គុណសម្បត្តិ ១២ យ៉ាង នៅពេលគ្មានស្នេហា

ខាងក្រោមនេះ គឺជាគុណសម្បត្តិទាំង ១២ យ៉ាង ពេលដែលយើងមិនមានស្នេហា ព្រោះថា ស្នេហា ពេលខ្លះក៏ល្អ ហើយពេលខ្លះក៏កខ្វក់នឹកស្មានសឹង តែមិនដល់ដែរ ។ ត្រូវទេ? តែទោះយ៉ាងណា មនុស្សលើលោកនៅតែត្រូវការស្នេហា ចៀងមិនផុតឡើយ មិនថាតិច ឬច្រើន នោះទេ ។ ប៉ុន្តែពេលនេះ ចូរអ្នកក្រឡេកមើលពីគុណសម្បត្តិ ដែល គ្មានវាសិនទៅ ចាំលើកក្រោយ មហាស្នេហា នឹងនាំអារម្មណ៍ លោកអ្នក មកមើលពីគុណវិបត្តិ ពេលដែលគ្មានវាវិញម្តង៖

១. មិនខាតពេលវេលា
អ្នកមិនចាំបាច់យកពេលវេលាទៅខ្វាយខ្វល់គិតពីគូស្នេហ៍របស់អ្នកទៀតទេ។ ជឿទៅថា ពេលដែលគ្មានស្នេហា ជីវិតរបស់អ្នកច្បាស់ជាមានពេលទំនេរច្រើន ទៀតសោតប្រហែលជាអាចធ្វើឲ្យអ្នកសល់ពេលធ្វើរឿងដែលមានប្រយោជន៍ជាច្រើនក៏ថាបាន។

២. ដេកលក់ស្រួល
ជាការពិតណាស់ ពេលដែលគ្មានស្នេហា អ្នកប្រាកដជាមិនចាំបាច់ឈឺក្បាល គិតរឿងអន់ចិត្ត ឈ្លោះគ្នា ទាំងនោះទៀតទេ ដូច្នេះ អ្នកប្រាកដជាអាចដាក់ក្បាលដល់ខ្នើយភ្លាមលក់ភ្លាមជាមិនខាន។

៣. មិនមានការរំខានពីការស៊ីញ៉ូទូរស័ព្ទ
ធុញថប់មែនទេ ដែលទូរស័ព្ទតែងតែទទួលការស៊ីញ៉ូជាញឹកញាប់? ពេលមានស្នេហា ទូរស័ព្ទពិតជារវល់ខ្លាំងណាស់ តែពេលគ្មានស្នេហាវិញណា ធានាថា ទូរស័ព្ទទុកចោលមួយថ្ងៃក៏គ្មានអ្នកតេរចូលដែរ ដូច្នេះអ្នកអាចទៅរៀន ឬទៅធ្វើការដោយស្ងប់ចិត្តបានហើយ ប្រសិនបើអ្នកភ្លេចយកទូរស័ព្ទទៅតាម។

៤. មិនបាច់បារម្ភពីរូបសម្រស់
ទោះតិចឬច្រើន ពេលមានស្នេហា ច្បាស់ណាស់ថា មនុស្សម្នាក់ៗតែងតែចង់ឲ្យខ្លួនឯងស្អាត ព្រោះដើម្បីមានទំនុកចិត្តពេលទៅជួបគូស្នេហ៍របស់ខ្លួន។ ដូច្នេះគុណសម្បត្តិក្នុងការមិនខ្វាយខ្វល់ពីរូបសម្រស់របស់ខ្លួនឯងនេះ ពិតជាធ្វើឲ្យការដែលគ្មានស្នេហា គឺជារឿងមួយដ៏ល្អពិតមែន។

៥. អាចញ៉ាំអាហារគ្រប់ទីកន្លែងបានភ្លាមៗ
ជឿទៅថាពេលមានស្នេហា រឿងញ៉ាំរឿងអីនេះ គឺជារឿងដ៏គួរឲ្យឈឺក្បាលបំផុត ព្រោះច្រើនតែសម្រេចចិត្តមិនដាច់ស្រេចថា គួរទៅញ៉ាំអី ជាពិសេសខ្លាចបំផុតពាក្យថា ញ៉ាំអីក៏បាន។ ពេលគ្មានស្នេហា អ្នកលែងឈឺក្បាលវិលមុខរឿងអស់ទាំងនេះទៀតហើយ អ្នកអាចញ៉ាំអី្វក៏បាន ពេលណាក៏បាន ស្រេចតែចិត្តរបស់អ្នកយ៉ាងរំភើយ។

