ជាទូទៅ នៅពេលដែលម្ចាស់ផ្ទះប្រញ៉ាប់លក់ផ្ទះ គេសង្កេតឃើញថា មិនអាចលក់បានថ្លៃឡើយ ពោលគឺត្រូវតែបញ្ចុះតម្លៃឲ្យទាបជាង តម្លៃនៅលើទីផ្សារជាក់ស្តែង ហើយអ្នកទិញឱ្យព្យាយាមឱ្យតម្លៃទាបដែរ។
នេះគឺជារឿងធម្មតានៅលើទីផ្សារ ព្រោះអ្នកទិញ ត្រូវការចំណាយពេលវេលាយូរ ក្នុងការជ្រើសរើសផ្ទះដែលគេចង់បាន។ ដូច្នេះហើយ បានជាអ្នកដែលចង់លក់ផ្ទះរបស់ខ្លួនបន្ទាន់ដើម្បីដោះស្រាយបញ្ហាអ្វីមួយនោះ មិនអាចទាមទារតម្លៃខ្ពស់ពីអ្នកទិញបាន។
យ៉ាងណាក៏ដោយ គេមានវិធីសាស្ត្រមួយចំនួន ដែលអ្នកលក់ផ្ទះគ្រប់រូបអាចលក់ផ្ទះបានយ៉ាងរហ័ស ហើយជៀសវាងការទម្លាក់តម្លៃទាប៖
១) ធ្វើឲ្យមានលក្ខណៈប្លែក ឬ ពិសេសជាងអ្នកជិតខាង
ដើម្បីទាក់ទាញចិត្តភ្ញៀវឲ្យទិញផ្ទះរបស់យើង វាពិតជាសំខាន់ខ្លាំងណាស់ ក្នុងការបង្ហាញលក្ខណៈពិសេស ឬ ប្លែកដល់ពួកគេ ព្រោះបើយើងចង់រក្សាតម្លៃខ្ពស់ជាងផ្ទះអ្នកដទៃ ផ្ទះរបស់យើងក៏ត្រូវតែមានលក្ខណៈប្រសើរជាងគេ។
ក្នុងន័យនេះ ផ្ទះដែលចង់លក់នោះ គួរតែតុបតែងឲ្យមានភាពទាក់ទាញ ដូចជាការផ្លាស់ប្តូររបស់ដែលចាស់ៗមួយចំនួន ឬ ប្តូរពណ៌នៅចំណុចត្រង់ណាមួយដែលមើលទៅដូចជាចាស់ខ្លាំងពេក។
ម្យ៉ាងវិញទៀត ការដាំផ្កាលំអនៅមុខផ្ទះ ឬនៅក្បែរបង្អួចក៏ជាចំណុចទាក់ទាញមួយផងដែរ។ និយាយរួមធ្វើយ៉ាងណា ឲ្យគេឃើញពីចម្ងាយមក ហើយចង់ទិញផ្ទះតែម្តង។
២) រៀបចំរបស់របរក្នុងផ្ទះឲ្យមានរបៀប
យើងត្រូវតែរៀបចំអ្វីៗគ្រប់យ៉ាងឲ្យមានសណ្ដាប់ធ្នាប់ ព្រោះវាជារឿងចាំបាច់បំផុត មុនពេលដែលនាំភ្ញៀវមកផ្ទះរបស់យើងដើម្បីបញ្ចុះបញ្ចូលឲ្យទិញ។
ក្នុងន័យនេះ របស់ដែលចាស់ៗមិនចាំបាច់មួយចំនួនត្រូវគួរតែយកទៅបោះចោល ព្រោះអ្នកទិញតែងប្រាថ្នាចង់បានផ្ទះដែលមានលក្ខណៈធំទូលាយ បើទោះបីជា មានតម្លៃថោកក៏ដោយ។ ជាទូទៅ បើភ្ញៀវឃើញផ្ទះរបស់យើង គ្មានរបៀបរៀបរយ ហើយមើលទៅមានលក្ខណៈរញ៉េរញ៉ៃច្រើននោះ គេនឹងជ្រើសរើសយកផ្ទះដទៃទៀត។
