃកាន់តែកើន ប៉ុន្តែបើអ្នកគិតថាស្រាមិនសំខាន់ អ្នកអាចជ្រើសតែស្រាបៀរ ជាមួយទឹកក្រូច ឬទឹកផ្លែឈើក៏បាន ព្រោះវាជាចំណែកជួយសន្សំបានមួយកម្រិត។

៣. Pre-Wedding

មួយជីវិតការម្តង គួរតែមានរូបថត Pre-Wedding ទុកជាអនុស្សាវរីយ៍ ពេលចាស់ទៅ តែក៏មិនចាំបាច់ឆ្លងខេត្ត ឬទៅថតនៅក្រៅប្រទេសនោះទេ បើសិនជាអ្នកចង់ចំណាយតិច។ ជម្រើសមិនមែនថាគ្មាននោះទេ ជួនកាលអាចបានស្អាតជាងផងក៏ថាបាន អ្នកអាចជ្រើសរើសការថតក្នុង Studio ឬនៅជិតៗជុំវិញក្រុង-ខេត្ត។ "យើងមិនមែនចេះតែចំណាយនោះទេ ទោះយើងចង់ក៏ដោយ តែយើងគួរគិតពីតម្លៃបណ្ណាការដែលខាងប្រុសបានផ្ដល់ឲ្យ។ យើងគួររៀបចំយ៉ាងណាឲ្យបានសមរម្យទៅតាមនោះដែរ។" នេះបើតាមឲ្យដឹងពីអ្នកនាង កន្និកា ទើបរៀបការកាលពីសប្តាហ៍មុន។

៤. ហាង

រៀបចំពិធីនៅហាង ងាយស្រួលដល់ការចូលរួមរបស់ភ្ញៀវ តែអ្នកត្រូវគិតលើចំណុចមួយថា អ្នកមានលុយសម្រាប់ត្រៀមខាតហើយឬនៅ? ជម្រើសល្អ បើអ្នកមានផ្ទះដែលអាចរៀបចំបាន គួរតែរៀបចំនៅផ្ទះ ព្រោះវាអាចសន្សំហោចណាស់ក៏ខ្ទង់ពាន់ដុល្លារបានដែរ។ តែត្រូវច្បាស់ថា បរិវេណផ្ទះអាចរៀបចំបានស្អាតទេ ទីតាំងចតយានជំនិះ ធំទូលាយទេ?។ ជម្រើសមួយទៀតបើសិនជាផ្ទះខាងប្រុសអំណោយផល អាចពិភាក្សាគ្នា គួរតែរៀបចំពិធីខាងប្រុស ឬអត់។

៥. សម្អាងការ

តម្លៃសម្អាងការ មានច្រើនសម្រាប់ជ្រើសរើស ប៉ុន្តែតម្លៃ និងគុណភាព ក៏ទៅតាមនោះដែរ។ រើសមធ្យម រើសមួយណាដែលចាំបាច់ មិនចាំបាច់ថ្មីពេក កម្រិតកណ្តាល កាត់កងគ្នាបាន។ ជាក់ស្តែង បើបានដើរជ្រេតម្លៃគ្រប់សម្អាងការជុំវិញខេត្ត-ក្រុង ដើម្បីដឹងពីតម្លៃ និងគុណភាព ស្រួលចរចាបញ្ចុះតម្លៃ។ ពាក់ព័ន្ធនឹងសម្អាងការ គួរជជែកឲ្យបានច្បាស់ថា ផ្នែកអ្វីខ្លះដែលអ្នកអាចកាត់ចេញបាន បើសិនមិនចាំបាច់។

៦. ផ្លែឈើ

គួររៀបចំឲ្យហើយ ថាក្នុងនោះមានផ្លែឈើប៉ុន្មានគូសម្រាប់សែន ហែជំនូន សែនដូនតា ជាដើម។ អ្នកត្រូវច្បាស់ថា គួរទិញហាងធំៗ ឬកន្លែងបោះដុំក្នុងតម្លៃធូរថ្លៃ? មួយទៀត គួរជ្រើសរើសសេវារៀបចំផ្លែឈើហែជំនូន ឬគួររៀបខ្លួនឯង? បើសិនមិនចង់ចំណាយខ្ជះខ្ជាយ ការរៀបខ្លួនឯងជាជម្រើសល្អបំផុត។

