វ៉ា គឹមហុង ថាផែនទីសម្រាប់បោះបង្គោលព្រំដែនខាងកើតបោះពុម្ពនៅវៀតណាម

ភ្នំពេញៈ នៅក្នុងសន្និសីទសារព័ត៌មានដ៏កម្រមួយស្តីពីផែនទីសម្រាប់យកមកធ្វើ ជាត្រីវិស័យក្នុងការកំណត់បង្គោលព្រំដែនកម្ពុជា វៀតណាមដែលកំពុងតែមានវិវាទដែលមានការចូលរួមសួរដេញដោលពី តំណាងរាស្ត្រគណបក្សប្រឆាំងកាលពីម្សិលមិញលោក វ៉ា គឹមហុង ទេសរដ្ឋមន្រ្តីទទួលបន្ទុកកិច្ចការព្រំដែនបានគូសបញ្ជាក់ថាផែនទីដែល បានប្រើសម្រាប់កំណត់ខណ្ឌសីមាត្រូវបានបោះពុម្ពដោយវៀតណាម។

លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន លើកបង្ហាញផែនទីសម្រាប់បោះបង្គោលព្រំដែនខាងកើតកាលពីថ្ងៃម្សិលមិញ ។ ហេង ជីវ័ន

លោក គឹមហុង បានថ្លែងថាផែនទីនេះត្រូវបានកែសម្រួលដោយភាគីវៀតណាមប៉ុន្តែលោក បានសង្កត់ធ្ងន់ថាផែនទីនេះគឺដូចគ្នាទៅនឹងផែនទី 1/100.000 ដែលបានតម្កល់នៅអង្គការសហប្រជាជាតិនៅឆ្នាំ ១៩៦៤ ដោយអតីតព្រះមហាក្សត្រ នរោត្តម សីហនុ។ ផែនទីនេះត្រូវបានចម្លងពីអង្គការសហប្រជាជាតិហើយបានយកទៅបោះពុម្ព នៅវៀតណាមដោយបានចំណាយពេលមួយខែសម្រាប់ធ្វើការកែសម្រួលផែនទី នេះ។

លោក វ៉ា គឹមហុង គូសបញ្ជាក់ថា៖ «ខ្ញុំសូមជម្រាបថាអ្វីដែលយើងបានស្នើសុំ [វៀតណាម] ធ្វើ យើងបានចែងនៅក្នុងសន្ធិសញ្ញាបំពេញបន្ថែមឆ្នាំ ២០០៥ ក្នុងការកំណត់ព្រំដែន។ យើងត្រូវការផែនទីស ដែលយកខ្សែបន្ទាត់ផែនទី 1/100.000 លើផែនទី UTM។ ផែនទី ដែលយើងស្នើវៀតណាមឲ្យថតចម្លងគឺជាផែនទីពណ៌សដោយគ្មានខ្សែបន្ទាត់ ព្រំដែន។ ខ្ញុំចង់ប្រាប់អ្នកទាំងអស់គ្នាថាយើងបានអនុញ្ញាតឲ្យប្រតិភូយើង ធ្វើការពេញមួយខែនៅទីក្រុងហាណូយ»។

ទោះយ៉ាងណា លោក គឹមហុង ក៏បានការពារចំណុចសំខាន់នៃផែនទីដែលបានកែសម្រួលនៅប្រទេសវៀតណាម ផងដែរ ដោយអះអាងថារយៈពេលធ្វើការកែសម្រួលមួយខែពេញនៅក្នុងទីក្រុងហាណូយ ផ្ទៃផែនទីចំនួន ២៤០ ត្រូវបានបោះពុម្ពសម្រាប់កំណត់បង្គោលព្រំដែនជាមួយវៀតណាមដើម្បី ចុះហត្ថលេខាដោយប្រធានគណៈកម្មាធិការព្រំដែនទាំងពីរមុនពេលអនុម័ត ប្រើប្រាស់ផែនទីទាំងនេះ។