៣) ផ្តល់លក្ខណៈពិសេសក្នុងតម្លៃលក់ (ថែមជូនការដូរ ឬ បញ្ចុះតម្លៃពិសេស)
អ្នកស្វែងរកទិញផ្ទះ តែងតែសម្លឹងរកមើលអ្វីៗដែលពិសេស ពោលគឺមិនត្រឹមតែគុណភាពផ្ទះតែម្យ៉ាងទេ ប៉ុន្តែក៏រួមបញ្ចូលទាំងផ្តល់លក្ខណៈពិសេសផ្សេងទៀតដែលពួកគេយល់ឃើញថា មានផលចំណេញ។ ត្រង់ចំណុចនេះ យើងអាចប្រើយុទ្ធសាស្ត្រក្នុងការបន្ថែមជូនសម្ភារៈ ឬគ្រឿងសង្ហារិម ឬ ការបញ្ចុះតម្លៃត្រង់កំរិតណាមួយ ដែលអាចទាញការចាប់អារម្មណ៍ពីអ្នកទិញ។ ការពិតទៅវាមិនមែនជាការខាតបង់នោះទេចំពោះ ការថែមជូនគ្រឿងសង្ហារិម ឬ ការបញ្ចុះតម្លៃ ព្រោះ តម្លៃនៅតែលក់ក្នុងរង្វង់ទឹកប្រាក់ដែលយើងចង់បានដដែល។ ប្រការនេះ អាចទាក់ចិត្តអ្នកដែលស្វែងរកទិញផ្ទះនោះ បានយ៉ាងរហ័ស។
៤) ពិនិត្យមើលរាល់សម្ភារៈ ឬ ឧបករណ៍អេឡិចត្រូនិកក្នុងផ្ទះ
ក្នុងពេលដែលយើងរស់នៅនោះ មានសំភារៈ ឬ ឧបករណ៍ប្រើប្រាស់មួយចំនួនបានខូច ដូច្នេះយើងត្រូវតែធ្វើការជួសជុល ឬ ផ្លាស់ប្ដូរវាទៅតាមលទ្ធភាពដើម្បីផ្តល់លក្ខណៈ ងាយស្រួលដល់ម្ចាស់ថ្មី។ ជាក់ស្តែង ប្រសិនបើ មានអំពូលភ្លើងនៅកន្លែងណាមួយមានការខូចខាត យើងត្រូវផ្លាស់ប្តូរវា ព្រោះអ្នកទិញត្រូវចង់ទិញផ្ទះរបស់យើងដើម្បីមករស់នៅ តែមិនមែនដើម្បីមកជួសជុលរបស់របរខូចខាតក្នុងផ្ទះយើងនោះទេ។
៥) ដាក់តម្លៃយ៉ាងសមរម្យ
ថ្វីត្បិតតែយើង ចង់លក់ផ្ទះឲ្យបានរហ័ស ហើយរក្សាតម្លៃខ្ពស់ តែមិនមែនមានន័យថា យើងដាក់តម្លៃខ្ពស់ហួសហេតុពេកនោះទេ ពោលគឺសមស្របទៅតាមភាពជាក់ស្តែង។ ដើម្បីអាចដាក់តម្លៃយ៉ាងសមស្របបំផុតនោះ គឺត្រូវតែជាមនុស្សដែលយល់ដឹងច្រើនពីទីផ្សារ ពោលគឺចាំបាច់ត្រូវតែអាន កាសែត ទស្សនាវដី្ត ឬ ព័ត៌មានទាំងឡាយណាដែលទាក់ទងនឹងអចលនទ្រព្យ ដោយប្រៀបធៀប និង វាយតម្លៃចំពោះតម្លៃដែលអាចទាក់ទាញចិត្តអ្នកទិញ៕
ប្រភព៖ investopedia & Newpaloaltohouse
0 comments:
Post a Comment