៧. ធៀបការ

បើសិនជាអ្នកជ្រើសរើសយកម៉ូដពិសេសៗ វាច្បាស់ណាស់ថាតម្លៃនឹងថ្លៃទៅតាមនោះដែរ។ គួរដើរជ្រេតម្លៃឲ្យបានច្រើនហាង ដើម្បីមើលប្រភេទម៉ូដ និងតម្លៃដែលអ្នកគិតថាមួយណាអាចយកបាន។ ប៉ុន្តែបើគិតថាធៀបការ គ្រាន់តែជាផ្នែកមួយសាមញ្ញ អ្នកអាចរើសយកម៉ូដធម្មតាៗ សមរម្យ ល្មមៗបានហើយ។

៨. រូបថត

បើសិនជាអ្នកយកតាមរយៈសម្អាងការ គេមានកំណត់តម្លៃ និងចំនួនរូបថតដែលពេលខ្លះវាច្រើនលើសលប់ និងចំណាយខ្ជះខ្ជាយ។ បើតាមបងប្រុសម្នាក់ដែលមានបទពិសោធន៍រៀបការកាលពីឆ្នាំមុន បានឲ្យដឹងថា ជាទូទៅ បើយកតាមភ្នួង គេយកតម្លៃថ្លៃ ព្រោះគិតចំនួនបុស្ត៍ បើយកអ្នកក្រៅដែលយើងស្គាល់ អាចបានតម្លៃធូរថ្លៃ ហើយយើងអាចធ្វើការចរចាជាមួយអ្នកថតថា ចំនួនរូប និងចំណុចសំខាន់កន្លែងណាដែលយើងចង់បាន។ ចំណុចនេះ កាលខ្ញុំការអាចចំណេញបាន ហោចណាស់ក៏ជិត៣០០ដុល្លារដែរ។

៩. អាំងប៉ាវ

ក៏មិនក្រោមខ្ទង់រយដុល្លារដែរ ព្រោះមានមនុស្សជាច្រើនដែលត្រូវឲ្យ តួយ៉ាងដូចជា អ្នកភ្លេង អ្នកកាត់សក់ តាអាចារ្យ អ្នកកំដរ ជាដើម។ ចឹងចៀសវាងដល់ពេលប្រថុចញ៉ុច ពិបាក គួរតែរៀបចំទុកមុនឲ្យបានច្រើន និងកំណត់ទឹកប្រាក់ក្នុងអាំងប៉ាវឲ្យរួចរាល់ ទើបមិនចង់រញ៉េរញ៉ៃអំឡុងពេលការ មិនដឹងលុយចេញទៅច្រកណាខ្លះ។

១០. តែងផ្កា

ផ្កាក៏ចាំបាច់ ព្រោះវាជួយលើកសោភណភាព ពិធីការឲ្យកាន់តែស្រស់ស្អាតមួយកម្រិត។ តែអ្នកគិតថា គួរចំណាយលើវាច្រើនឬអត់? គួរពិចារណារវាងផ្កាស្រស់ និងផ្កាក្រដាស ព្រោះផ្កាក្រដាសធូរថ្លៃជាង។ បើអាច គួរពិភាក្សាជាមួយអ្នករៀបចំ គួរថាធ្វើបែបណាស្អាត ហើយចំណាយតិចតួច ជាពិសេសប្រើប្រភេទផ្កាក្រដាស ឬផ្កាស្រស់។ បើចង់រិះថាំកាន់តែខ្លាំង មិនបាច់ដាក់ Backdrop សម្រាប់ថតរូបនោះទេ។

ទាំងអស់ខាងលើគ្រាន់តែជាគំនិតខ្លះ ឲ្យប្រិយមិត្តជិតការដឹង ធ្វើយ៉ាងណាឲ្យចំណាយអស់តិច ទៅតាមលទ្ធភាពពួកគេ។ យ៉ាងណាក៏ដោយ ទាំងអស់គឺជាការសម្រេចចិត្តរបស់អ្នកថាតើចង់បានធំដុំ ឬធម្មតា ហើយជាការចងចាំដ៏មានន័យសម្រាប់ក្រុមគ្រួសារទាំងសង្ខាង៕

អត្ថបទ៖ ថា ម៉ាលីដា

ប្រភពពី៖ Sabay.com.kh