ជំងឺបាក់ទឹកចិត្ត ក្រោយសម្រាលកូន

ការសម្រាលកូន អាចជាដើមហេតុ ដែលនាំឲ្យមានការរំជួលអារម្មណ៍ដ៏ខ្លាំងក្លាមួយដែរ ចាប់ពីអារម្មណ៍នៃភាពភ្ញាក់ផ្អើល និងរីករាយ រហូតដល់អារម្មណ៍ភ័យខ្លាច និងថប់បារម្ភ។ ប៉ុន្តែ វាក៏អាចបណ្តាលមកពីបញ្ហាអ្វីមួយ ដែលអ្នកមិនដែលរំពឹងទុកដែរ នោះគឺការបាក់ទឹកចិត្តតែម្តង។ មានម្តាយច្រើនណាស់ ដែលធ្លាប់មានបញ្ហាមិនសប្បាយចិត្ត ក្រោយពីសម្រាលកូនរួច ដែលមានសញ្ញាដូចជា អារម្មណ៍មិនល្អ ចេះតែយំ ថប់បារម្ភ និងពិបាកគេង។ អារម្មណ៍បែបនេះ ជាធម្មតា ចាប់ផ្តើមកើតមាន ក្នុងរយៈពេលពីរទៅបីថ្ងៃ ក្រោយពេលសម្រាលរួច ហើយវាក៏អាចបាត់ទៅវិញ យ៉ាងយូរបំផុតនៅរយៈពេល ២ សប្តាហ៍ក្រោយ។ ប៉ុន្តែ ម្តាយថ្មោងថ្មីមួយចំនួន បែរជាមានអាការៈបាក់ទឹកចិត្ត ក្រោយសម្រាលកាន់តែធ្ងន់ធ្ងរ និងមានរយៈពេលយូរទៅវិញ។ អ្វីដែលកម្រនោះគឺថា អារម្មណ៍ខូចចិត្ត ឬហៅថាជំងឺផ្លូវចិត្ត ក្រោយសម្រាលកូនរួចក៏អាចកើតដែរ។

ការបាក់ទឹកចិត្តក្រោយសម្រាល ពេលខ្លះ វាអាចជាផលវិបាក នៃការសម្រាលកូនទៅវិញទេ។ បើសិនជាអ្នក មានបញ្ហាបាក់ទឹកចិត្តក្រោយសម្រាល ចូរស្វែងរកការព្យាបាលឲ្យបានលឿន ព្រោះវាអាចជួយអ្នកគ្រប់គ្រងរោគសញ្ញា និងការស្រឡាញ់កូនវិញ។ ការបាក់ទឹកចិត្តក្រោយសម្រាលកូនរួច មិនមានមូលហេតុអ្វីឡើយ ប៉ុន្តែ កត្តាផ្លូវកាយ និងផ្លូវចិត្ត អាចដើរតួសំខាន់ក្នុងរឿងនេះ។

ការប្រែប្រួលរាងកាយ
ក្រោយសម្រាលកូនរួច ការថយចុះយ៉ាងខ្លាំងរបស់អ័រម៉ូនភេទក្នុងខ្លួន អាចនឹងធ្វើឲ្យមានបញ្ហាបាក់ទឹកចិត្ត ក្រោយសម្រាលកូនដែរ។ អ័រម៉ូនផ្សេងៗទៀត ដែលផលិតចេញពីក្រពេញទីរ៉ូអ៊ីត ក៏ប្រហែលជាត្រូវថយចុះយ៉ាងស្រួចស្រាវ ដូច្នេះ វានឹងធ្វើឲ្យអ្នកមានអារម្មណ៍ថា អស់កម្លាំង និងបាក់ទឹកចិត្តជាមិនខាន។

បញ្ហាផ្លូវចិត្ត
នៅពេលអ្នកគេងមិនបានគ្រប់គ្រាន់ និងតក់ស្លុតពេក អ្នកប្រហែលជាមានបញ្ហា ក្នុងការដោះស្រាយលើបញ្ហាតិចតួចដែរ។ អ្នកប្រហែលជាភ័យខ្លាច អំពីសមត្ថភាពក្នុងការថែរក្សាកូន ដែលទើបនឹងកើត។ អ្នកប្រហែលជាមានអារម្មណ៍ថា ខ្លួនឯងមិនមានភាពទាក់ទាញ ធុញទ្រាន់នឹងក្លិនខ្លួន ឬយល់ថាខ្លួនឯង បាត់បង់នូវការគ្រប់គ្រងជីវិត។ រាល់បញ្ហាអស់ទាំងនេះ សុទ្ធតែអាចនាំឲ្យមានបញ្ហាបាក់ទឹកចិត្ត ក្រោយសម្រាលបានទាំងអស់៕

ប្រភព៖ Health Cambodia