រដ្ឋាភិបាលបង្ហាញផែនទី ដែលប្រើសម្រាប់ចរចាព្រំដែនជាមួយវៀតណាម

លោកថ្លែងថា៖ «[យើង] មិនយកផែនទីក្លែងក្លាយ [មកប្រើ]ទេ។…យើងបានយកផែនទីពួកគេមកប្រើព្រោះផែនទីដែលពួកគេបាន បោះពុម្ពគឺជាផែនទីស ស្ថិតក្រោមការត្រួតពិនិត្យរបស់យើង ប្រសិនបើវាខុស… យើងក៏មិនទទួលយកដែរ»។

លោកបន្តថា ខ្សែបន្ទាត់ព្រំដែនដែលត្រូវបានគូសនៅលើផែនទីដោយក្រុមការងារមិន អាចលម្អៀងទេ ដោយលោកអះអាងថាក្រុមការងារកម្ពុជាបានការពារគ្រប់ចំណុចនៃផែនទី ទាំងនេះ។

លោកបន្ថែមថា៖ «អ្វីដែលរដ្ឋធម្មនុញ្ញបានអនុញ្ញាតឲ្យពួកយើងធ្វើ យើងបានអនុវត្តតាម។ នេះគឺយើងត្រូវគោរពទាំងស្រុង។ រាជរដ្ឋាភិបាលបានធ្វើការងារនេះមិនមែនគ្មានតម្លាភាពទេវាជាបញ្ហា ព្រំដែនជាបញ្ហារសើប»។

ប៉ុន្ដែតំណាងរាស្រ្តគណបក្សសង្គ្រោះជាតិដែលបានចូលរួមនៅក្នុង សន្និសីទសារព័ត៌មាននោះមិនឯកភាពតាមការបញ្ជាក់របស់លោក វ៉ា គឹមហុង ឡើយដោយបានអះអាងថាលោក គឹមហុង ប្រើផែនទីខុសដើម្បីកំណត់បង្គោលព្រំដែនជាមួយនឹងភាគីវៀតណាមដោយបាន លើកឡើងថា ផែនទីកំណត់បង្គោលព្រំដែននៅខេត្តកំពត វៀតណាមបានដាំបង្គោលព្រំដែនចូលក្នុងទឹកដីកម្ពុជាប្រមាណជាង ១ គីឡូម៉ែត្រ។

ក្នុងអំឡុងសន្និសីទសារព័ត៌មានលោក អ៊ុំ សំអាន បានផ្ទៀងផ្ទាត់ផែនទីដែលលោកមានជាមួយនឹងផែនទីរបស់លោក វ៉ា គឹមហុង ហើយលោកបញ្ជាក់ថា ផែនទីរបស់លោក និងផែនទីរបស់លោក គឹមហុង គឺខុសគ្នា។

លោក សំអាន បន្តថា៖ «ខ្ញុំបានពិនិត្យមើល [ផែនទីរបស់លោក វ៉ា គឹមហុង] ឃើញថាផែនទីរបស់គាត់គឺគ្មានបោះត្រាទេ។ ផែនទីដែលបានតម្កល់នៅអង្គការសហប្រជាជាតិគឺមានត្រា។ ខ្ញុំបានផ្ទៀងផ្ទាត់ផែនទីរបស់ខ្ញុំជាមួយនឹងគាត់ឃើញថាមានការ បាត់បង់ដីនៅខេត្តកំពត តាកែវ និងត្បូងឃ្មុំ»។

