ស្ដេចគ្រឿងញៀនម៉ិកស៊ីកូចំណាយ ៥០លានដុល្លារឲ្យវិស្វករជីកដីរត់គេចខ្លួនចេញពីគុក

ស្ដេចជួញគ្រឿងញៀន El Chapo ដែលប៉ូលិសចាប់ខ្លួនលើកចុងក្រោយឆ្នាំ២០១៤

រហូតមកដល់ពេលនេះ ប៉ូលិសមិនទាន់ប្រទះស្រមោលសូម្បីបន្តិច បន្ទាប់ពីស្ដេចគ្រឿងញៀនម្នាក់ ចំណាយប្រាក់រាប់លានដុល្លារ ជួលក្រុមវិស្វករជីករូងក្រោមដីរត់គេចខ្លួនបាត់។ ក្រោយពីឃើញវិធីសាស្ត្រគេចខ្លួនរបស់ឧក្រិដ្ឋជនដ៏គ្រោះថ្នាក់រូបនេះ លោកអ្នកប្រាកដជាមានការភ្ញាក់ផ្អើល។

ការដ្ឋានសាងសង់រូងក្រោមដី

សំណង់រូងក្រោមដី

មេដឹកនាំក្រុមសង្គមងងឹត និងជាស្ដេចជួញដូរគ្រឿងញៀនដ៏កក្រើករូបនេះមានឈ្មោះ El Chapo ដែលត្រូវចាប់ខ្លួនលើកចុងក្រោយកាលពីឆ្នាំ២០១៤។ ក្រុមប៉ូលិស ម៉ិកស៊ីកូបានឃុំឃាំងបុគ្គលដ៏មានគ្រោះថ្នាក់ម្នាក់នេះ ក្នុងពន្ធនាគារដ៏រឹងមាំមួយ ក្រោមការយាមកាមយ៉ាងតឹងតែង។
អ្វីដែលនឹកស្មានមិនដល់បានកើតឡើងកាលពីថ្ងៃសៅរ៍ ក្រោយពេលមេដឹកនាំក្រុមអ្នកលេង Sinaloa Cartel រូបនេះ រត់គេចខ្លួនចេញពីពន្ធនាគារដោយសុវត្ថិភាពនៅវេលាម៉ោងជិត ៩យប់។ ការរត់គេចខ្លួន ធ្វើឡើងតាមរយៈរូងក្រោមដី ដែលជីកឡើងដោយក្រុមវិស្វកររ៉ែជាច្រើននាក់។

ម៉ូតូជាមធ្យោបាយក្នុងរូងក្រោមដី

រូងគេចខ្លួនរបស់មេជួញដូរគ្រឿងញៀនរូបនេះ មានចម្ងាយប្រមាណ ១,៤៥គីឡូម៉ែត្រ និងជីកលុងទៅក្រោមដីជម្រៅជិត ១០ម៉ែត្រ។ ចំណែកទំហំរូងមានរង្វាស់ទទឹងជាង ៦តឹក និងកម្ពស់ប្រមាណ ១,៧០ម៉ែត្រ។ ដើម្បីជីកដល់ពន្ធនាគារ ក្រុមវិស្វករត្រូវយកដីចេញ ៣២៥០តោន ស្មើនឹង ៣៧៩ឡានដឹកដីធំៗ។
បើតាមប្រភពពីអ្នកជិតខាងការដ្ឋានបានឲ្យដឹងថា មនុស្សមួយក្រុមមានគ្នាមិនលើសពី ៤នាក់ ដែលបានបង្កើតរូងគេចខ្លួនដ៏អស្ចារ្យនេះឡើង។ ពូកគេបានធ្វើការជាមធ្យម ១០ម៉ោងក្នុងមួយថ្ងៃ អស់រយៈពេលប្រហែល ១ឆ្នាំ។ នៅក្នុងរូងនោះ មានបំពាក់ទៅដោយអំពូលភ្លើង អុកស៊ីហ្សែនសម្រាប់សង្គ្រោះបន្ទាន់ និងរន្ធឲ្យខ្យល់ចេញចូល។

ពីការដ្ឋានទៅពន្ធនាគារមានចម្ងាយប្រមាណ ១,៤៥គីឡូម៉ែត្រ

បើតាមសារព័ត៌មាន Daily Mail បានបង្ហាញថា រូងក្រោមដីនេះអាចត្រូវចំណាយប្រាក់រហូតដល់ ៥០លានដុល្លារដើម្បីសាងសង់ឡើង។ បន្ទាប់ពីស្ដេចគ្រឿងញៀនរូបនេះរត់គេចខ្លួនបាត់ រដ្ឋាភិបាលម៉ិកស៊ីកូបានប្រកាសថានឹងផ្ដល់ប្រាក់រង្វាន់ ៣,៨លានដុល្លារ ដល់ជនណាដែលផ្ដល់ដំណឹង ប៉ុន្តែរហូតមកដល់ថ្ងៃនេះគ្មានសញ្ញាណអ្វីបន្តិចឡើយ៕