ខ្យងឡាំងសឹងពិសេស

សម្រាប់លោកអ្នកដែលនិយមទទួលទានខ្យង យើងខ្ញុំ សូមណែនាំមុខម្ហូបថ្មីមួយទៀតដែលមានរហូតដល់ទៅបីរសជាតិពីហាងលៀសសមុទ្រគឺ ខ្យងម្រេច ខ្យងអាម៉ុក និងខ្យងការី រួមបញ្ចូលគ្នានៅក្នុងឡាំងសឹងតែមួយ។ ចង់ដឹងពីរបៀបធ្វើ និងគ្រឿងផ្សំនៃមុខម្ហូបដ៏វិសេសនេះយ៉ាងណានោះសូមតាមដានជាបន្ត។

+ គ្រឿងផ្សំ
១. ខ្យង (ត្រាំទឹកចោលឱ្យអស់ដីសិនសឹមយកមកធ្វើ)
២. គ្រឿងផ្សំសម្រាប់ចំហុយខ្យងមាន រំដេង ស្លឹកក្រូចសើច ស្លឹកគ្រៃ និងអំបិល។
៣. គ្រឿងផ្សំខ្យងម្រេច ៈ ទឹកឆ្អិន ខ្ទឹមស ម្រេចម៉ដ្ឋ ប៊ីចេង ស្ករស ក្រូចឆ្មារ និងអំបិល។
៤. គ្រឿងផ្សំខ្យងអាម៉ុក ៈ ស្លឹកគ្រៃ ស្លឹកក្រូចសើច ខ្ទិះដូង រំដេង ខ្ទឹមស ខ្ទឹមក្រហម កាពិ សាច់ជ្រូកចិញ្ច្រាំ។
៥. គ្រឿងផ្សំខ្យងការី ៈ ដូចគ្នានឹងគ្រឿងផ្សំអាម៉ុកដែរ ប៉ុន្តែត្រូវបន្ថែមគ្រឿងការី ដើម្បីឱ្យវាមានពណ៌ល្អ។

+ វិធីធ្វើ
១. យកខ្យងទៅចំហុយជាមួយគ្រឿង។
២. នៅពេលវារបើកសន្ទះ ត្រូវយកវាមកត្រាំទឹកត្រជាក់ ហើយខ្វេះយកក្បាលវាបន្តិចដើម្បីលាងវាឱ្យស្អាតម្តងទៀត រួចសឹមដាក់វាចូលទៅវិញ។
៣. បន្ទាប់មកអ្នកត្រូវយកខ្យងនោះទៅញាត់គ្រឿងទៅតាមប្រភេទរបស់វា។

ខ្យងម្រេច ៖ ដាក់គ្រឿងផ្សំទឹកម្រេចចូលទៅក្នុងខ្យង (រសជាតិហិរ ជូរ ផ្អែម និងប្រៃតិច) រួចទុកមួយអន្លើ។

ខ្យងអាម៉ុក ៖ កិនគ្រឿងចូលគ្នា រួចកូរជាមួយខ្ទឹះដូង និងសាច់ជ្រូកចិញ្ច្រាំ រួចភ្លក្សវាឱ្យផ្អែមប្រៃតិចៗ រួចដួសដាក់ពីលើខ្យងទុកមួយឡែក។

ខ្យងការី ៖ ធ្វើដូចខ្យងអាម៉ុកដែរ ប៉ុន្តែត្រូវបន្ថែមគ្រឿងការី ដើម្បីប្តូរពណ៌វា រួចដួសដាក់ក្នុងខ្យងដូចមុនៗដែរ។យកខ្យងទាំងអស់ដែលដាក់លាយគ្រឿងរួចនោះទៅចំហុយម្តងទៀតនៅក្នុងឡាំងសឹងតែមួយជាការស្រច៕