កំលោះក្រមុំជាច្រើននាក់ជឿថា ការឈ្លោះជាមួយគូស្នេហ៍ គឺការបំផ្លាញសម្ពន្ធភាព គឺជាភាពបែកបាក់របស់ជីវិតគូ គឺការសាងស្នាមប្រេះឆាឱ្យសេចក្តីស្រឡាញ់ តែពួកគេមិនបានដឹងឡើយថា ការឈ្លោះជាមួយគូស្នេហ៍ ការពិតវិញនោះ អាចធ្វើឱ្យ អ្នកទាំងពីរនាក់ស្រឡាញ់គ្នាកាន់តែខ្លាំងឡើងទៅវិញទេ និងក្លាយជាគូស្នេហ៍ Healthy Relationship ទៀតផង គ្រាន់តែដឹងពីវិធីក្នុងការឈ្លោះគ្នាដូចខាងក្រោមនេះប៉ុណ្ណោះ។
1.រិះរកវិធីក្នុងការកែបញ្ហារឿងដដែលៗយ៉ាងមានរបៀប
បើអ្នកទាំងពីរធុញទ្រាន់នឹងការដែលត្រូវនិយាយតែរឿង ដដែលៗរហូតរួយមាត់ហើយនោះ បើអ្នកដឹងថា បញ្ហានេះត្រូវតែមកជួបរូបអ្នកយ៉ាងប្រាកដនោះ អ្នកទាំងពីរត្រូវតែជួយគ្នាគិតកែបញ្ហានោះឱ្យបានយ៉ាងមានរបៀប ដើម្បីការពារកុំឱ្យបញ្ហានោះកើតឡើងដដែលៗម្តងទៀត។
2.រកមើលថា តើអំឡុងពេលណាដែលឈ្លោះគ្នាញឹកញាប់បំផុត និងរិះរកវិធីកែខៃ
បន្ទាប់ពីថ្ងៃដែលស្រវឹងរឡិករឡាក់ បន្ទាប់ពីអំឡុងពេលមានវដ្តរដូវរបស់មនុស្សស្រី បន្ទាប់ពីថ្ងៃដែលសែននឿយហត់ពីការងារ ចូរធ្វើការងឿងឆ្ងល់អំពីវាថា ដោយសារតែហេតុអីទើបអ្នកឈ្លោះគ្នាច្រើនជាងអំឡុងពេលប្រក្រតី និងចៀសវាងពីការប៉ះសម្ដីគ្នាក្នុងអំឡុងពេលនោះ ឬបើនឹងឈ្លោះគ្នាក៏ប្រាប់នាង(ឬគេ)ផងទៅថា វាដោយសារតែមូលហេតុនេះណា៎។
3.ចាំទុកជាប់ជានិច្ចថា ការឈ្លោះគ្នា មិនមែនជាការបំផ្លាញសម្ពន្ធភាពនោះទេ
កុំទៅបាក់ចិត្តគិតថា ឈ្លោះគ្នាពេលណាក៏ចង់តែលែងលះគ្នា គ្រប់តែពេលនោះ សម្លឹងមើលការឈ្លោះគ្នាឱ្យក្លាយជារឿង “សាងភាពយល់ដឹងរវាងគ្នា” បែងចែកឱ្យដាច់ថា តើវាគឺជាការឈ្លោះគ្នាបែបធ្វើបាបគ្នា ឬសាងភាពយល់ដឹងដល់គ្នា?