លោកបន្ថែមថាយើងមិនអាចទទួលយកការបង្ហាញទាំងអស់របស់លោក គឹមហុង ក្នុងសន្និសីទសារព័ត៌មាននេះបានទេដោយសារតែផែនទីរបស់លោក គឹមហុង បានបង្កើតឡើងបន្ទាប់ពីសន្ធិសញ្ញាឆ្នាំ ១៩៨៤ ដែលកម្ពុជាស្ថិតក្រោមការគ្រប់គ្រងរបស់វៀតណាម។ លោក សំអាន បន្តថា៖ «យើងនៅតែទាមទារឲ្យគាត់ផ្តល់ច្បាប់ចម្លងនៃផែនទីរបស់គាត់មកឲ្យ យើងដើម្បីផ្ទៀងផ្ទាត់ជាមួយនឹងតំណាងរាស្រ្ត ដើម្បីយើងអាចដឹងថាកន្លែងណាបាត់ដី ប៉ុន្តែគាត់នៅតែមិនឲ្យ»។

តំណាងរាស្ត្របក្សប្រឆាំងផ្ទៀងផ្ទាត់ផែនទីនៅក្នុងសន្និសីទកាសែតកាលពីម្សិលមិញ។ ហេង ជីវ័ន

តំណាងរាស្ត្របក្សប្រឆាំងផ្ទៀងផ្ទាត់ផែនទីនៅក្នុងសន្និសីទកាសែតកាលពីម្សិលមិញ។ ហេង ជីវ័ន

លោក សំអាន និងលោក រៀល ខេមរិន្ទ្រ តំណាងរាស្រ្តម្នាក់ទៀតរបស់គណបក្សសង្គ្រោះជាតិបានសួរដេញដោលធ្វើឲ្យ មានការប្រកែកគ្នាតឹងសរសៃកនៅក្នុងសន្និសីទកាសែតកាលពីម្សិលមិញ។

លោកខេមរិន្ទ្របានចោទសួរលោក គឹមហុង ថាតើតំបន់ដែលវៀតណាមចូលមកវ៉ៃលោក និងប្រជាពលរដ្ឋខ្មែរឲ្យរងរបួសនៅក្នុងខេត្តស្វាយរៀងខណៈទៅមើល ព្រំដែនកាលពីសប្តាហ៍មុនជាដីខ្មែរ ឬជាដីវៀតណាម?

លោក គឹមហុង បានឆ្លើយថា៖ «តាមយើងដឹងនៅទីនោះវៀតណាមបានធ្វើស្រែចូលមកក្នុងដីយើងធ្វើយូរ ហើយ»។ ប៉ុន្តែតាមគោលការណ៍ថ្ងៃ ១៧ មករាឆ្នាំ ១៩៩៥ អ្នកណាធ្វើនៅកន្លែងណាគឺត្រូវធ្វើនៅកន្លែងហ្នឹងដោយរក្សា ស្ថានភាពឲ្យនៅដដែលរហូតដល់មានការបោះបង្គោលព្រំដែនជាស្ថាពរ។

បន្ទាប់ពីសន្និសីទកាសែតអ្នកតំណាងរាស្ត្រគណបក្សប្រឆាំងមិនត្រូវ បានអនុញ្ញាតឲ្យនិយាយទៅកាន់អ្នកយកព័ត៌មាននៅទីស្តីការ គណៈរដ្ឋមន្រ្តីទេ។ កងសន្តិសុខបានព្យាយាមបណ្តេញតំណាងរាស្រ្ត និងអ្នកសារព័ត៌មានចេញ។

លោក សំអាន ថ្លែងថា៖ «នេះគឺជាការបិទសិទ្ធិរបស់តំណាងរាស្រ្តដោយគេហាមឃាត់តំណាងរាស្រ្ត មិនឲ្យសម្ភាសជាមួយអ្នកសារព័ត៌មានដើម្បីរាយការណ៍ទៅប្រជាពលរដ្ឋ។ នេះមិនមែនជាអគារលោក សុខ អាន [រដ្ឋមន្រ្តីទទួលបន្ទុកទីស្តីការគណៈរដ្ឋមន្ត្រី] ទេនេះគឺជាអគាររដ្ឋគេមិនត្រូវហាមឃាត់យើងទេ»៕

ប្រភព៖ ភ្នំពេញប៉ុស្តិ៍
មាស សុខជា