តំណាងរាស្ត្របក្សប្រឆាំងថា ពលរដ្ឋខ្មែរអាចចូលធ្វើចម្ការវិញនៅតំបន់ជម្លោះព្រំដែន

តំណាងរាស្ត្រគណបក្សសង្គ្រោះជាតិ នៅពុធថ្ងៃនេះ ចុះជួបពលរដ្ឋ និងអាជ្ញាធរនៅខេត្តស្វាយរៀង ដើម្បីផ្សព្វផ្សាយលិខិតរបស់លោក វ៉ា គឹមហុង ដែលមានខ្លឹសារថា ពលរដ្ឋនៅតែមានសិទ្ធិធ្វើស្រែចម្ការនៅតាមព្រំដែន បន្ទាប់ពីវៀតណាមរារាំងពលរដ្ឋខ្មែរមិនឲ្យចូលតំបន់នោះ។

ការចុះជួបនេះ បន្ទាប់ពីតំណាងរាស្ត្រគណបក្សប្រឆាំងលោក អ៊ូ ច័ន្ទឫទ្ធិ បានទទួលពាក្យបណ្តឹងរបស់ប្រជាពលរដ្ឋរាយការណ៍មកថា វៀតណាមបោះតម្រុយបង្គោលព្រំដែនចូលទឹកដីកម្ពុជា ធ្វើឲ្យប៉ះពាល់ដីចម្ការប្រជាពលរដ្ឋចំនួន៣០ហិកតា ស្ថិតនៅភូមិធ្នង់ ឃុំថ្នាធ្នង់ ស្រុករំដួល ខេត្តស្វាយរៀង ដោយមានផ្នូរដូនតាបានបន្សល់ទុកតាំងពីឆ្នាំ១៩៥៩។

លោក អ៊ូ ច័ន្ទឫទ្ធិ ប្រាប់ VOD ថា ក្រោយពីទទួលពាក្យបណ្តឹងនេះ លោកបានស្នើទៅប្រធានសភាឲ្យពិនិត្យ និងសើរើការបោះតម្រុយព្រំដែននៅចន្លោះបង្គោលព្រំដែនលេខ១៤៧-១៤៨ ដែលពលរដ្ឋ អះអាងថា វៀតណាមរំលោភយកដីខ្មែរ។ តែលោកថា ក្នុងលិខិតដែលលោកបានដាក់ទៅសភានោះ ត្រូវបានលោក វ៉ា គឹមហុង ប្រាប់ប្រធានរដ្ឋសភាថា ជារឿងមិនពិត ហើយបញ្ជាក់ថាដីប្រមាណ៣០ហិកតានោះ មិនបានបាត់បង់ទៅវៀតណាមនោះទេ។ លោកថា៖ «ក្នុងលិខិតលោក វ៉ា គឹមហុង បានអះអាងថា ការលើកឡើងរបស់ពួកអ្នកតំណាងរាស្ត្រគណបក្សសង្គ្រោះជាតិហ្នឹង គឺជារឿងមិនពិត ហើយបានបញ្ជាក់ថា ដី ប្រមាណជា៣០ហិកតា នៅក្នុងភូមិធ្នង់ ឃុំថ្នាធ្នង់ ស្រុករំដួល ខេត្តស្វាយរៀង មិនមានការប៉ះពាល់ មិនមានការរារាំងពីអាជ្ញាធរវៀតណាមទេ មានន័យថាប្រជាពលរដ្ឋអាចបង្កបង្កើនផល អាចកាន់កាប់បន្តទៀតខុសពីការលើកឡើងរបស់ប្រជាពលរដ្ឋ ដែលខ្ញុំបានជួប ហើយខ្ញុំក៏បានចុះទៅក៏មានការរារាំងផងដែរ។ អ៊ីចឹងថ្ងៃនេះ ខ្ញុំមកដើម្បីយកលិខិតរបស់លោក វ៉ា គឹមហុង ដើម្បីផ្សព្វផ្សាយជូនប្រជាពលរដ្ឋក៏ដូចជាអាជ្ញាធរមូលដ្ឋានឲ្យបាន ជ្រាប»។

