ហេតុផលសំខាន់ៗបញ្ជាក់ថាទោះ ថ្ងៃ ខែ ឆ្នាំ មិនល្អក៏អាចរៀបការជាមួយគ្នាបានដែរ

តាំងពីបុរាណរហូតមកដល់បច្ចុប្បន្ន ការសម្រេចចិត្តឱ្យកូនចៅ មានប្ដីប្រពន្ធ ឪពុកម្ដាយ ទាំងសងខាងតែងទៅរកគ្រូហោរ ទស្សន៍ទាយមើលសម្ពង្សធាតុ បូកផ្សំមើលខែឆ្នាំ។ ចុះបើខែឆ្នាំមិនល្អ មិនអាចរៀបការជាមួយគ្នាបានឬក៏យ៉ាងម៉េច? ខាងក្រោមនេះជាទស្សនៈយល់ឃើញរបស់លោកសាស្ត្រាចារ្យ បង្រៀនមុខវិជ្ជា សង្គម និងមនុស្សនៅសកលវិទ្យាល័យឯកជនមួយ ទាក់ទងនឹងបញ្ហានេះ៖

១. ជាទំនៀមទម្លាប់តាំងពីបុរាណ

បើតាមការលើកឡើងរបស់សាស្ត្រាចារ្យ សិរី រតនសម្បត្តិ បានលើកឡើងថា ការទស្សន៍ទាយមើលខែឆ្នាំ និងផ្សំពង្សនាគកូនប្រុសស្រីនេះ ជាទំនៀមទម្លាប់តាំងពីយូរអង្វែងណាស់មកហើយ។ សព្វថ្ងៃមិនថាតែនៅ ជនបទ ឬទីក្រុង នៅតែរកគ្រូហោរទស្សន៍ទាយ រកជោគជតារាសីមុនសម្រេចចិត្តឱ្យកូនរៀបការនេះ អាចមកពីហេតុផលគោរពទៅតាមទំនៀមពីបុរាណ។ ប៉ុន្តែជាក់ស្ដែងមិនបានជឿទាំងស្រុងថាល្អ ឬមិនល្អ ទើបអាចរៀបការបាននោះទេ ព្រោះការសម្រេចចិត្តរៀបការ នៅតែអាស្រ័យភាគីទាំងសងខាងដដែល ប្រសិនបើស្រឡាញ់គ្នាពិតប្រាកដមិនអាចបែកគ្នាដោយសារខែឆ្នាំនេះឡើយ។

២. ពូជពង្សវង្សត្រកូល

សាស្ត្រាចារ្យបង្រៀនមុខវិជ្ជា សង្គម និងមនុស្សរូបនេះលើកឡើងបន្ថែមទៀតថា ភាគច្រើនការផ្សំផ្គុំកូនចៅឱ្យរៀបការជាមួយនរណាម្នាក់ តាំងពីសង្គមពីដើម រហូតមកដល់បច្ចុប្បន្ននេះ ប្រជាពលរដ្ឋខ្មែរនៅផ្ដោតទៅលើពាក្យទំនៀមមួយថា "ធ្វើស្រែឱ្យមើលស្មៅទុកដាក់កូនចៅឱ្យមើលផៅសន្ដាន"។ ប្រសិនបើពូជពង្សល្អ គំនិតមារយាទល្អ វ័យឆ្លាតក្នុងការរកស៊ី ស្លូតបូតស្មោះត្រង់ហើយនោះ ទោះខែឆ្នាំមិនល្អ ក៏មិនជាបញ្ហាអ្វីឡើយ។

៣. ការឱ្យតម្លៃផ្សេងក្រៅពីខែឆ្នាំមិនអាចកាត់ថ្លៃបាន

គុណតម្លៃជាច្រើនក្រៅពីខែឆ្នាំ គឺ មើលទៅលើពូជពង្ស មើលទៅលើចរិតលក្ខណៈ សីលធម៌ សុភាពរាបសា ហើយក៏គួបផ្សំនឹងការមើលខែឆ្នាំទៀតផងដែរ។ ក្នុងករណីពេញចិត្តនឹងគុណសម្បត្តិសាមីជនហើយនោះ ទោះខែឆ្នាំ ល្អតែ ៥០% ក៏គេមិនរាថយដែរ។

៤. ការទស្សន៍ទាយជាទស្សនៈបែបពិសោធន៍និយម

ពង្ស ធាតុ ខែ ឆ្នាំកំណើត កូនប្រុសស្រី និងការទស្សន៍ទាយតាមបែបក្បួនហោរាសាស្ត្រ គឺជាទស្សនៈបែបពិសោធន៍និយម ឬចំណាំនិយម សម្រេចយកតួលេខភាគច្រើន។ដូច្នេះមិនអាចទទួលស្គាល់ទាំងស្រុងលើជើងលេខនោះឡើយ។ តាមការសង្កេតផ្ទាល់ក្នុងសង្គមខ្មែរ គេតែងឃើញថា៖

-@គូខ្លះផ្សំផ្គុំធាតុពង្សត្រូវល្អហើយ ប៉ុន្តែបែរជាមានជីវភាពក្រីក្រ តោកយ៉ាក ជួនកាលឈ្លោះទាស់ទែងដល់ថ្នាក់លែងលះគ្នាក៏មាន។

-@ជួនកាលជីវិតប្ដីប្រពន្ធក៏រីកដុះដាល ចម្រុងចម្រើន ធូរធារ ដូចក្នុងទំនាយ ជួនកាលក៏អត់។

-@ប្ដីប្រពន្ធខ្លះសម្ពង្សធាតុមិនត្រូវគ្នា ឬក៏មិនបានរកគ្រូទស្សន៍ទាយផង តែរស់នៅជាមួយគ្នាបានសុខសាន្ត សុខដុមរមនា ល្អូកល្អើនដល់ចាស់កោងខ្នង៕

អត្ថបទ៖ ថោ ច័ន្ទឬទ្ធិ

ប្រភពពី៖ Sabay