ដាក់ចិត្តស្រឡាញ់បុរសម្នាក់ មិនត្រូវសម្លឹងមើលទ្រព្យសម្បត្តិតែម្យ៉ាងនោះទេ!!!

ទ្រព្យសម្បត្តិស្ដុកស្ដម្ភ គឺជាបំណងប្រាថ្នារបស់មនុស្សជាច្រើន ដោយសារតែរបស់គ្រប់យ៉ាង រួមទាំងភាពថ្លៃថ្នូរ ឧដ្ដុង្គឧត្ដម សុទ្ធតែត្រូវពឹងផ្អែកទៅលើប្រាក់កាស និងទ្រព្យសម្បត្តិ។ រហូតដល់មានអ្នកខ្លះលើកឡើងថា "មានលុយ អាចយកទៅជួលខ្មោចឲ្យកិនម្សៅបាន"។

ថ្វីត្បិតតែបែបនេះក្ដី តែបើអ្នកស្វែងយល់វាឲ្យកាន់តែច្បាស់ជាងនេះបន្តិច នឹងឃើញថា លុយពិតជាគ្មានឥទ្ធិពលខ្លាំងដល់ម្លឹងទេ។ លុយ មិនអាចទិញសេចក្ដីសុខ និងសុភមង្គលបានឡើយ។ បែរងាកមកក្នុងរឿងស្នេហាវិញ ក៏យ៉ាងនោះដែរ។ នារីមួយចំនួន បានយល់ថា ទ្រព្យសម្បត្តិគឺជារឿងសំខាន់។ ទ្រព្យសម្បត្តិមាសប្រាក់ អាចនាំខ្លួនគេឲ្យមានសេចក្ដីសុខ និងសុភមង្គលបាន។ ទីបំផុតនារីម្នាក់ អាចនឹងសម្រេចចិត្តរៀបការ ដោយសារសម្លឹងឃើញទ្រព្យសម្បត្តិរបស់បុរសម្នាក់។

ថ្ងៃនេះ យើងនឹងណែនាំអ្នកទាំងអស់គ្នា មិនត្រូវសន្លឹងមើលតែលើទ្រព្យសម្បត្តិរបស់គេតែម្យ៉ាងនោះទេ គឺត្រូវមើលទៅលើចំណុចមួយចំនួនទៀត ដូចខាងក្រោមនេះ ៖

១. ភាពឆ្លាតវៃរបស់បុរសម្នាក់ ៖
ទ្រព្យសម្បត្តិអាចនឹងរលាយបាត់ ក្នុងរយៈពេលដ៏ខ្លី តែចំណេះដឹង និងភាពឆ្លាតវៃ អាចចិញ្ចឹមអ្នកឲ្យរស់នៅបានសុខស្រួលអស់មួយជីវិត។ នារីទាំងឡាយ គួរសម្លឹងមើលថា បុរសដែលជាគូរអនាគតរបស់នាង មានភាពឆ្លាតវៃ ក្នុងការប្រកបរបររកស៊ីផ្សេងៗដែរ ឬទេ? គេខ្ជិល ឬក៏ឧស្សាហ៍?

២. ចិត្តស្មោះ ៖
នារីមួយចំនួនតែងប្រើសម្ដីក្រអើតក្រទមថា "ចិត្តស្មោះ មិនអាចបរិភោគបាន" ហើយសុខចិត្តដើរចោលបុរសដែលមានចិត្តស្មោះ តែគ្មានទ្រព្យសម្បត្តិ។ នេះជាទង្វើមួយមិនគប្បីឡើយ។ ចិត្តស្មោះរបស់បុរសម្នាក់ អាចធ្វើឲ្យអ្នក មានសេចក្ដីសុខជារៀងរហូត ជាពិសេសមិនងាយរងគ្រោះផ្នែកផ្លូវចិត្ត។

៣. មុខរបរពិតប្រាកដ ៖
បុរសអ្នកមានមួយចំនួនអាចមានតែទ្រព្យសម្បត្តិ ដែលឪពុកម្ដាយបន្សល់ទុកឲ្យ។ ពេលដែលទ្រព្យសម្បត្តិនោះ ត្រូវចំណាយ និងចាយវាយអស់ទៅ អ្នកនឹងត្រូវវេទនាអស់មួយជីវិត។ យើងណែនាំអ្នក ឲ្យជ្រើសរើសបុរសដែលមាន មុខរបរអាចចិញ្ចឹមជីវិតបាន។

៤. ចំណេះដឹង និងឥរិយាបថល្អក្នុងការរស់នៅ ៖
មនុស្សមួយចំនួន មានទ្រព្យសម្បត្តិ មាសប្រាក់ និងសញ្ញាបត្រថ្នាក់ខ្ពស់ តែការរស់នៅ ចាញ់តែមនុស្សដែលមិនបានចូលសាលា មិនបានសិក្សារៀនសូត្រផង។ យើងចង់ឲ្យអ្នកស្វែងរកបុរសណា ដែលមានឥរិយាមាយាទ និងការរស់នៅល្អប្រសើរ ចេះប្រើពាក្យសម្ដីសមរម្យ ឧស្សាហ៍ព្យាយាម ចេះទប់កំហឹង មិនបង្កជម្លោះផ្ដេសផ្ដាស ។ល។ មិនមែនសម្លឹងរកតែអ្នករៀនថ្នាក់ខ្ពស់ សម្លឹងតែទ្រព្យសម្បត្តិគេឡើយ។

៥. ចេះគោរពស្រឡាញ់អ្នកនៅក្បែរខ្លួន ៖
បុរសល្អ ត្រូវមានទាំងការគោរពចាស់ព្រឹទ្ធាចារ្យ ការគោរពចំពោះអ្នកមានអាយុច្រើនជាង...។ មិនតែប៉ុណ្ណោះ គេជាមនុស្សដែលអ្នកដទៃរាប់អាន ច្រើនផងដែរ។ ទាំងនេះហើយ ជាសញ្ញាមួយបង្ហាញថា យើងគួរតែអាចរួមរស់នៅជាមួយគេបានហើយ៕

ប្រភពអត្ថបទពី៖ ROSE