លោក អ៊ូ ច័ន្ទឫទ្ធិ ឲ្យដឹងដែរថា បន្ទាប់ពីទទួលបានលិខិតរបស់លោក វ៉ា គឹមហុង លោកក៏បានយកលិខិតនោះទៅផ្សព្វផ្សាយជូនពលរដ្ឋរស់នៅតំបន់នោះ ឲ្យពួកគាត់ចូលធ្វើដំណាំឡើងវិញ ហើយប្រាប់អាជ្ញាធរឲ្យជួយការពារពលរដ្ឋខ្មែរនៅពេលវៀតណាមមករារាំង ។

ពលរដ្ឋម្នាក់រស់នៅតំបន់នោះមានដីទំហំ២ហិកតា លោក ញ៉ិន ឡន អាយុ៥៧ឆ្នាំ ថ្លែងថាគាត់បានធ្វើស្រែចំការនោះតំបន់ដែលមានជម្លោះនោះតាំងពី យូរណាស់មកហើយ ទើបតែពេលថ្មីៗនេះវៀតណាមបានបោះតម្រុយបង្គោលព្រំដែនចូលក្នុងទឹក ខ្មែរ ធ្វើឲ្យប៉ះពាល់ស្រែចំការពួកគាត់។ លោកបន្តថា កន្លងទៅពលរដ្ឋបានចេញតវ៉ាដែរនៅពេលវៀតណាមចូលបោះតម្រុយនោះ តែវៀតណាមមិនស្តាប់ប្រជាពលរដ្ឋខ្មែរឡើយ។ លោកថា៖ «កាលមុននោះ អត់ឲ្យដាំមែន ដេញខ្ញុំតាំងពី១៩៨៥ ដោយសារវៀតណាមទុកដីនោះជាតំបន់ស ដោយរាជរដ្ឋាភិបាលមិនដោះស្រាយ បានខ្ញុំមិនរស់នៅលើដីហ្នឹង ដល់អត់នៅយូរៗទៅ បោះបង្គោលតម្រុយ បោះមកលើទឹកដីខ្មែរ ខ្ញុំថាបោះអ៊ីចឹងអត់ត្រឹមត្រូវទេបង អត់យុត្តិធម៌»។

អធិការនគបាលស្រុករំដួល លោក ឆោម សំអាត សុំមិនអត្ថាធិប្បាយលើបញ្ហានេះ ដោយស្នើឲ្យទៅសម្ភាសន៍សមត្ថកិច្ចខាងព្រំដែន។ VOD មិនទាន់សុំការអត្ថាធិប្បាយពីសមត្ថកិច្ចព្រំដែនខេត្តស្វាយរៀងបាន នៅឡើយទេ។

លិខិតជំនួយស្មារតីរបស់ប្រធានគណៈកម្មការព្រំដែនកម្ពុជា លោក វ៉ា គឹមហុង ជម្រាបជូនទៅលោក ហេង សំរិន ប្រធានរដ្ឋសភាកន្លងទៅ មានខ្លឹមសារថា អ្វីដែលតំណាងរាស្ត្រគណបក្សសង្គ្រោះជាតិលើកឡើងថាបង្គោលលេខ១៤៧-១៤៨ ដែលថាវៀតណាមបោះចូលទឹកដីកម្ពុជា មិនពិតទេ។ លោក វ៉ា គឹមហុង អះអាងថា បើយោងតាមផែនទី Bonne ខ្នាត១/១០០០០០ ប្រជាពលរដ្ឋខ្មែរនៅតែអាចបង្កបង្កើនផលលើដី៣០ហិកតាបានដូចមុន ដោយយោងលើអនុស្សារណៈយោគយល់គ្នា កាលពីថ្ងៃ២៣ ខែមេសា ឆ្នាំ២០១១ ស្តីពីការកែសម្រួលខ្សែព្រំដែនគោកនៅតំបន់នោះ ដែលបានរក្សាដីចម្ការស្វាយចន្ទីទាំងមូល និងផ្នូរដូនតារបស់ខ្មែរឲ្យនៅដដែល៕

សូមសរសេរមកលោក ឡាយ សាមាន តាមរយៈ samean@vodhotnews.com