ទម្លាប់អាក្រក់ ទាំង៧ ដែលនឹងបំផ្លាញស្នេហារបស់អ្នក!

បើអ្នកមានទម្លាប់មួយណាដូចទម្លាប់ទាំង៧ខាងក្រោមនេះ សូមកែប្រែខ្លួនឯងបើសិនមិនចង់បាត់បង់ស្នេហាដែលខ្លួនកំពុងមាន។

១.ធ្វើចរិតដូចកូនក្មេង

អ្នកតែងតែចង់ឲ្យអ្វីៗទៅតាមដែលខ្លួនចង់បាន បើសិនជាសង្សារមិនធ្វើតាមអ្វីដែលអ្នកចង់បាន អ្នកនឹងងងក់ សំឡក់សំឡឹងគេភ្លាម។ ពេលស្រលាញ់ដំបូង គេអាចនឹងធ្វើតាមអ្នកគ្រប់រឿងរាវ ព្រមស្ដាប់តាមបញ្ជាគ្មានហេតុផលរបស់អ្នក តែយូរទៅ គ្មានអ្នកណាអាចទ្រាំនឹងទង្វើដូចនេះរហូតបានទេ។

២. រក្សាភាពស្ងៀមស្ងាត់រយៈពេលយូរ

រាល់ពេលឈ្លោះគ្នាម្ដងៗ អ្នកតែងប្រើភាពស្ងៀមស្ងាត់ប្រៀបដូចជាវិធីមួយដើម្បីធ្វើទារុណកម្មសង្សារ។ អ្នកដឹងច្បាស់ថា គេនឹងតឹងទ្រូងនៅពេលអ្នកមិនព្រមនិយាយអ្វីសោះ ដូចនេះអ្នកក៏ធ្វើបាបគេដោយវិធីនេះ។ តែអ្នកត្រូវចាំថា ភាពស្ងៀមស្ងាត់មិនអាចដោះស្រាយបញ្ហាបាននោះឡើយ។

៣. ទម្លាក់កំហុស

មនុស្សមួយចំនួនចូលចិត្តទម្លាក់កំហុសឲ្យសង្សារដោយគិតថា គេស្រលាញ់យើងហើយ ដូចនេះគេមិនតទល់វិញនោះទេ។ រឿងនេះកើតឡើងមួយដង ឬ២ដងវាមិនមែនជាបញ្ហានោះឡើយ តែបើរឿងនេះកើតឡើងញឹកញាប់ពេក សង្សារអ្នកនឹងត្រូវគិតពីចំណងស្នេហានេះឡើងវិញ។

៤. និយាយស្ដីកំបុត

អឺ អឺម អូខេ គឺជាចម្លើយដែលអ្នកមិនគួរប្រើនៅពេលកំពុងជជែកជាមួយសង្សារទេ។ វាបង្ហាញឲ្យឃើញថាអ្នកជាមនុស្សគ្មានសុជីវធម៌ និងមិនឲ្យតម្លៃដៃគូរបស់ខ្លួន។

៥. សាកល្បងសង្សារ

ស្រីៗមួយចំនួន ចូលចិត្តពឹងមិត្តភ័ក្ដិដើម្បីសាកល្បង ដើម្បីចង់ដឹងច្បាស់ថាគេស្រលាញ់យើងពិតប្រាកដឬអត់។ ប៉ុន្តែបើសង្សារអ្នកដឹងពីរឿងនេះ គេនឹងឈឺចាប់ដោយសារ គេគិតថាអ្នកមិនជឿទុកចិត្តគេទាំងស្រុង។ ម្យ៉ាងទៀត បើសំណាងអាក្រក់ អ្នកអាចបាត់បង់សង្សារ ធ្លាក់ចូលដៃមិត្តភ័ក្ដិក៏អាចថាបាន។

៦. ឈ្លោះគ្នានៅទីសាធារណៈ

ដើម្បីឲ្យសង្សារស្ដាប់តាមខ្លួន អ្នកហ៊ានស្រែកគំហកដាក់គេ យំស្រែកនៅកណ្ដាលវាលដើម្បីគម្រាមគេឲ្យគេស្ដាប់តាម។ បើទោះបីជាខឹងយ៉ាងណាក៏ដោយ ក៏គួរតែនិយាយគ្នាដោយសន្តិវិធី មិនគួរហែកកេរ្តិ៍ខ្លួនឯងឲ្យគេដឹងនោះទេ។

៧. ត្រួតពិនិត្យពេលវេលាឯកជន

គេទៅណា ធ្វើអ្វី ដើរជាមួយអ្នកណា ក៏ត្រូវរាយការណ៍ប្រាប់អ្នកទាំងអស់។ រហូតដល់ថ្នាក់អ្នកហាមគេមិនឲ្យដើរលេងជាមួយមិត្តភ័ក្ដិរបស់គេដែលអ្នកមិនពេញចិត្តថែមទៀត។ សូមចងចាំថា អ្នកគឺជាសង្សាររបស់គេ មិនមែនជាម្ដាយរបស់គេនោះទេ ចូរឲ្យតម្លៃពេលវេលាឯកជនរបស់ដៃគូរបស់ខ្លួនមុនពេលធុញទ្រាន់នឹងទង្វើរបស់យើង៕