វិន័យស្នេហា ១០ចំណុច ដែល “ គូស្នេហ៍ ” ទាំងអស់គួរយកមកប្រើ!

មនុស្សលើលោកសុទ្ធតែត្រូវការស្នេហា ដើម្បីអាចបន្តដំណើរជីវិតទៅមុខ ដោយភាពពេញលេញ និងសំបូរសប្បាយជានិរន្ត ប៉ុន្តែតើមានមនុស្សប៉ុន្មានអ្នក ដែលអាចស្រឡាញ់គ្នា និងថែទាំសេចក្តីស្នេហាឱ្យបានស្ថិតស្ថេរយូរអង្វែងនោះ? វាមិនមែនជារឿងងាយឡើយ ត្រូវទេ? ហេតុនេះហើយ មហាស្នេហា សូមណែនាំអំពី វិន័យស្នេហា ១០ចំណុច ដល់អ្នក ហើយប្រសិនបើអ្នកអាចធ្វើបាននោះ ធានាថាស្នេហារបស់អ្នកច្បាស់ជានៅតែផ្អែមល្ហែម និងស្ថិតស្ថេរយូរអង្វែងជាក់ជាមិនខាន ៖

វិន័យស្នេហាទី 1
មិនខឹងដំណាលគ្នាទាំងពីរនាក់ឡើយ ដូចដែលចាស់ៗបុរាណតែងនិយាយថា បើគេក្តៅដូចភ្លើង យើងត្រូវតែត្រជាក់ឱ្យដូចទឹក (តែមិនមែនដូចទឹក និងប្រេងទេណា) ។

វិន័យស្នេហាទី 2
មិនស្រែកដាក់គ្នាជាដាច់ខាត (លើកលែងតែពេលភ្លើងឆេះផ្ទះទាន់ហន់)

វិន័យស្នេហាទី 3
ចូរចាំទុកឱ្យច្បាស់ថា គ្មានអ្នកណាចូលចិត្តពាក្យទិតៀនស្តីបន្ទោសឡើយ តែបើចង់និយាយពីរឿងដែលអ្នកមិនចូលចិត្តឱ្យគេស្តាប់នោះ កុំភ្លេចនិយាយយ៉ាងផ្អែមល្ហែមណា៎ (តែមិនមែននិយាយថា ស្ករៗទេណា៎)

វិន័យស្នេហាទី 4
មិនរំលឹករឿងដែលទាស់ចិត្តគ្នាពីអតីតកាលឡើយ តែបើចង់និយាយពីរឿងចាស់ៗ ចូរនិយាយតែរឿងផ្អែមល្ហែមរបស់យើង ទាំងពីរទៅល្អជាង (ផ្អែមទៀតហើយ ស្ករកំពុងឡើងថ្លៃផង)

វិន័យស្នេហាទី 5
ធ្វើឱ្យគូស្នេហ៍មានអារម្មណ៏ថា គេជាមនុស្សសំខាន់សម្រាប់អ្នកជានិច្ច (ញឹកញាប់ពេកក៏មិនល្អដែរ វរៗបានចិត្ត ឲ្យគេគិតផងថាយើងក៏សំខាន់សម្រាប់គេដែរខ្លះផង) ។

វិន័យស្នេហាទី 6
សន្យានឹងគ្នាថា នឹងមិនខឹងគ្នាឱ្យលើសពីមួយយប់ទេ ព្រោះគឺរូបអ្នកខ្លួនឯងហ្នឹងឯង ដែលគេងមិនលក់នោះ និយាយឱ្យយល់ចិត្តគ្នាវិញល្អជាងបែរខ្នងដាក់គ្នា (ខំទូរសព្ទទៅគេ សង្ឃឹមថាបាននិយាយគ្នា តែបែរជាមិនព្រមលើកទូរសព្ទ បែបហ្នឹងគួរឱ្យ ខឹងអត់?)

វិន័យស្នេហាទី 7
ជជែកលេងជាមួយគ្នាឱ្យបានច្រើន ព្រោះវានឹងជួយឱ្យស្នេហារវាងអ្នកទាំងពីរកាន់តែយល់ចិត្តយល់ថ្លើមគ្នាខ្លាំងឡើង

ចង់និយាយពីរឿងអីក៏បានដែរដែលអ្នកបានជួបបានឃើញ រឿងកន្លែងធ្វើការរបស់អ្នក រឿងសៀវភៅដែលអ្នកទើបតែអានចប់ ជាដើម នោះអ្នកនឹងមានអារម្មណ៍ថា អ្នកនឹងរឹតតែស្និទ្ធស្នាលនឹងគ្នាឡើងមិនខាន (អ៊ូយ...អាពេលស្រឡាញ់គ្នាហ្នឹង មិនបាច់បង្រៀនទេ ជជែកគ្នាបានគ្រប់តែរឿងហ្នឹង!!) ។

វិន័យស្នេហាទី 8
បើដឹងខ្លួនថាខុសហើយ ចូរប្រញាប់សុំទោសភ្លាមទៅ មិនបាច់ខ្លាចថាខ្លួនអន់ទេ (អាសុំទោសហ្នឹង បាន! តែអត់ទោសឱ្យវិញ ធ្វើបានអត់?) ។

វិន័យស្នេហាទី 9
កុំយល់ច្រឡំថា ការនៅជាមួយគ្នាជាប់រហូត មានន័យពីការយកចិត្តទុកដាក់ចំពោះគ្នាយ៉ាងពិតប្រាកដនោះ ព្រោះការយកចិត្តទុកដាក់គ្នាទៅវិញទៅមក គឺការផ្តល់នូវការចាប់អារម្មណ៍ពេញមួយរយភាគរយពេលដែលនៅជាមួយគ្នា មិនមែនយើង ស្តាប់គេនិយាយ តែភ្នែកសម្លឹងមើលទូរទស្សន៏នោះទេ (ជួយមិនបានទេ! ចង់មកនិយាយចំពេលរឿងភាគកំពុងល្អមើល ឬបាល់ទាត់កំពុងប្រកួតធ្វើអី!!)

វិន័យស្នេហាទី 10
កុំភ្លេចធ្វើឱ្យគូស្នេហ៍ដឹងថា យើងនៅតែស្រឡាញ់គ្នាជានិច្ច មិនដែលនឿយណាយឡើយ...៕