“ការរៀបការ” មិនបានមានន័យថា សេចក្តីស្នេហារបស់អ្នកបាន ធ្វើដំណើរមកដល់ចំណុចដែលទទួលបាន ជោគជ័យហើយនោះទេ តែវាគឺជាការចាប់ផ្តើមជីវិតគូទៅវិញទេ។ សេចក្តីស្នេហាមានតួនាទីរុញច្រានឱ្យមនុស្សពីរនាក់សម្រេចចិត្តរួមរស់នៅជាគូនឹងគ្នា តែ.. នឹងមានប៉ុន្មានគូទៅដែលនឹងថែប្រគងសម្ពន្ធភាពស្នេហ៍ឱ្យរួចទៅដល់ត្រើយនៃសេចក្តីសុខបាននោះ?
ដូច្នេះបើអ្នកជាមនុស្សម្នាក់ដែលកំពុងសម្រេចចិត្តចង់រៀបការក្នុងពេលឆាប់ៗនេះ ថាតើមានដែលសាកល្បងសួរចិត្តខ្លួនឯងឱ្យប្រាកដច្បាស់ហើយឬនៅថា អ្នកបានត្រៀមខ្លួនរួចហើយ និងអាចទទួលយករឿងសំខាន់ៗទាំងនោះបានច្រើនតិចខ្លាំងប៉ុនណា? ដូច្នេះពេលនេះយើងនឹងបបួលអ្នកមកគិតត្រិះរិះដោយបេះដូង និងសតិស្មារតីរបស់អ្នកម្តងទៀត ព្រោះបើថ្ងៃណាមួយសេចក្តីស្នេហារបស់អ្នកមិនបានល្អស្រស់បំព្រងដូចការនឹកសង្ឃឹមនោះ តើអ្នកអាចទទួលយក និងទប់ទល់ជាមួយវាបានឬទេ? យើងនាំគ្នាមកមើលដូចតទៅ ៖
នៅពេលដែលគូស្នេហ៍អាចនឹងប្រែប្រួលខុសពីមុននៅថ្ងៃណាមួយពិភពរបស់សេចក្តីស្នេហាមានទាំងសុខ និងទុក្ខ តែវាក៏មិនបានសាហាវឃោឃៅរហូតនោះដែរ បើយើងចេះទទួលយកបាននៅលើលក្ខខណ្ឌនៃសេចក្តីពិតបាន ហើយសង្គមបច្ចុប្បន្ននេះ មនុស្សយើងម្នាក់ៗសុទ្ធតែដង្ហោយរកតែសេចក្តីសុខមកដាក់ខ្លួនឯង ដោយបោះបង់នូវមនុស្សម្នាក់ទៀតចោលបានយ៉ាងងាយជានិច្ច ដូច្នេះបើថ្ងៃនេះគេប្រាប់ថា ស្រឡាញ់អ្នកខ្លាំងណាស់ តែនៅពេលរៀបការហើយ ថ្ងៃមួយគេមានទង្វើខុសពីមុន ព្រងើយកន្តើយ យកចិត្តទុកដាក់រូបអ្នកកាន់តែតិចទៅ ឬអាចលួចមានអ្នកថ្មីនោះ បែបហ្នឹង... តើអ្នកមានបានត្រៀមការណ៍ទុកក្នុងចិត្តយ៉ាងស្ងាត់ៗហើយឬនៅថា នឹងត្រូវទប់ទល់យ៉ាងណា?
នៅពេលដែលឋានៈជីវភាព និងភាពរឹងមាំខាងគ្រួសារចាប់ផ្តើមរង្គោះរង្គើនៅពេលជួបស្នេហ៍ថ្មីៗ ឬរៀបការរួចបានថ្មីៗ ស្រីៗអាចសម្រេចចិត្តយ៉ាងងាយៗ ដោយសារគ្រាន់តែខាងប្រុសមានឋានៈជីវភាពស្ថិតស្ថេរមាំមួន តែ... ចុះបើរៀបការនឹងគ្នាយូរទៅ ជីវិតការធ្វើការងាររបស់គេដើរមកដល់ចំណុចបរាជ័យ គេលែងមានអ្វីឱ្យអ្នកពឹងពាក់បាន លែងមានប្រាក់ចំណូលល្អៗដែលធ្លាប់តែមើលថែប្រណិប័តន៍រូបអ្នកយ៉ាងល្អ បើគេបរាជ័យខាងផ្នែកហិរញ្ញវត្ថុ និងការងារ តើអ្នកមានបានត្រៀមចិត្តរួចហើយឬនៅថា នឹងត្រូវទប់ទល់យ៉ាងណា?
នៅពេលគូស្នេហ៍មានបញ្ហាសុខភាពរហូតធ្វើឱ្យជីវិតគូលែងមានសេចក្តីសុខដូចកាលពីមុនមនុស្សយើងនៅពេលដែលអាយុច្រើនឡើងពេលវេលាពិតជានឹងបំផ្លាញភាពរឹងមាំខាងរាងកាយឱ្យចុះខ្សោយមិនខាន មិនថាដោយសារតែគេត្រូវប្រឈមនឹងជំងឺចង្រៃណាមួយ ឬជួបនឹងគ្រោះថ្នាក់ផ្សេងៗរហូតដល់ថ្នាក់ពិការ ទុព្វលភាព ឬមិនថាតែរាល់ឧបសគ្គណាមួយ ក៏ដោយ ដែលវាធ្វើឱ្យសុខភាពគូស្នេហ៍យ៉ាប់យ៉ឺននោះ ប្រាកដណាស់ថា សភាពរាងកាយ និងផ្លូវចិត្តរបស់គេនឹងត្រូវគ្រាំគ្រាយ៉ាងធ្ងន់ធ្ងរមិនខាន ។ បើថ្ងៃនោះមកដល់... តើអ្នកនឹងនៅតែស្រឡាញ់និង ត្រៀមជាស្រេចក្នុងការក្លាយខ្លួនទៅជាមួយកំណាត់ជីវិតទៀតដែលនៅសល់ដល់រូបគេរហូតតទៅបានដែរឬទេ?
ដោយសារតែនៅលើដំណើរផ្លូវនៃ សេចក្តីស្នេហា មិនបានរោយដោយផ្កាកុលាបជានិច្ចនោះ ទើបការរៀបការមិនបានកើតឡើងព្រមជាមួយនិងសេចក្តីសុខដែលរលូននោះដែរ តែវានឹងសណ្តោងមកជាមួយនូវឧបសគ្គ និងបញ្ហាជាច្រើនក្នុងការរស់នៅរួមគ្នា ធ្វើឱ្យអ្នកទាំងពីរនាក់អាចឈឺក្បាល វិលមុខរហូតនឿយណាយក្នុងសម្ពន្ធភាព និងនៅពេលដែលវាកើតឡើងញឹកញាប់ទៅៗ បើអ្នកមិនរឹងមាំ និងស្ថិតស្ថេរចំពោះគ្នាគ្រប់គ្រាន់ទេនោះ ផ្លូវបំបែកនៃស្នេហ៍ច្បាស់ជាកើតឡើងនៅទីបំផុតមិនខាន ដូច្នេះ ការសម្រេចចិត្តរៀបការនឹងគ្នា ចូរកុំភ្លេចសួរពីភាពសំខាន់នេះទៅបេះដូងរបស់អ្នកឱ្យបានច្បាស់ជាមុនសិន ទើបជីវិតអាពាហ៍ពិពាហ៍នឹងមិនខកបំណងនៅពេលខាងមុខ៕
0 comments:
Post a Comment