4.ឈ្លោះគ្នាបាន តែហាមមើលងាយ និងស្តីបន្ទោសគ្នា
នៅពេលអ្នកទាំងពីរសុទ្ធតែមានអារម្មណ៍ខឹងមួម៉ៅ វាជារឿងងាយខ្លាំងណាស់ដែលអ្នកនឹងយករឿងរ៉ាវគ្រប់យ៉ាងមកបូករួមលាយឡំ ដើម្បីធ្វើជាពាក្យសម្ដីធ្ងន់ធ្ងរវាយប្រហារគ្នា ដូចជា “អូន (បង)ឯងមិនដែល...” “បង(អូន)ឯងធ្វើតែ... អីុចឹងរហូត” ទាំងដែលបញ្ហានៃការឈ្លោះគ្នានោះគ្រាន់តែជារឿងតូចមួយប៉ុណ្ណោះ។ ដូច្នេះសូមឱ្យផ្តោតតែលើចំណុចដែលឈ្លោះគ្នា និងប្រាប់ពីតម្រូវការទៅគូស្នេហ៍របស់អ្នក និយាយគ្នាឱ្យយល់ លើកឧទាហរណ៍ដូចជា “តើបង(ឬអូន)ត្រូវនៅចាំតែបោសសម្អាតគ្រប់យ៉ាងនៅក្នុងជីវិតអូន(ឬបង)អីុចឹងឬ?” អាចប្តូរទៅជា “បន្ទប់អង្គុយលេងមើលទៅកខ្វក់ណាស់ ប្រហែលជាល្អមែនទែន បើអូន(បង)ឯងជួយបង(អូន)សម្អាតរៀបចំវានោះ” ត្រឹមតែប៉ុណ្ណឹងអ្នកទាំងពីរនាក់ក៏នឹងឈប់ឈ្លោះគ្នាបាត់ទៅហើយ។
5.សុំពេលសម្រាកសម្រាប់ខ្លួនឯងខ្លះផង
ដូចគ្នានឹងកីឡាបាល់ទាត់ដូច្នោះដែរ វាត្រូវតែមានពេលសម្រាកខ្លះសម្រាប់រឿងដែលសែនឈឺក្បាលវិលមុខទាំងឡាយ ហើយការសម្រាកពីសម្ពន្ធភាពស្នេហ៍នេះ មិនមែនជាការធ្វើបាបរូបអ្នកទាំងពីរនោះឡើយ វាគ្រាន់តែជាការផ្តល់ពេលវេលាឱ្យយើងបានគិត បានរំឭកអំពីរឿងរ៉ាវដែលកន្លងមក មិនប្រាកដដែរ ពេលវេលាថ្ងៃខែ ដែលផ្លាស់ប្តូរទៅនោះ អាចនឹងធ្វើឱ្យរូបអ្នកទាំងពីរគិតអ្វីបានច្រើនជាងមុន និងត្រិះរិះអ្វីៗបានកាន់តែល្អជាងមុនឡើងក៏អាចថាបានដែរ។
6.រៀនយល់ដឹងពីភាពមិនយល់ពីគ្នាទៅវិញទៅមក
គ្មាននរណាម្នាក់ឥតខ្ចោះនោះទេ ហើយក៏ប្រហែលជាគ្មានគូ-ស្នេហ៍មួយគូណាដែលយល់ចិត្តគ្នារហូតនោះដែរ តែវាស្ថិតនៅត្រង់ថា អ្នកទាំងពីរត្រូវព្យាយាមយល់អំពីរឿងទាំងនោះច្រើន ឬតិចប៉ុនណាខ្លាំងជាង ដូច្នេះចូររៀនយល់ដឹង កែសម្រួល និងដោះស្រាយឱ្យបានជាប់ជានិច្ច។
7.ធ្វើរឿងល្អៗចំពោះសេចក្តីស្នេហាលើកនេះឱ្យបាន “រាល់ថ្ងៃ”
ផ្តល់នូវការគោរព ផ្តល់នូវភាពស្មោះត្រង់ ផ្តល់នូវសេចក្តីស្រឡាញ់និងផ្តល់នូវការយកចិត្តទុកដាក់ចំពោះសេចក្តីស្នេហាឱ្យបានរៀង រាល់ថ្ងៃ ដូចជា ទូរស័ព្ទរក ធ្វើម្ហូបឱ្យញ៉ាំ ទិញនំមកផ្ញើ តែប៉ុណ្ណឹងរឿង ល្អៗក្នុងសេចក្តីស្នេហារបស់អ្នក ក៏នឹងហុចផលឱ្យអនាគតជួបប្រទះតែរឿងល្អៗបានបាត់ទៅហើយ៕
ប្រភពពី៖ Lareine
0 comments:
Post a Comment