គុណប្រយោជន៍ពោតបារាំង (Lady Fingers) ចំពោះសុខភាព

ពោតបារាំងជាបន្លែម្យ៉ាងដែលមានរសជាតិឆ្ងាញ់ និងអាចយកទៅច្នៃចម្អិនជាម្ហូបផ្សេងៗតាមការចូលចិត្ត។ ក្រៅពីមានរសជាតិឆ្ងាញ់ បន្លែដែលមានប្រភពដើមពីទ្វីបអាហ្វ្រិកនេះ ផ្ដល់អត្ថប្រយោជន៍ដល់សុខភាពជាច្រើន។ ខាងក្រោមនេះជាអត្ថប្រយោជន៍ដែលមានក្នុងពោតបារាំងចំពោះសុខភាព។

១. មានសារធាតុសរសៃ Fiber ជួយដល់រាងកាយ
ពោតបារាំងសំបូរទៅដោយសារធាតុសរសៃទាំងរលាយ និងមិនរលាយ ដែលល្អសម្រាប់សុខភាព ជួយបង្ការរាងកាយពីជំងឺផ្សេងៗ។ វាជួយសម្អាតជាតិពុលចេញពីរាងកាយ កាត់បន្ថយកូឡេស្តេរ៉ូល បង្ការពីជំងឺបេះដូង។ ក្រៅពីនេះជួយសម្រួលដល់ការទល់លាមក ព្រមទាំងកាត់បន្ថយកម្រិតជាតិស្ករនៅក្នុងឈាមបាន។

២. ជួយរក្សាតុល្យភាព ជាតិអាស៊ីតក្នុងរាងកាយ
បន្លែពោតបារាំងមានជាតិ Alkaline ជួយរក្សាលំនឹងជាតិអាស៊ីតក្នុងបំពង់រំលាយអាហារនៃសារពាង្គកាយ។ ការរក្សាកម្រិតជាតិអាស៊ីតនេះ ជួយសុខភាពរាងកាយឲ្យបានប្រសើរ តួយ៉ាងបង្ការជំងឺដំបៅជាដើម។

៣. សំបូរវីតាមីន A និងសារធាតុប្រឆាំងអុកស៊ីតកម្ម
ពោតបារាំងសំបូរដោយសារធាតុប្រឆាំងអុកស៊ីតកម្ម ដូចជា Carotene Lutien Xanthin រួមទាំងជាតិវីតាមីន A ជំនួយភ្នែក និងបង្ការពីជំងឺភ្នែកឡើងបាយ។ មួយវិញទៀត ពោតបារាំងជួយជួសជុលកោសិកាស្បែកផងដែរ។

៤. សំបូរសារធាតុបំប៉នវីតាមីនB
ការបន្ថែមពោតបារាំងក្នុងរបបអាហារប្រចាំថ្ងៃ គឺសំបូរសារធាតុវីតាមីន B ជួយដល់ប្រព័ន្ធប្រសាទ ការពារពីជំងឺស្រ្តែស ការថប់អារម្មណ៍ ជំងឺគេងពុំលក់ និង ដំណើរធ្លាក់ទឹកចិត្ត។ ម្យ៉ាងវិញទៀត បន្លែមួយនេះជួយរក្សាការពារប្រព័ន្ធប្រសាទនៃគភ៌ក្នុងផ្ទៃស្ត្រីជាម្ដាយបាន។

៥. សំបូរសារធាតុបំប៉នវីតាមីន C
ពោតបារាំងមួយចានតូចស្មើនឹងជាតិវីតាមីន C ២៦,១មីលីក្រាម ដែលស្មើនឹង២៦ភាគរយ នៃតម្រូវការជាតិវីតាមីនC ប្រចាំថ្ងៃ។ វាជួយរក្សាពង្រឹងដល់ប្រព័ន្ធស៊ាំក្នុងសារពាង្គកាយ ប្រឆាំងនឹងជំងឺ។

៦. សំបូរសារធាតុបំប៉នវីតាមីនK
ពោតបារាំងជួយរក្សាការពារ និងពង្រឹង ឆ្អឹង ធ្មេញ ក្រចក ឲ្យរឹងមាំ ដោយសារវាសំបូរវីតាមីន K។ វាជួយបង្ការការហូរឈាមក្នុងខ្លួន និងរក្សាប្រសិទ្ធភាពប្រូតេអ៊ីនល្អៗ។

៧. ពោតបារាំងពុំមានសារធាតុធ្វើឲ្យឡើងទម្ងន់
ពោតបារាំងមួយចានតូចមានកម្រិតជាតិកាឡូរីតែ៣៥ និងពុំមានសារធាតុប្រៃ និងសារធាតុធ្វើឲ្យធាត់នោះទេ។ ផ្ទុយទៅវិញ វាផ្ទុកសារធាតុវីតាមីនល្អ និងរ៉ែខនិជល្អ ដែលជាតម្រូវការប្រចាំថ្ងៃរបស់រាងកាយ និងជាតិសរសៃ Fiber សម្រាប់ជួយប្រព័ន្ធរំលាយអាហារ៕