ត្រណមសំខាន់ៗ ១៦ ចំនុច សម្រាប់ស្រ្តី កំពុងមានផ្ទៃពោះ

ខាងក្រោមនេះ សុទ្ធតែជាត្រណម ជំនឿ និងប្រពៃណី ដែលត្រូវបានចងក្រង មកពីចាស់ៗបុរាណ សាស្រ្តាចារ្យ និងស្រ្តីធ្លាប់ឆ្លងកាត់បទពិសោធន៍ មានកូនរួចមកហើយ ហើយក៏បានបន្សល់វាទុកដល់មិត្តៗស្រ្តីគ្រប់រូបដទៃទៀតដែលកំពុងតែពពោះ មានពោះ មានពង្ស គួរយល់ដឹង។ សូមមិត្តៗស្រ្តីមានគត៌ ត្រូវអានដោយយកចិត្តទុកដាក់អំពីត្រណមខាងក្រោមនេះ!!!

* មិនអនុញ្ញាតឲ្យស្រ្តី ដែលកំពុងតែពពោះកាន់ ឬយួររបស់ធ្ងន់ៗទេ ព្រោះតែធ្វើឲ្យកូន នៅក្នុងផ្ទៃ ប្រឈមនឹងហានិភ័យ “រលូត” ខ្ពស់។
* ត្រូវតែបញ្ឈប់ការពាក់ស្បែកជើងកែងចោទខ្ពស់ៗ ក៏ព្រោះតែស្រ្តីមានគក៌ អាចមានបញ្ហាដើរដួល ដែលបង្កជាលទ្ធភាពរលូតកូនខ្ពស់។ ដើម្បីចៀសវាង គួរពាក់ស្បែកជើងរាបវិញ។
* មិនត្រូវស្លៀកសម្លៀកបំពាក់ តឹងឬចង្អៀតពេកទេ។ គេជឿថា ធ្វើឲ្យកូន ក៏រងភាពចង្អៀតក្នុងផ្ទៃដែរ។ ហេតុនេះគួរជ្រើសរើស សម្លៀកបំពាក់រលុងៗ ឬរ៉ូប ក៏កាន់តែប្រសើរ។
* មិនត្រូវដើរបោះជំហានវែងៗជាដាច់ខាត ព្រោះតែអាចធ្វើឲ្យរលូតកូនបាន ជាពិសេស នៅអំឡុងពេលទើបតែ ពពោះដំបូង ព្រោះទារកនៅជាអំប្រ៊ីយ៉ុងនៅឡើយ។
* មិនត្រូវឈោងដៃលើកយករបស់ខ្ពស់ៗទេ ព្រោះតែចាស់ៗ និងសាស្រា្តចារ្យ គេជឿថា វាអាចធ្វើឲ្យរបូតទងសុកបាន។
* មិនអនុញ្ញាតឲ្យស្រ្តីមានផ្ទៃពោះ អង្គុយមាត់ជណ្តើរ ឬមាត់ទ្វារឡើយ។ ចាស់ៗជឿថា វាធ្វើឲ្យកូនពិបាកកើត។ បើចេញ ត្រូវចេញឲ្យផុត បើចូល ត្រូវចូលឲ្យផុត។
* មិនត្រូវឲ្យបរិភោគអាហារដើរ ឬដេកទេ ព្រោះគេជឿថា ធ្វើឲ្យពេលឆ្លងទន្លេ កូនក្រកើត។
* មិនត្រូវឲ្យ ញ៉ាំចំនីចិបចុបទេ ព្រោះចាស់ៗជឿថា ពេលជិតគ្រប់ខែ ប្រាកដជាម្តងឈឺ ម្តងបាត់ ដូចយើងទៅញ៉ាំម្ហូបចិបចុប ចឹងដែរ។
* ត្រូវចៀសវាងបរិភោគអាហារដែលមានរសជាតិហិល និងគ្រឿងស្រវឹង ព្រោះតែវាអាចបង្កបញ្ហា ដល់ទាំងកូនក្នុងផ្ទៃ និងម្តាយផងដែរ។ សម្រាប់ម្តាយ អាចនឹងធ្វើឲ្យខូចសុខភាព និងសម្រាប់កូន ធ្វើឲ្យក្រហល់ក្រហាយ។
* មិនគួរបរិភោគ ខ្ចៅខ្ចងទេ ព្រោះខ្លាចកូនកើតមកហៀរតែទឹកមាត់។
* មិនត្រូវបរិភោគបបរទេ ព្រោះតែខ្លាច កូនកើតមកមិនស្អាត ប្រតេកប្រតាក ដូចជាជាប់បបរមកយ៉ាងអីចឹង។
* មិនគួរញ៉ាំ ក្តាម ឬកន្តេះឡង់ទេ ព្រោះកូនកើតមកនឹងរពឹស នៅមិនស្ងៀម ជាមិនខានឡើយ។
* ជំនឿដ៏ពេញនិយមមួយទៀត សម្រាប់ពេលណាដែលមាន ច័ន្ទគ្រាស ឬសូរ្យគ្រាស គេមិនអនុញ្ញាតឲ្យស្រ្តីមានគក៌ចេញទៅក្រៅផ្ទះឡើយ ប៉ុន្តែប្រសិនបើចង់ចេញក្រៅ ឬចង់ទៅមើល ត្រូវដកកូនសោរ មកពាក់ជាប់ក តែក៏មានចាស់ៗមួយចំនូនខ្លះទៀតថា អាចយកមេសោរមកដាក់ក្នុងថ្នក់សំពត់ក៏បាន។ ទាំងនេះ សុទ្ធតែជាវិធីការពារ ខ្លាចកូនគ្រាសកន្លង នាំឲ្យកូនទន់អវៈយវៈបាន។
* មិនត្រូវងូតទឹកពេលយប់ឡើយ ព្រោះប្រាកដជាធ្វើឲ្យ កូនថ្លោស ជាមិនខាន (ជាហេតុបណ្តាលឲ្យពិបាកកើត)។
* មិនត្រូវឲ្យដេកដំអក់ទេ ត្រូវភ្ញាក់មុនប្តី ព្រោះគេជឿថា អាចឲ្យកូនកើតបានរហ័ស។
* គួរចេះដើរក្រឡងជើងប្តី ដែលចាស់បុរាណជឿថា ធ្វើបែបនេះ ដើម្បីឲ្យប្តី ជួយចាញ់កូនជំនួស ផងដែរ។