រាជធានីភ្នំពេញ ៖ ដើម្បីជួយលើកកម្ពស់ និងផ្តល់តម្លៃដល់កីឡាករបាល់ទាត់ខ្មែរ ព្រមទាំងរួមចំណែកក្នុងការអភិវឌ្ឍវិស័យកីឡានៅប្រទេសកម្ពុជា ក្រុមហ៊ុន META SPORT ដែលជាអ្នកនាំចូលផលិតផលកីឡាម៉ាក Puma ផ្តាច់មុខនៅប្រទេសកម្ពុជា បានសម្រេចចុះកុងត្រារយៈពេល២ឆ្នាំ ជាមួយកីឡាបាល់ទាត់ដ៏ល្បីរបស់ក្លិបណាហ្គាវើល គឺកីឡាករគួច សុកុម្ភៈ ដើម្បីធ្វើជាតំណាងផ្សព្វផ្សាយផលិតផលរបស់ខ្លួន ។
លោកកុក កាន់រតនា ប្រធានក្រុមហ៊ុន META SPORT តំណាងផលិតផល Puma ប្រចាំនៅប្រទេសកម្ពុជាបានឲ្យដឹងថា លោកមានចិត្តសប្បាយរីករាយណាស់ដែលបានចូលរួមចំណែកជួយដល់កីឡាករបាល់ទាត់ខ្មែរ និងជួយបង្កើនការអភិវឌ្ឍវិស័យកីឡាក្នុងប្រទេសកម្ពុជា។ នាពេលខាងមុខ លោកនឹងបន្តចុះកុងត្រាជាមួយកីឡាករផ្សេងទៀត និងធ្វើសកម្មភាពជាច្រើនដើម្បីជួយបណ្តុះបណ្តាលកីឡាករខ្មែរជំនាន់ក្រោយ ។
លោកលើកឡើងថា យើងដឹងហើយថា អ្នកកីឡាមិនសូវគេចាប់អារម្មណ៍ច្រើនដូចអ្នកសិល្បៈទេ ពោលគឺភាគច្រើនគេយកអ្នកសិល្បៈធ្វើជាតំណាងផ្សព្វផ្សាយឲ្យផលិតផលរបស់គេ ប៉ុន្តែសម្រាប់ Puma គឺផ្តោតលើកីឡា ដូច្នេះហើយទើបយើងបន្តចុះកុងត្រាជាមួយកីឡាករ គួច សុកុម្ភៈ ម្នាក់ទៀតបន្ទាប់ពីយើងបានចុះកុងត្រាជាមួយកីឡាករឃួន ឡាបូរ៉ាវី កាលពីដើមខែនេះ ។
កីឡាករគួច សុកុម្ភៈ បាននិយាយថា រូបគេពិតជារំភើបខ្លាំងណាស់ ដោយក្រុមហ៊ុនផលិតផលកីឡាម៉ាកល្បី Puma សម្រេចជ្រើសរើសរូបគេក្នុងការផ្សព្វផ្សាយ ។ អ្វីដែលក្រុមហ៊ុនខាងលើផ្តល់ជូននេះ គឺជាការលើកទឹកចិត្តដល់កីឡាករផ្សេងទៀតឱ្យខិតខំប្រឹងប្រែងដើម្បីមានឱកាសក្លាយជាកីឡាករដ៏ល្បី និងទទួលបានឱកាសដូចរូបគេដែរ ។
សូមបញ្ជាក់ផងដែរថា កាលពីថ្ងៃទី៨ មិថុនាឆ្នាំ២០១៥ កន្លងទៅ Puma ប្រចាំនៅកម្ពុជាបានចុះកុងត្រារយៈពេលពីរឆ្នាំជាមួយកីឡាករដ៏ល្បីរបស់ក្លិបបឹងកេត អង្គរ ឃួន ឡាបូរ៉ាវី ដើម្បីធ្វើជាតំណាងផ្សព្វផ្សាយផលិតផលរបស់ខ្លួន ហើយពេលនេះបន្តចុះកុងត្រាជាមួយកីឡាករឆ្នើម គួច សុកុម្ភៈ ថែមទៀតដែលអ្នកទាំងពីរសុទ្ធតែជាសមាជិកក្រុមបាល់ទាត់ជម្រើសជាតិកម្ពុជា ។
Puma ជាផលិតផលកីឡាមួយដែលជាប់ចំណាត់ថ្នាក់ពិភពលោកក្នុងចំណោមផលិតផលកីឡាម៉ាកល្បីៗកំពុងទទួលបានការពេញនិយមជាខ្លាំង ។ ផលិតផលកីឡា Puma មាន៤ប្រភេទផ្សេងគ្នា គឺសម្ភារសម្រាប់រត់ប្រណាំង សម្ភារសម្រាប់បាល់ទាត់ សម្ភារសម្រាប់ដើរកម្សាន្ត (Life style) និងសម្ភារសម្រាប់ប្រណាំងយានយន្ត ។ សព្វថ្ងៃ Puma បានកំពុងឧបត្ថម្ភដល់ក្រុមបាល់ទាត់កំពូលនៅអង់គ្លេស គឺក្រុមកាំភ្លើងធំ Arsenal និងកីឡាករល្បីៗជាច្រើនទៀត ។ ក្រៅពីវិស័យបាល់ទាត់ Puma ក៏ឧបត្ថម្ភដល់កំពូលអ្នករត់ប្រណាំងលេខ១លើលោកគឺ Usain Bolt ផងដែរ ។ កីឡាករទាំង២រូបនេះជាកីឡាករឆ្នើមនៅក្នុងក្រុមជម្រើសជាតិឈុតធំកម្ពុជា ដូច្នេះការសម្រេចចិត្តរបស់ក្រុមហ៊ុនក្នុងការជ្រើសរើសយកកីឡាករគួច សុកុម្ភៈ និងកីឡាករឃួន ឡាបូរ៉ាវី ជាទូតសុច្ឆន្ទៈរបស់ក្រុមហ៊ុន គឺជាកិតិ្តយសណាស់សម្រាប់កីឡាករជម្រើសជាតិកម្ពុជា ហើយសង្ឃឹមថា នឹងមានកីឡាឆ្នើមជាច្រើនរូបទៀតនឹងដើរតាមគន្លងកីឡាករទាំង២រូបនេះ ៕
អត្ថបទដើមពី៖ កោះសន្តិភាព
0 comments:
Post a Comment