មនុស្សល្អសំដៅលើចិត្ត មិនមែនសម្តីល្អនោះទេ!!

សម្ដីរបស់មនុស្ស ប្រហែលជាពិបាកនឹងជឿទុកចិត្តណាស់។ ពេលខ្លះ សូម្បីតែខ្លួនឯងនិយាយ ខ្លួនឯង ក៏នៅតែអាចក្លាយជាពាក្យកុហកដែរ។ យើងអាចនឹងសន្យាថា ធ្វើនេះ ធ្វើនោះ ខំរៀន ឬ... ជាដើម។ តែអ្វីទាំងអស់នេះ មិនត្រូវបានធ្វើឡើយ។

ហេតុផលទាំងអស់នេះហើយ ទើបខ្ញុំណែនាំអ្នកទាំងអស់គ្នា ទាក់ទងនឹងសម្ដីដែលនិយាយផ្អែមល្ហែម, ល្អ, ទន់ភ្លន់ គួរឲ្យចង់ស្ដាប់ និងជាចំណីអាហារដ៏ឆ្ងាញ់ពិសារបស់ត្រចៀក តែលោកអ្នកគួរចាប់អារម្មណ៍ឲ្យមែនទែន។ មនុស្សបោកប្រាស់ តែងប្រើភាសាទន់ភ្លន់ ដើម្បីបញ្ចុះបញ្ចូលមនុស្សទាំងឡាយឲ្យជឿទុកចិត្ត។ ម្ចាស់ផលិតផល តែងអួតផលិតផលរបស់ខ្លួន ចំពោះមុខអតិថិជន។ ទាំងនេះ គឺជាវិធីពិសេសរបស់គេ។

ខ្ញុំហ៊ាននិយាយថា មនុស្សល្អ មិនមែនជាមនុស្សដែលមានសម្ដីល្អ សម្លេងពិរោះនោះទេ តែជាមនុស្សដែលមានចិត្តល្អ។ ការនិយាយល្អតែមួយមុខ មិនទាន់គ្រប់គ្រាន់នោះទេ។ មនុស្សយើងត្រូវតែមានចិត្តល្អ ចេះជួយអ្នកដទៃដែលនៅជុំវិញខ្លួន ចេះអត់ឱនអធ្យាស្រ័យចំពោះគ្នា និងគ្នា។ល។ សរុបមក សម្ដីល្អ មិនមែនជាអ្វីដែលមនុស្សត្រូវការនោះទេ តែមនុស្សគ្រប់គ្នាត្រូវការអ្នកដែលមានចិត្តល្អផងដែរ៕