៦. មិនបាច់បារម្ភពីការផ្ញើសារនៅពាក់កណ្តាលអធ្រាត្រ
គ្មានស្នេហា គ្មានសង្សារ ហើយក៏គ្មានអ្នកត្រូវមកផ្ញើសារកណ្តាលអធ្រាត្រទៀតដែរ។ អញ្ចឹងហើយ គេងលក់ឲ្យស្ងប់ចិត្តចុះ ព្រោះដូចដែលប្រាប់អញ្ចឹង ទូរស័ព្ទរបស់អ្នកចង់ទុកចោលមួយខែទៀត ក៏គ្មានអ្នកផ្ញើសារមករំខានដែរ។

៧. អាចនិយាយទូរស័ព្ទជាមួយអ្នកណាក៏បាន
វាអាចនឹងជាគុណសម្បត្តិមួយសម្រាប់មនុស្សដែលចូលចិត្តនិយាយលេងជាមួយភេទផ្ទុយគ្នាច្រើន ដូច្នេះពេលដែលគ្មានស្នេហា អ្នកមិនចាំបាច់ភ័យព្រួយរឿងគូស្នេហ៍របស់តេរមកមិនចូល ព្រោះអ្នកជាប់រវល់និយាយទូរស័ព្ទជាមួយអ្នកណាម្នាក់ នាំឲ្យគេខឹងខ្ញាល់ដាច់ក្បាលដាច់កន្ទុយអីអស់ទាំងនោះទៀតទេ ទុកចិត្តចុះ និយាយជាមួយមនុស្សមួយរយនាក់ទៀតក៏និយាយទៅ។

៨. លែងលឺសម្លេងថា “នៅណាហ្នឹង? កំពុងធ្វើអី” ទៀតហើយ
ធុញនឹងលឺពាក្យទាំងនេះមែនទេ? ធុញនឹងត្រូវលើកទូរស័ព្ទ ហើយប្រាប់ដដែលៗថា អ្នកកំពុងជាប់រវល់ គ្មានពេលទៅធ្វើរឿងអត់ប្រយោជន៍ទេ តែប្រាប់ហើយអ្នកម្ខាងទៀតមិនជឿ? ទុកចិត្តចុះ ពេលគ្មានស្នេហា អ្នកនឹងលែងលឺពាក្យទាំងនោះទៀតហើយ។

៩. អាចដើរលេងជាមួយអ្នកណាក៏បាន
ចង់ដើរលេងដល់ណា ស្មើណា គឺជាសិទ្ធិសេរីភាពរបស់អ្នក គ្រាន់តែពេលគ្មានស្នេហា អ្នកអាចដើរលេងដោយធូរចិត្ត ព្រោះមិនចាំបាច់ឆ្លៀតពេលផ្ញើសារជំរាបប្រាប់អ្នកម្ខាងទៀតនោះទេ។

១០. មិនចាំបាច់ស្តាប់ការនិយាយរឿងកំប្លែងដដែលៗ
វាអាចនឹងជារឿងសាមញ្ញមួយសម្រាប់គូស្នេហ៍ទូទៅ ដែលត្រូវមកស្តាប់រឿងកំប្លែងដដែលៗពីភាគីម្ខាងៗ ព្រោះតែម្នាក់ៗអស់រឿងនិយាយ មានតែយករឿងដដែលៗមកនិយាយ។ ដូច្នេះបើអ្នកធុញ អ្នកមិនចូលចិត្ត ការគ្មានស្នេហា ច្បាស់ជាជួយអ្នកបាន។

១១. មិនបាច់ភ័យខ្លាចភាពក្បត់

កាលបើមានដៃគូ គឺចៀសមិនផុតពីការតាម Care តាមលួងលោង និង តាមសង្កេតរាល់ សកម្មភាពរបស់គេ ជាពិសេស ពេលដែលដៃគូម្ខាងមាន ចរិកប្រែប្រួល ដោយសារ លួច មានគូកំណាន់ដទៃ ហើយលាក់បាំងនៅពីក្រោយខ្នងយើង ។

១២. មិនចាំបាច់ឆ្លងជម្ងឺនានា

បើដៃគូស្នេហាមានភាពស្មោះត្រង់ គឺមិនជាបញ្ហានោះទេ ចុះបើអ្នកនោះជា មនុស្សខិលខូច ហើយលួចមានដៃគូច្រើន ដោយមិនអោយយើងដឹងទៅវិញ ហើយបើគេភ្លាំងភ្លាត់នាំឲ្យ មានរោគផ្សេងៗនោះ យើងប្រហែលជាអាចក្លាយជាជនរងគ្រោះផង ក៏ថាបាន! អូ! មិនលែង ចូលល្បែងបែបនេះទេ ព្រោះថាគួរឲ្យរអើម និងគួរឲ្យខ្លាចណាស់ ។

Copyrighted: Moha Sneha